ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"قۇلسارىدا قارۋلى توپ ادامداردى كەپىلگە الىپ، اقشا تالاپ ەتىپ جاتىر". پوليسيا كۇدىكتىنى ۇستادى

15 ءساۋىر 2024 499

3 وڭىردە جالعان اقپارات تاراتۋشىلار ۇستالدى، دەپ حابارلادى alash.kz سايتى Polisia.kz كە سىلتەپ.

ماڭعىستاۋ وبلىسىنىڭ پد جەدەل باسقارۋ ورتالىعىنا سۋ تاسقىنى ايماعىنان ەۆاكۋاسيالانعان قۇلسارى قالاسىنىڭ تۇرعىندارىن قوناق ۇيلەردىڭ بىرىندە قارۋلى ادامدار كەپىلگە الىپ، اقشا تالاپ ەتىپ جاتىر دەگەن اقپارات تۇسكەن. تەكسەرىس بارىسىندا بۇل اقپارات جالعان بولىپ شىقتى.

وبلىستىق پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى قابىلداعان شارالار ناتيجەسىندە بەينەۋ كەنتىندە جالعان قوڭىراۋ شالعانى ءۇشىن 22 جاستاعى قىز ۇستالدى. بۇعان دەيىن اۆتوبۋستا ونىڭ ۇيالى تەلەفون ۇرلاعانى انىقتالدى. ول قولدى بولعان گادجەتتەن قوڭىراۋ شالعان.

ءقازىر كۇدىكتىگە بوتەن مۇلىكتى ۇرلاۋ جانە تەرروريزم اكتىسى تۋرالى كورىنەۋ جالعان حابارلاما بەرۋ بويىنشا سوتقا دەيىنگى تەرگەۋ جۇرگىزىلىپ جاتىر.

سونداي-اق 15 ساۋىردە اقتوبە قالاسىنىڭ پوليسياسىنا ەر ادام ۇيالى تەلەفوننان قوڭىراۋ شالىپ، گريشين كوشەسىندەگى ۇيگە بومبا قويىلعانىن ايتقان. بۇل فاكتى دە راستالمادى.

اقتوبە وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى بۇرىن دا وسىنداي قىلمىس ءۇشىن سوتتالعان اقتوبە قالاسىنىڭ جۇمىس ىستەمەيتىن تۇرعىنىن ماس كۇيىندە ۇستادى. ونىڭ ۇستىنەن تەرروريزم اكتىسى تۋرالى كورىنەۋ جالعان اقپارات بەرۋ بويىنشا قىلمىستىق ءىس قوزعالدى.

جالعان تەرروريزمنىڭ ءۇشىنشى دەرەگى الماتى قالاسىندا تىركەلدى. وندا قالانىڭ جەكە كومپانيالارىنىڭ ءبىرىنىڭ تەلەفونىنا WhatsApp مەسسەندجەرى ارقىلى ءىرى اقشالاي سىياقى ءۇشىن ساۋدا ورتالىعىنa بومبا قويىلعانى تۋرالى حابارلاما تۇسكەن.

جەدەل-ىزدەستىرۋ ءىس-شارالارىن وتكىزۋ بارىسىندا جەتىسۋ وبلىسى پد ەقىقب قىزمەتكەرلەرى تالدىقورعان قالاسىنىڭ 9 جاسار تۇرعىنىن انىقتادى. ونىڭ ينتەرنەت جەلىسىندە كومپانيانىڭ جارناماسىن كورىپ، وسى حابارلامانى بۇزاقىلىق نيەتپەن جولداعانى انىقتالدى.

كامەلەتكە تولماعان بالانىڭ اتا-اناسى بالانى تاربيەلەۋ شارالارىن قابىلداماعانى ءۇشىن اكىمشىلىك جاۋاپكەرشىلىككە تارتىلدى.

ءىىم قىلمىستىق كودەكستەگى وسى قىلمىس ءۇشىن 5 مىڭ اەك (18 ملن تەڭگە) مولشەرىندە ايىپپۇل نە بولماسا 5 جىلعا دەيىن باس بوستاندىعىن شەكتەۋ نەمەسە باس بوستاندىعىنان ايىرۋ جازاسى كوزدەلگەنىن ەسكەرتەدى.

سونداي-اق سوت شەشىمى بويىنشا كىنالى ادام جەكە جانە زاڭدى تۇلعالارعا كەلتىرىلگەن زالالدى وتەۋگە ءتيىس.

بۇل ماقالا تۋرالى نە ويلايسىز؟