ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قارجى پيراميداسىن قولداعانى ءۇشىن تۇرمەگە تۇسكەن ۆاينەر وتباسىمەن قاۋىشتى

19 مامىر 2024 248

بەلگى ۆاينەر مەيىرجان تورەبايەۆ تۇزەتۋ مەكەمەسىنەن قىسقا مەرزىمدى دەمالىس الىپ، وتباسىمەن قاۋىشتى. بۇل تۋرالى سوتتالۋشىنىڭ جارى دانا ەسەيەۆا مالىمدەدى، دەپ حابارلايدى Alash.KZ ۇلتتىق پورتالى Azattyq Ruhy پورتالىنا سىلتەپ. 

دانا ەسەيەۆانىڭ سوزىنشە، مەيىرجان تورەبايەۆتىڭ زاڭ بويىنشا قىسقا مەرزىمدى دەمالىسى بار. (113-باپ مەكەمەدەن تىس جەرلەرگە شىعۋ). ۆاينەر سول مۇمكىندىگىن پايدالانعان.

«بالالاردىڭ باقىتتان باسى اينالىپ جاتىر. كىشىلەرى سوڭعى كەزدەسۋدەن كەيىن ءبىراق تىلدەرى شىعىپ، اكەلەرىنە كوپتەگەن سۇراقتار قويىپ جاتىر. ۇلكەندەرى سانالى، اكەلەرىنىڭ جانىندا سابىرلى بولىپ وتىر. جاقىن ارادا ونىڭ پاۆلودارعا قايتا كەتەتىنىن ءتۇسىنىپ، بارىنشا قۇشاقتاپ جاتىر. وندا مەيىرجان كۇندىز ەڭبەك رمك-دا جۇمىس ىستەيدى، ال كەشكە مەكەمەگە ورالادى. ەڭ باستىسى، انامىزدىڭ جۇرەگى تىنىشتالدى. از ۋاقىتقا بولسا دا، ۇلى قاسىندا»، - دەپ ءبولىستى دانا ەسەيەۆا.

ەسكە سالا كەتەيىك، بەلگىلى مەيىرجان تورەبايەۆ قىلمىستىق كودەكستىڭ 217-باپ بويىنشا كىنالى دەپ تانىلىپ، سوت ۇكىمىنە سايكەس، ەڭ تومەنگى قاۋىپسىزدىك كولونياسىندا بەس جىل باس بوستاندىعىنان ايىرۋ جازاسىنا كەسىلدى.

تەرگەۋ مالىمەتتەرى بويىنشا، 2019 جىلى باستاپقىدا Astex قارجىلىق پيراميداسى قۇرىلدى. 

«2020 جىلدىڭ قىركۇيەگىندە اتالعان ادامدار قارجى پيراميداسىن تانىمال ەتۋ ماقساتىندا الەۋمەتتىك جەلىدە 1 ميلليوننان استام جازىلۋشىسى بار مەيىرجان تورەبايەۆقا سىياقى بەرۋگە ۋادە بەرىپ، بىرلەسكەن قىلمىستىق ىس-ارەكەت جاساۋ ءۇشىن جۇگىندى. تورەبايەۆ ۇسىنىستىڭ زاڭسىزدىعىن ءتۇسىنىپ، پيراميدا ءساتسىز بولعان جاعدايدا قىلمىستىق جاۋاپكەرشىلىكتەن قۇتىلا الاتىنىنا سەنىمدى بولىپ، ۇيىمداسقان قىلمىستىق توپتىڭ قۇرامىنا كىرۋگە كەلىسىم بەرىپ كىرگەن. ول سالىمشىلارعا اي سايىن ۋادە ەتىلگەن پايىز تولەۋ مۇمكىن ەمەس ەكەنىن ءتۇسىنىپ، زاڭسىز قارجى پيراميداسى ەكەنىن ءبىلىپ، جۇمىستان كىرىس تاباتىنىن ويلاپ، سالىمشىلاردىڭ قاراجاتىنان ايىرىلاتىنىن ءتۇسىنىپ، ءوز جۇمىسىن باستادى»، – دەدى مەملەكەتتىك ايىپتاۋشى.

وسىلايشا مەيىرجان تورەبايەۆ كومپانيا قۇرامىندا جارناما جاساۋ، ۇگىت-ناسيحات جۇمىستارىمەن اينالىسقان. سونداي-اق مەيىرجان تورەبايەۆ Mudarabah Capital قۇرىلتايشىسى قاتارىندا بولعان. شەرنيازوۆ پەن تورەبايەۆ قارجى پيراميداسىن قۇردى جانە ۇيىمداستىردى دەگەن ايىپپەن كەلىسپەدى جانە كىناسىن مويىندامادى.

بۇل ماقالا تۋرالى نە ويلايسىز؟