اقتوبە قالاسىندا 8-سىنىپ وقۋشىسى الىمجەتتىك قۇربانى بولدى. ول كوللەدج ستۋدەنتتەرىنەن تاياق جەپ، ەسىنەن تانىپ، كەيىن قايتىس بولدى. اكەسى قايرات قاينازاروۆ ادىلدىك ىزدەپ، ۇلىنىڭ الىمجەتتىكتىڭ كەسىرىنەن قازا بولعانىن باياندادى، دەپ حابارلايدى Alash.kz Sputnik.kz سايتىنا سىلتەمە جاساپ.
"مەنىڭ ۇلىم بەكسۇلتان – ەگىزدىڭ سىڭارى. ۇلدارىمدى اللا ماعان بەس قىزدان كەيىن دۇعالارىما جاۋاپ رەتىندە جىبەردى. ەگىزىم – بەكسۇلتان مەن ەرسۇلتان سپورت مەكتەبىندە بىرگە وقىدى. ەكەۋى دە ەركىن كۇرەستەن سپورت شەبەرىنە ۇمىتكەر. 2022 جىلى ەسەت باتىر اتىنداعى سپورت مەكتەپ-ينتەرناتىنا قابىلداندى. بۇل مەكەمە وليمپيادالىق رەزەرۆتە، بالالار سوندا وقيدى جانە تۇرادى"، – دەيدى قايرات قاينازاروۆ.
قايعىلى وقيعا 11 ساۋىردە بولعان.
"كەشكى ساعات 18:00-دەن كەيىن جاتاقحانانىڭ بارلىق قىزمەتكەرى ۇيىنە قايتادى. تاربيەشىلەر كەتكەننەن كەيىن وقۋشىلار ءوز ىستەرىنە كىرىستى. 9 جانە 10-سىنىپ وقۋشىلارى، كوللەدج ستۋدەنتتەرى جينالىپ، بولمەگە 10 بالانى اكەلەدى. ولار دونەرگە اقشا تالاپ ەتكەن، بۇلار بەرمەگەن. ءسويتىپ سول جەردە ۇرىپ-سوققان"، – دەيدى قايرات قاينازاروۆ.
بەكسۇلتان قايتىس بولعان كۇنى اناسى ۇزاق ساپارعا شىققان. ءبىراق ءبارى جوسپارلانعانداي بولمادى. انا جۇرەگى بالاسىن ماڭگىگە جوعالتاتىنىن سەزبەدى.
"كەشە 10 بالادان دا پوليسيا جاۋاپ الدى. مەنىڭ ۇلىم سوققىدان قايتىس بولدى، ينتەرنەتتەگى بارلىق اقپارات وتىرىك. سوققى ۇلىمنىڭ جۇرەگىنە تيگەن، ونى تىزەمەن جۇرەكتەن تەپكەن، ساراپشى تامىرلارى جارىلىپ كەتكەنىن ايتتى"، – دەپ ءتۇسىندىردى مارقۇمنىڭ اكەسى.
بەكسۇلتاننىڭ باۋىرى ەرسۇلتان دا سوققىعا جىعىلدى. ونىڭ كوز الدىندا باۋىرى قازا بولدى.
"ءقازىر ەرسۇلتاننىڭ جاعدايى اۋىر. مۇنىڭ ءبارى ونىڭ كوز الدىندا بولدى. ۇلىمنىڭ پسيحيكاسى بۇزىلدى، اۋىرىپ جاتىر. ونى ۇرىپ-سوققان، قاسىندا تۇرعان بالالار، ءمۇعالىم، ديرەكتور – اركىم ءوز جازاسىن السىن. الىمجەتتىك 10 كۇندە بولا قويعان جوق، بۇل بۇرىننان قالىپتاسقان جۇيە"، — دەيدى قايعىدان قان جۇتقان اكە.
اقتوبە وبلىسى پوليسيا دەپارتامەنتىنىڭ مالىمەتىنشە، دەنساۋلىققا قاساقانا اۋىر زيان كەلتىرۋ فاكتىسى بويىنشا سوتقا دەيىنگى تەرگەۋ باستالدى. سونداي-اق سپورت مەكتەبىنىڭ قىزمەتكەرلەرىنە قاتىستى ءوز قىزمەتتىك مىندەتتەرىن دۇرىس اتقارماۋ فاكتىسى بويىنشا سوتقا دەيىنگى تەرگەۋ جۇرگىزىلەدى.
قازا تاپقان 14 جاسار بەكسۇلتان ابۋباكىردىڭ دەنەسى جەر قويناۋىنا تاپسىرىلدى.
اقتوبەدە سپورت مەكتەبىنىڭ سەگىزىنشى سىنىپ وقۋشىسىن وزىنەن بىر-ەكى جاس ۇلكەن ۇلدار ۇرىپ ولتىرگەن. مۇنى كۋاگەرلەر دە، ساراپتاما دا راستادى. ءقازىر كۇدىككە ىلىنگەن بالالار قاماۋدا وتىر. ۇلىنان ايىرىلعان اتا-انا جاۋىزدىققا بارعان جاسوسپىرىمدەردى دە، العاشىندا قىلمىستى بارىنشا جاسىرعان ءبىلىم وشاعىنىڭ باسشىلارىن دا قاتاڭ جازالاۋدى سۇرايدى.
