شقو-دا ەسىن جوعالتقان ناۋقاستى فەلدشەرلەر ون مينۋتتىڭ ىشىندە رەانيماسيالاپ، ەسىن جيعىزدى،دەپ حابارلايدى Alash.kz.
دارىگەرلەر كەلگەندە ناۋقاستىڭ تامىر سوعىسى دا، تىنىسى دا توقتاپ قالعان. دەسە دە، ماماندار ونى تىرىلتپەك بولدى.
"103" ءپۋلتىنىڭ ديسپەچەرىنە ناۋقاستىڭ ايەلى قوڭىراۋ شالعان. فيزيكالىق جۇكتەمەدەن كەيىن ونىڭ جۇرەگى قاتتى سوعىپ، كەۋدە تۇسى اۋىرعان. وقيعا ورنىنا بريگادا جەتكەندە ەر ادام ەكى مينۋت ەس-تۇسسىز جاتقان. كلينيكالىق ءولىم تىركەلدى، جەدەل جاردەم بريگاداسى كەۋدە قۋىسىن قىسۋ، جاساندى جەلدەتۋ جانە دەفيبريللياسيانى قولدانۋ ارقىلى رەانيماسيالىق شارالاردى باستادى”، – دەپ حابارلادى شقو جەدەل جاردەم ستانسياسى.
10 مينۋتتان سوڭ ناۋقاس ءوزى تىنىس الا باستادى، تامىرلارىندا سوعىس پايدا بولدى. سونداي-اق بوزارعان بەتىنە قان ءجۇرىپ، ەسىن جيدى. سودان كەيىن ەر ادام جەدەل كورونارلىق سيندروم دياگنوزىمەن التاي ءوڭىرىنىڭ اۋدانارالىق اۋرۋحاناسىنا جەتكىزىلىپ، جۇرەگىنە ستەنت ورناتىلعان. قۇتقارىلعان ەر ادام ءالى تەراپيا بولىمىندە جاتىر. ءبىراق ونىڭ جاعدايى تۇراقتى.
