اقمولا وبلىسىنىڭ ستەپنوگور قالاسىنىڭ زاۆودسكايا كەنتىندە قويما ورتەندى. ورتتەن قويماداعى 1200 ليتر ماي جانە 3 جەڭىل اۆتوكولىك جانىپ كەتتى.
اقمولا وبلىسى تجد باسپا ءسوز قىزمەتىنىڭ مالىمەتىنشە، ءورت بۇگىن ساعات 15:14-تە زاۆودسكايا كەنتىندەگى «سانتيك» ءجشس-نىڭ اۋلاسىندا تۇرعان قويمادان شىققان.
«ءتىلسىز جاۋمەن كۇرەسكە تجد جەكە قۇرامىنان 10 ادام جانە 2 ارنايى ءورت ءسوندىرۋ تەحنيكاسى، مەملەكەتتىك ەمەس ورتكە قارسى قىزمەتتەن 24 ادام جانە 6 تەحنيكا جۇمىلدىرىلدى. قىزىل جالىن 500 شارشى مەتر اۋماقتى شارپىدى. قازا بولعاندار مەن زارداپ شەككەندەر جوق. ءورتتىڭ سالدارىنان 600 ليتر پايدالانىلعان ماي مەن 600 ليتر تازا موتور مايى جانە 3 جەڭىل اۆتوكولىك جانىپ كەتتى. ساعات 16:52-دە ءورت وقشاۋلاندى. قازىرگى كەزدە ونى ءسوندىرۋ جۇمىستارى جالعاسۋدا. سونىمەن بىرگە، ءورتتىڭ شىعۋ سەبەبى دە انىقتالىپ جاتىر»، - دەدى ۆەدومستۆودان.
ايتا كەتسەك، بۇدان بۇرىن اقمولا وبلىسىنىڭ ورمان ءورتى ءقاۋپى بار ماۋسىمعا دايىن ەمەستىگى تۋرالى ايتىلعان بولاتىن.
