دۇنيەجۇزىلىك توعىزقۇمالاق فەدەراسياسى ەلشىلەر اراسىندا توعىزقۇمالاقتان جولداستىق كەزدەسۋ وتكىزدى

استانادا دۇنيەجۇزىلىك كوشپەندىلەر ويىنىن قولداۋ جانە ۇلتتىق مادەني مۇرامىزدى دارىپتەۋ ماقساتىندا دۇنيەجۇزىلىك توعىزقۇمالاق فەدەراسياسى ەلشىلەر اراسىندا توعىزقۇمالاقتان جولداستىق كەزدەسۋ وتكىزدى.

ديپلوماتيالىق كورپۋس اراسىندا توعىزقۇمالاقتان جارىسقا ەلىمىزدەگى بىرنەشە ەلشىلىك وكىلدەرى ىقىلاس تانىتتى.

21 مامىردا استاناداعى «The One Hotel» قوناق ۇيىندە ەۋرووداق، ءۇندىستان، ماروككو، رەسەي، يراك، وزبەكستان، قىرعىزستان، ەستونيا، ليتۆا، لاتۆيا جانە پولشا مەملەكەتىنىڭ ەلشىلەرى مەن ەلشىلىك قىزمەتكەرلەرى جينالدى.

ەۋرووداق وكىلى ماچەي مادالينسكيي، ماروككو ەلشىلىگىنەن Mr.Ouahi Driss، اۋدارماشى بايقونىر اياگوز، ءۇندىستان ەلشىسى، رف اتتاشەسى، يراك ەلشىسى دوكتور دجابەر ناجم ابدۋللاح قازاقتىڭ زياتكەرلىك ويىنى- توعىزقۇمالاقتان سىنعا ءتۇسىپ، قىزىعۋشىلىق تانىتتى. جارىسقا قاتىسام دەپ نيەت تانىتقان ديپلوماتيالىق كورپۋس وكىلدەرىنە قوسىمشا ساباق الىپ، شەبەرلىكتەرىن جەتىلدىرۋگە الدىن الا جاتتىقتىرۋشىلار ويىن ۇيرەتكەن بولاتىن. ەلشىلىك وكىلدەرىنە توعىزقۇمالاق تاقتالارى سىيعا تارتىلدى.

بۇگىن سونداي-اق توعىزقۇمالاقتان وسى كۇنگە دەيىن جەتىستىككە جەتكەن شەبەرلەر، الەم چەمپيوندارىنىڭ اراسىندا دا سايىس ءوتتى. التى ويىنشى قاتىسقان دودادا توعىزقۇمالاق شەبەرى سەرىك اقتايەۆ جەڭىمپاز بولدى.

سەرىك اقتايەۆ - 1 ورىن، توعىزقۇمالاقتان الەم چەمپيونى

ەرنۇر مەرەشيەۆ - 2 ورىن، حالۆقارالىق دارەجەدەگى سپورت شەبەرى

ماحسات شوتايەۆ - 3 ورىن، الەم چەمپيوناتىنىڭ كۇمىس جۇلدەگەرى

ايدوس سەيىتجان - الەم چەمپيونى

مۇرات اياپبەكوۆ - ارداگەرلەر چەمپيونى.

بۇگىنگى جيىنعا ق ر پارلامەنت ءماجىلىسى دەپۋتاتى، دۇنيەجۇزىلىك توعىزقۇمالاق فەدەراسياسى قامقورشىلار كەڭەسىنىڭ ءتوراعاسى مۇرات ابەنوۆ، استانا قالاسى قامقورشىلار ءتورايىمى Binom مەكتەپتەر جەلىسى باسشىسى شولپان مارات قىزى ارنايى قاتىسىپ، جارىس قوناقتارىنا جىلى لەبىزىن ارنادى. بۇل ءداستۇرلى جارىستىڭ وتۋىنە دۇنيەجۇىلىك توعىزقۇمالاق فەدەراسياسىنىڭ پرەزيدەنتى اليحان بايمەن مەن فەدەراسيا ۆيسە-پرەزيدەنتى ماقسات رامانقۇل ۇيىتقى بولىپ كەلەدى.

بيىل قىركۇيەك ايىندا V دۇنيەجۇزىلىك كوشپەندىلەر ويىنى استانادا جالاۋىن كوتەرەدى. باعدارلامادا 2020 جىلى جەلتوقسان ايىندا يۋنەسكو شەشىمىمەن ادامزاتتىڭ مادەني مۇرا تىزىمىنە ەنگىزىلگەن توعىزقۇمالاق ويىنى دا بار.