ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ۋتيلليزاسيانى الىپ تاستاۋدىڭ قانداي سالدارى بار؟ مامان جاۋاپ بەردى

31 مامىر 2024 2285

اناليتيكا جانە ەكونوميكا سالاسىنداعى ساراپشى قانات وسپانوۆ ۋتيلمالىم داۋىنا قاتىستى پىكىر ءبىلدىردى، - دەپ حابارلايدى Alash.kz

«كەيىنگى كەزدەرى ۋتيلالىم ماسەلەسى قايتادان قىزۋ تالقىلانا باستادى. نەگىزى بۇل ماسەلەگە قاتىستى ءتۇرلى كوزقاراس بار. مىسالى اۆتوكولىك ونەركاسىبىنە ماماندانعان «سەماز» زاۋىتىنىڭ قىزمەتكەرلەرى قازاقستان ۇكىمەتىنە ۇندەۋ جاساعان. ولار ەلىمىزدەگى وتاندىق ءوندىرىستى قورعاۋ كەرەگىن جانە دامىتۋ قاجەت ەكەنىن ايتتى. جۇمىسشىلاردىڭ سوزىنشە، ۋتيلالىمدى الىپ تاستاۋدىڭ سالدارىنان ولار جۇمىسسىز قالىپ قانا قويماي، كولىك جاساۋ سالاسىمەن قاتار دامۋ مۇمكىندىگىنەن دە ايىرىلۋى مۇمكىن.

وسىلايشا، ولار باسقا تابىس كوزىن ىزدەۋگە نەمەسە شەتەلگە جۇمىس ىستەۋگە كەتۋگە ءماجبۇر بولاتىنىن باسا ايتتى.

دەمەك بۇل پروبلەما ولاردىڭ قارجىلىق جاعدايىنا ايتارلىقتاي اسەر ەتەدى دەگەن ءسوز. ءتىپتى كەيبىر بەلسەندىلەردىڭ ارەكەتى ۇكىمەتتىڭ عانا ەمەس، قاراپايىم جۇمىسشىلاردىڭ دا اشۋىنا تيە باستاعانداي.

ونىڭ ۇستىنە، «حالىق تابىسىنىڭ ءوسۋى جانە ونەركاسىپتىڭ دامۋى ءۇشىن» دەگەن پەتيسيا پايدا بولعان. پەتيسيا اۆتورلارى جەرگىلىكتى ءوندىرىستى دامىتۋ جانە قولداۋ ارقىلى كىرىستى ارتتىرۋ قاجەت ەكەنىن تالاپ ەتەدى.

پەتيسياعا 12 مىڭ ادام قول قويىپ ۇلگەرگەن. دەمەك بۇل وسى ماسەلەدە پىكىرلەر ءارتۇرلى ەكەنىن، جاعداي شيەلەنىسىپ بارا جاتقانىن كورسەتەدى.

ۋتيلالىم - وتاندىق ءوندىرىستى دامىتۋعا ىقپال ەتەتىن ماڭىزدى قۇرال. ءبىراق بۇل تولەمنىڭ ءادىل بولۋى دا ماڭىزدى. ارينە ىشكى نارىقتى قورعاۋ دا باستى ءرول اتقارادى. ىشكى نارىقتى يمپورتتىق ۇستەمدىكتەن قورعاۋ جانە وتاندىق وندىرۋشىلەردى ىنتالاندىرۋ قاجەت. وتاندىق ءوندىرىستىڭ بەلسەندى دامۋى – ەلدىڭ ەكونوميكالىق تۇراقتىلىعى مەن وركەندەۋىنە قول جەتكىزۋدىڭ نەگىزگى فاكتورى.

ەلدە ساپالى ءوندىرىس ورنىققان كەزدە بۇل ەكونوميكا مەن قوعامداعى كوپتەگەن وڭ وزگەرىستەرگە نەگىز جاسايدى. ءوزىمىزدىڭ ءوندىرىسىمىزدىڭ باسقا بىرەۋدى قايتا ساتۋدان ارتىقشىلىعى - ونىڭ ۇزاق مەرزىمدى دامۋ مەن تۇراقتىلىق قابىلەتىندە ەكەنىن اتاپ وتكەن ءجون»، - دەيدى Dalanews.kz سايتى وسپانوۆتىڭ پىكىرىن.

ساراپشىنىڭ سوزىنشە. قازاقستان ءوندىرىس بازاسىن جاڭارتۋ مەن كەڭەيتۋگە، قولايلى ينۆەستيسيالىق ورتا قۇرۋعا جانە مىقتى ينجەنەرلەردى تاربيەلەۋگە كۇش سالۋ كەرەك.

بۇل ماقالا تۋرالى نە ويلايسىز؟