رەسەي كورشى ەلگە اسكەري وپەراسيا باستاعاننان كەيىن بۇۇ باس حاتشىسى انتونيۋ گۋتەرريش ماسكەۋدى ۋكرايناعا اگرەسسيا جاساۋىن دوعارۋعا شاقىردى.
"پرەزيدەنت پۋتين، ادامزات ءۇشىن اسكەرىڭدى الىپ كەت" دەدى باس حاتشى بۇۇ قاۋىپسىزدىك كەڭەسىنىڭ توتەنشە كەزدەسۋىنەن كەيىن.
"ادامزات ءۇشىن ەۋروپادا سوعىستىڭ باستالۋىنا جول بەرمە، عاسىر باستالعالى بەرگى ەڭ اۋىر سوعىس بولايىن دەپ تۇر" دەدى گۋتەرريش. قاقتىعىس "توقتاۋى ءتيىس" دەدى ول.
بىرنەشە ساعات بۇرىن رەسەي باسشىسى ۆلاديمير پۋتين رەسەيلىك مەملەكەتتىك تەلەارنالاردان مالىمدەمە جاساپ، دونباستا "ارنايى وپەراسيا" باستايتىنىن حابارلاعان. بۇدان سوڭ ۋكراينانىڭ ءبىرقاتار قالالارى مەن وبلىستارىندا جارىلىس بولعانى، وق اتىلعانى جايلى اقپارات ۇدەگەن. كۋاگەرلەردىڭ ايتۋىنشا، دونباستىڭ وزىندە رەسەيشىل سەپاراتيستەر تارابىنان اتقىلاۋ كۇشەيگەن، ۋكراينانىڭ بارلىق-دەرلىك اۋماعىندا اسكەري نىساندار شابۋىلعا ۇشىراعان.
ناتو باس حاتشىسى يەنس ستولتەنبەرگ رەسەيدىڭ ۋكرايناعا قاتىستى ارەكەتىن ايىپتادى.
"بۇل حالىقارالىق قۇقىقتى ورەسكەل بۇزۋ، ەۋرواتلانتيكالىق قاۋىپسىزدىككە تونگەن قاتەر. رەسەيدى تەز ارادا اسكەري قيمىلىن دوعارىپ، ۋكراينانىڭ ەگەمەندىگى مەن تەرريتوريالىق تۇتاستىعىن ساقتاۋعا شاقىرامىن" دەدى ستولتەنبەرگ.
ۋكراينا باسشىسى ۆلاديمير زەلەنسكيي حالىققا ۇندەۋ جاساپ، ۇرەيلەنبەۋگە شاقىردى. ەلدە اسكەري جاعداي جاريالاندى.
