ءوڭىر باسشىسى بەلگىلى ونەرتانۋشىعا العىسىن ءبىلدىردى. ودان ءارى قاراي «اتامەكەن» ونەر ورداسىندا ءىليا جاقانوۆتىڭ شىعارماشىلىعىنا ارنالعان رەسپۋبليكالىق «ەدىل-جايىق» سۋرەتشىلەر سيمپوزيۋىمىنىڭ اشىلۋ سالتاناتى ءوتتى.
ايتا كەتەيىك، ءىليا جاقانوۆ 1936 جىلى 6 مامىردا جامبىل وبلىسى سارىسۋ اۋدانىنداعى اقتوعاي اۋىلىندا جارىق دۇنيەگە كەلگەن. ول 1959 جىلى س. كيروۆ اتىنداعى قازاق مەملەكەتتىك ۋنيۆەرسيتەتىن بىتىرگەن. ال 1959-1963 جىلدارى «قازاقستان پيونەرى» (قازىرگى «ۇلان») گازەتىندە ادەبيەت جانە ونەر ءبولىمىنىڭ مەڭگەرۋشىسى بولعان. سونداي-اق 1963-1984 جىلدار ارالىعىندا قازاق كسر مينيسترلەر كەڭەسىنىڭ تەليەۆيزيا جانە راديوحابار جونىندەگى مەملەكەتتىك كوميتەتى جۇيەسىندە ادەبي رەداكتور، قازاق راديوسىنىڭ مۋزىكالىق رەداكسياسىندا باس رەداكتور قىزمەتتەرىن اتقاردى.
