"اقشا قولعا بەرىلسىن"، "ءۇيدىڭ شارشى مەترىن نارىق باعاسى 400 مىڭ تەڭگەمەن باعالانسىن" دەگەن ۇرانداردى قولدارىنا الىپ شىققان قۇلسارىلىقتار ءتۇندى اكىمدىك عيماراتى جانىندا وتكىزدى. تۇنگى 01.30. جاڭبىر جاۋىپ، ءتۇن سۋىق. نارازى توپتار اۋداندىق اكىمشىلىك عيماراتىنىڭ ىشىندە، سىرتىندا تۇردى. بۇل تۋرالى جەرگىلىكتى اقجايىق باسىلىمى جازدى.
اسكەريلەر مەن پوليسيا نارازىلىق توپتاردى سىرتتاي باقىلاۋمەن بولدى. نارازى حالىقتىڭ الدىنا وبلىستىق ءماسليحاتىنىڭ ءتوراعاسى مۋسا حايرۋللين شىعىپ ءوزىن تانىستىرىپ:
مەن سۋ تاسقىنى كەزىندە سىزدەرمەن ءبىر اي بىرگە بولدىم. جوعارعى جاققا تالاپتارىڭىزدى جەتكىزدىم... ءبىراق شارشى مەتر 400 مىڭ تەڭگە بولمايدى. ءبىر ساعات ويلانىپ، اقىلداسۋعا مۇمكىندىك بەرەمىز. سابىر ساقتايىق، - دەدى ول.
1،5 ساعاتتان كەيىن كوپشىلىك الدىنا وبلىس اكىمنىڭ ورىنباسارى جاسۇلان بيسەمبيۆ شىقتى.
- ءبىز اقىلداسا كەلە ءۇيدىڭ شارشى مەترىن 200-240 مىڭ تەڭگەمەن باعالايمىز دەپ شەشتىك. قازاقستاندا باعا سولاي، اعايىن، تۇسىنىڭىزدەر. ودان ارتىق بولمايدى. ماسەلەن، 200 شارشى مەتر ءۇيىڭىز بولسا، 40 ملن تەڭگە الاسىز. باعالاۋ قورىتىندىسىن باستادىق، ەندى وسىلاي جالعاسا بەرەدى، -دەدى ول.
ءبىراق وعان جينالعاندار كونبەدى، نارازى ۇنمەن شۋلاپ قويا بەردى.
- باعالاۋ ناتيجەسىن الدىم. ءۇيىمدى 12 ملن تەڭگەگە باعالاپتى، وعان ءۇي سالا دا، ساتىپ تا الا المايمىن، - دەدى قالا تۇرعىندارىنىڭ ءبىرى.
- بىزگە ودولجەنيە جاساماڭىزدار!
نارازىلىق جالعاسۋدا. ەستەرىڭىزگە تۇسىرسەك، كوكتەمگى قارعىن سۋىنان 2900 ادام جانە جۇزدەگەن كوممەرسيالىق نىساندار بۇلىنگەن بولاتىن.
