پارلامەنت ءماجىلىسىنىڭ دەپۋتاتى سامات نۇرتازا «بولاشاق» باعدارلاماسى اينالاسىندا بولىپ جاتقان شۋعا قاتىستى پىكىر ءبىلدىرىپ، باعدارلامانى جابۋعا «تۇبەگەيلى قارسى» ەكەنىن ايتتى، دەپ حابارلايدى Alash.kz.
«كورگەنسىز، پەيىلى تازا ەمەستەر كەزدەسەدى»
«بولاشاق» باعادارلاماسىنا ءبىراز شابۋىلدى الەۋمەتتىك جەلىدە بايقاپ قالدىم. پرەزيدەنت باعدارلاماسىمەن وقىعان 3-4 قىلمىسكەرلەر مەن جەمقورلاردى العا سالىپ، باعدارلامانى جابۋدى تالاپ ەتەتىن ازاماتتاردى كوزىم شالىپ قالدى.
ايتايىن دەگەنىم، «بولاشاق» باعدارلاماسىنىڭ ارقاسىندا تالاي كەدەي جانە ورتاشا وتباسىدان شىققان جاستار شەتەل كوردى، ءبىلىم الدى، مەملەكەتتىك سەكتوردا ورتا دەڭگەيىندە قىزمەت ەتىپ، ەلگە پايداسىن كەلتىرىپ جاتىر دەپ جازدى Ulysmedia.kz.
ارينە قوعام بولعان سوڭ، ستۋدەنتتەردىڭ اراسىندا دا جاۋاپسىز، كورگەنسىز، پەيىلى تازا ەمەستەر كەزدەسەدى. الايدا سول 3-4 ادام ءۇشىن بۇكىل باعدارلامانى جابۋعا تۇبەگەيلى قارسىمىن، - دەيدى ول.
دەپۋتات ەۋروپا مەن اقش، كانادا مەن قىتايدا ءبىلىم الۋعا قازاقستاندىقتاردىڭ 80 پايىزىنىڭ قالتاسى كوتەرمەيتىنىن، سالدارىنان عىلىمي پروگرەسس پەن دۇنيەجۇزىلىك باسەكەلەستىكتەن ارتتا قالامىز دەپ وتىر.
«تمد مەملەكەتتەرىندە ونداي باعدارلاما جوق»
ەگەر «بولاشاق» باعدارلاماسى جابىلسا، ءبىز 2040-2060 جج مەملەكەتتى كوتەرەتىن بۋىننىڭ تامىرىنا بالتا شابامىز. ەۆروپا مەن اقش، كانادا مەن قىتايدا ءبىلىم الۋعا 80% قازاقستاندىقتاردىڭ قالتالارى كوتەرمەيدى، ناتيجەسىندە عىلىمي پروگرەسس پەن دۇنيەجۇزىلىك باسەكەلەستىكتەن ارتتا قالامىز. ارينە بۇگىنگى بۋىن ول قاتەردى سەزىنبەي وتەدى، قينالاتىن سول نەمەرەلەرىمىزدىڭ بۋىنى.
توق ەتەرى، «بولاشاق» باعدارلاماسىنا تالاپتاردى كۇشەيتىپ، ىرىكتەۋ پروسەسسىن قاتاڭداتىپ، ءبىراق جاستاردى جىبەرۋدى توقتاتپاۋ كەرەك. تمد مەملەكەتتەرىنىڭ اراسىندا ونداي باعدارلاما جوق، نە بولىپ جاتقانىن كورىپ وتىرمىز. ءوز سورپاسىنا وزدەرى مالىنىپ وتىر. جاھاندانۋ پروسەسسىنە ەسە جىبەرۋگە بولمايدى. ايتارىم وسى، - دەيدى سامات نۇرتازا.
