ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بەرگەيدىڭ بىلىعى ءالى شىعىپ جاتىر

04 ناۋرىز 2022 85
«ساپاربايەۆتىڭ سىيلىعى» ءۇشىن اقتوبەلىك شەندىلەردىڭ باسى داۋعا قالدى. ىسىراپ بولعان 161 ملن تەڭگە بيۋدجەت اقشاسىن «اقتوبە» الەۋمەتتىك-كاسىپكەرلىك كورپوراسياسى بەرگەي رىسقالييەۆتان ءوندىرىپ الۋعا بەكىنىپ وتىر.

اقتوبەدە ءۇش جىل بۇرىن سالتاناتتى تۇردە اشىلعان «باسپا ءسوز ءۇيى» قايدا؟ orda.kz سايتىنىڭ جازۋىنشا، وليمپيادا چەمپيونى جاقسىلىق ۇشكەمپىروۆ، ارداگەر جۋرناليستەر قاينار ولجاي، مارقۇم نۇرتىلەۋ يمانعالي باستاعان قوعام قايراتكەرلەرى ارنايى شاقىرتىلىپ، تۇساۋكەسەرىن وتكىزگەن ورتالىق ءقازىر جوق. اقتوبە اكىمدەرىنىڭ جۇمىسىن ءتىزىپ، مەملەكەتتىك تاپسىرىستى ورىنداپ وتىرعان وسىنداعى وبلىستىق ەكى گازەت ۇجىمى ءقازىر «قاڭعىپ» ءجۇر.
«بۇل 2018 جىلى بولعان وقيعا. ساپاربايەۆتىڭ كەزىندە «اقتوبە» اكك» اق-ى ارقىلى جوندەۋ جاساتىپ، «اكتيۋبينسكيي ۆەستنيك» گازەتىنىڭ 100 جىلدىعىنا دەپ بىزگە سىيعا تارتتى. «وسىندا وتىراسىڭدار، ءارى قاراي «جۋرناليستەر اللەياسىن» اشامىز» دەدى. ارتىنان ول عيمارات باسقا جاقتاعى  ادامداردىكى بولىپ شىقتى. سوتتاسىپ، مۇلىكتەرىن تۇگەندەدى.  بىزگە «عيمارات بىزدىكى، جالدايسىندار» دەگەسىن شامامەن 2،5 ملن تەڭگەگە جالعا الىپ وتىردىق. 2021 جىلدىڭ قاراشا ايىندا حات كەلدى. «كوممۋنالدىق قىزمەت اقىسىن ايىنا 5 ملن تەڭگەگە دەيىن كوبەيتەمىز» دەلىنگەن. ەسەپتەگەندە ءبىر جىلعا 60 ملن تەڭگە شىعادى ەكەن. بىزدە ونداي اقشا قاراستىرىلماعان. سوندىقتان ول عيماراتتى بوساتىپ، كوشىپ كەتتىم»،- دەدى «اقتوبە مەديا» ءجشس-نىڭ ديرەكتورى راۋكەن وتىنشين.

بەردىبەك ساپاربايەۆ اقتوبە وبلىسىنىڭ اكىمى بولىپ تۇرعان تۇستا بەرگەي رىسقالييەۆتىڭ ۇلەسى بار «ا-پوليگرافيا» عيماراتىن جەرگىلىكتى باسىلىمعا سىيعا تارتقان بولىپ شىقتى. اكىمدىك «اكتيۋبينسكيي ۆەستنيك» گازەتىنىڭ 100 جىلدىعىنا وراي عيماراتتى «باسپا ءسوز ءۇيى» دەپ اتاپ، جابدىقتادى. سونىمەن قاتار جوندەۋ، قالپىنا كەلتىرۋ جۇمىستارى ءۇشىن اقتوبە» اكك اق-ى ارقىلى بيۋدجەتتەن 161 ملن تەڭگە جۇمسادى.

كەيىن باس پروكۋراتۋرىنىڭ ءوزى بەرگەي رىسقالييەۆقا تيەسىلى جەر تەلىمدەرى مەن بىرنەشە سەرىكتەستىكتى سوت ارقىلى قايتارىپ بەردى. ەكس-شەندىگە تيەسىلى مۇلىكتەر قاتارىندا اكىمدىك سىيعا تارتىپ جىبەرگەن «ا-پوليگرافيا» عيماراتى دا بار.  «عيماراتتى جوندەۋگە كەتكەن بيۋدجەت شىعىنىن كىمنەن سۇرايمىز؟» دەگەن ساۋالىمىزدى وبلىس اكىمدىگىنە جولدادىق.

سوتقا شاعىم تۇسەدى


اقتوبە وبلىستىق قارجى باسقارماسىنىڭ باسشىسى نۇرلىبەك ونەربايەۆ سوتقا شاعىم تۇسىرىلەتىنىن ايتتى. «اقتەبە مەديا» ورتالىعى «ا-پوليگرافيا» عيماراتىنان جالداۋ اقىسى قىمباتتاعاننان كەيىن شىققانى بەلگىلى بولدى.
«شارت تالابى بويىنشا بارلىعى 1575،8 ش.م. عيماراتتى جالداۋ قۇنى ايىنا 2 083،0 مىڭ تەڭگە بولسا، كوممۋنالدىق شىعىندارىمەن قوسا العاندا بارلىعى 27254،0 مىڭ تەڭگەنى قۇرادى. الايدا، «ا-پوليگرافيا» ج ش س تاراپىنان 2022 جىلدان باستاپ اي سايىنعى جالداۋ اقىسى 4372،0 مىڭ تەڭگەگە دەيىن وسەتىندىگى جونىندە ەسكەرتپە حات بەرىلدى. ياعني، جاڭا جالداۋ اقىسى كوممۋنالدىق شىعىنداردى ەسەپتەمەگەندە 52464،0 مىڭ تەڭگە بولادى. قاراجاتتى ۇنەمدەۋ ءۇشىن ۇجىم باسقا عيماراتقا اۋىستى. جوندەۋ جۇمىستارىنا جۇمسالعان قاراجات «اقتوبە» اكك اق  تيەسىلى. ەكەۋىنىڭ اراسىندا كەلىسىمشارت بار. قارىز بەرگەن. قازىرگى تاڭدا «اقتوبە» اكك اق سوت ورىنداۋشىلارمەن ءىس-شارالار جوسپارلاپ، «ا-پوليگرافيا» مۇلىگىنە، شوتتارىنا اۋىرتپالىق سالىندى. اقشانى سوت ارقىلى ءوندىرىپ الادى»،- دەيدى نۇرلىبەك ونەربايەۆ.

ەسەپتەسەك سەرىكتەستىك 1575،8 شارشى مەتردىڭ ءار شارشى مەترىن 2083 تەڭگەگە جالداعان. بۇل دەگەنىمىز اي سايىنعى شىعىننىڭ 3 120 000 تەڭگە ەكەنىن كورسەتەدى. (1575،8ح2083=3 282 391،4تگ).

ازىرگە ساپاربايەۆ سىيعا تارتقان «باسپا ءسوز ءۇيى» دە، اقشا دا جوق. ىسىراپ بولعان بيۋدجەت اقشاسى قاي ۋاقىتتا كەرى قايتارىلاتىنى بەلگىسىز.

ارداق ەرۋبايەۆا، اقتوبە
بۇل ماقالا تۋرالى نە ويلايسىز؟