ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بالالاردىڭ ءتىلىن تاپقان اسىلان

08 قازان 2022 60
بۇگىندە بالالارعا ارناپ ءتۇرلى جانردا ۇزبەي جازىپ جۇرگەندەردىڭ ءبىرى اسىلان تىلەگەن.  1993 جىلى 21 مامىردا باتىس قازاقستان وبلىسى، جاڭاقالا اۋدانى، جاڭاقازان اۋىلىنىڭ بالدىرعان ەلدى-مەكەنىندە تۋعان.

2015 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا، ادەبيەتتانۋ جانە الەم تىلدەرى فاكۋلتەتىن ءبىتىرىپ، ءقازىر بالالار مەن جاسوسپىرىمدەرگە ارنالعان رەسپۋبليكالىق «اق جەلكەن» جۋرنالىنىڭ جاۋاپتى حاتشىسى قىزمەتىن اتقارىپ ءجۇر. بالالارعا ارناپ جازۋدى جاقسى كورگەنى شىعار بالالار جۋرنالىندا قىزمەت ەتىپ، ۇنەمى بالالارعا ارناپ جازۋدان ەش جالىققان ەمەس. رەسپۋبليكالىق «التىن توبىلعى»، «ۇلى دالا» شىعارماشىلىق بايقاۋلارىنىڭ جۇلدەگەرى.

قازاقستان جازۋشىلار وداعىنىڭ مۇشەسى. 2017 جىلى «ءۇر»، 2021 جىلى «حاديا»، ال وتكەن جىلى «بويتۇمار» جىر جيناقتارى جارىق كورگەن. نەگىزىنەن بالالارعا ارناپ ولەڭدەر جازعانىمەن اراسىندا بالالارعا ارناپ ادەبي تانىمدىق ماقالالار، جۇمباقتار دا جازىپ تۇرادى. ماسەلەن بۇگىن بالالار نازارىنا ۇسىنىپ وتىرعان ەلىمىزدەگى قالالار تۋرالى جۇمباعى ەرەكشە. ءبىر ەكى سويلەمدىك جۇمباقتار سول قالانىڭ ەرەكشەلىكتەرىن اشىپ كورسەتىپ، بالالاردىڭ ەلىمىزدەگى قالالار تۋرالى تۇسىنىگىن ەرەكشە بايىتا تۇسەدى. ال «پ ءارپى بار ءسوز» جانە «ۇيات-اي» ولەڭدەرى وتە جيناقى، بالالاردىڭ جاتتاۋىنا وڭاي جانە كىشكەنتايلاردىڭ تۇسىنىگىنە لايىقتالىپ جازىلعان. بالالار ءۇشىن ەڭ كەرەگى دە وسى ەمەس پە؟! ەندەشە اسىلان تىلەگەننىڭ ەرەكشە شىعارماشىلىعىن بىرگە وقيىق! 

 

«پ» ءارپى بار ءسوز

 

تۇر ءمۇعالىم «كۇشىندە»،

سۇراق قويار كەز كەلدى:

– ايتىڭدارشى، ىشىندە،

«پ» ءارپى بار سوزدەردى.

 

قاسىم بىردەن تۇردى ۇشىپ،

ەكپىندىلەر، ءبىزدى اتتاي.

سول جاق كوزىن ءبىر قىسىپ،

«قازان»، – دەدى ءمىز باقپاي.

 

– قاي جەرىندە «پ»-سى بار؟

– دەپ سۇراۋى سول ەدى.

ءجونى جوق-اۋ قىسىلار،

«قاقپاعىندا» دەگەنى.

 

 

«ۇيات-اي»

 

ۇرتىندا تۇر قۇرت مىنە،

ءىشىپ وتىر ءسۇتتى دە.

باۋىرساققا قول سوزدى،

قىسىلمايدى ءتىپتى دە.

 

ايراننان دا ءبىر جۇرتتى،

قازىنى دا قىلعىتتى.

ءبىر ۋىسىن كامپيتتىڭ،

قالتاسىنا سۇڭگىتتى.

 

ويناي الماي سەكىرىپ،

جۇرە دە الماي نە تۇرىپ.

كوتەرە الماي قارىنىن،

جاتىر ەندى كەكىرىپ.

 
بۇل ماقالا تۋرالى نە ويلايسىز؟