ينتەرنەت دامىعان زاماندا، وسى ارقىلى جاسالاتىن ونلاين-الاياقتىقتا كۇن ساناپ ءوسىپ وتىرعانىن بىلەمىز.
ينتەرنەت الاياقتارعا قانشا جەردەن توسقاۋىل قويىلعانىمەن، ولاردىڭ ايلاسى اسىپ تۇرعانىن كورىپ وتىرمىز. مىسالى، ءارتۇرلى تەلەگرامم چاتتار ارقىلى قوماقتى اقشا تابىڭىز دەپ، تالاي ۇيدە وتىرعان انالاردى الداپ جاتىر.
ىشكى ىستەر مينيسترلىگىمەن قىلمىستىق ىستەر قوزعالادى، ءبىراق الاياقتىڭ ءوزىن تابۋ مۇمكىن ەمەس بولىپ وتىر. سوڭعى اقپاراتتارعا سايكەس توعىز ايدا ەلىمىزدە 15 مىڭ ينتەرنەت الاياقتىق تىركەلىپتى.
ونىڭ ىشىندە، 3 مىڭنان استامى رەسمي بانكتەردىڭ اتىن جامىلىپ ازاماتتاردى الداعان. وسى جەردە ناقتى ساۋال تۋىندايدى. وزدەرىنىڭ قۇرىعىنا تۇسىرەتىن الاياقتار ازاماتتاردىڭ جەكە دەرەكتەرىن، تەلەفون نومىرلەرىن قايدان الادى؟! ولارعا بۇل دەرەكتەردى كىم بەرەدى؟ قانشا جەردەن ادامداردىڭ جەكە دەرەكتەرىن زاڭمەن قورعاپ، ونىڭ تارالۋىن شەكتەسەك تە. الاياقتار توقتايتىن ەمەس. جەكە دەرەكتەردىڭ قۇپيالىلىعى ەشكىمدە قۇپيا بولماي تۇر.
ءبىر عانا مىسال كەلتىرەيىن. ماسەلەن، جاقىندا ءبىر تانىسىم جەكە كومپانياسىن اشىپ، قۇجاتتارىن ەگوۆ ەلەكتروندى ۇكىمەتى ارقىلى تىركەتتى. بۇل پروسەسس ەشكىمنىڭ قاتىسۋىنسىز، تەك پورتالدا جاسالدى.
دەگەنمەن، سول كۇنى وعان ءۇش بىردەي بانكتەن قوڭىراۋ ءتۇسىپ، ارنايى ەسەپتىك شوت اشىڭىز دەگەن ۇسىنىس تۇستكەن. ال، ەرتەسى كۇنى زاڭگەرلىك-بۋحگالتەرلىك قىزمەت كورسەتەتىن جەكە كومپانيا وكىلدەرى حابارلاسىپ، ءوز قىزمەتتەرىن ۇسىنعان. ەڭ سوراقىسى، ەندى جەكە تاكسوپارك وكىلدەرى تىنىمسىز حابارلاسىپ كولىك قىزمەتىن ۇسىنىپ وتىر ەكەن. بۇنىڭ ءبارى نەبارى 2-3 كۇندە ورىن العان جاعداي.
ەندى سۇراق – وسى اتالعان مەكەمەلەر جاڭادان سەرىكتەستىك قۇرىلعانىن، ونىڭ باسشىسى كىم ەكەنىن جانە كەشە عانا رەسمي تىركەلگەن كاسىپكەردىڭ جەكە ۇيالى تەلەفون ءنومىرىن قايدان الىپ وتىر؟ بۋحگالتەرلىك كومپانيالار مەن تاكسوپارك وكىلدەرىنىڭ قولىنا تۇسكەن اقپارات الاياقتاردا دا جوق دەگەنگە كەپىلدىك بار ما؟
ياعني، ءبىزدىڭ جاساعان جۇمىستارىمىزدىڭ ناتيجەسىز ەكەنى ايقىن كورىنىپ تۇر. وسى رەتتە، اتالعان ماسەلە بويىنشا دەر كەزىندە شارا قابىلداۋلارىڭىزدى سۇرايمىز.
جەكە دەرەكتەردى قورعاي الماساق، ەلدى قالاي قورعايمىز؟!
قۇرمەتپەن،
ءماجىلىس دەپۋتاتى قاسقاراۋوۆ د.
