زاڭگەر ەرجان بولاتبەكتىڭ ايتۋىنشا، "وسىمدىكتەر مەن جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن تۇرلەرiنiڭ تiزبەسiن بەكiتۋ تۋرالى" قازاقستان ۇكىمەتىنىڭ 2006 جىلعى 31 قازانداعى N 1034 قاۋلىسىمەن "قىزىل كىتاپقا" ەنگەن وسىمدىكتەر مەن جانۋارلار ءتىزىمى بەكىتىلگەن. اراسىندا قىزعالداقتىڭ جانە وزگە دە تانىمال وسىمدىكتەردىڭ تۇرلەرى بار.
"اسا ۇلكەن كولەمدە بولماسا، جالپى وسىمدىك جۇلعانى ءۇشىن كوبىنە ايىپپۇل تولەنەدى. دەگەنمەن وسى سالادا اقپاراتتاندىرۋدى كوبىرەك جۇرگىزۋ كەرەك. سونىمەن قاتار ءبىرىنشى رەتكە، زالال ۇلكەن بولماعان جاعدايدا ەسكەرتۋ نەمەسە قوعامدىق جۇمىستارعا جەگۋمەن عانا شەكتەلۋ كەرەك. ويتكەنى بىلمەستىكپەن وسى قىلمىستى جاساپ جاتقاندار كوپ. حالىقتىڭ مۇنداي ايىپپۇل تولەۋگە جاعدايى دا جوق"، – دەيدى زاڭگەر ەرجان بولاتبەك.
ەكوبلوگەر بازاربەك قامىسبايەۆتىڭ ايتۋىنشا، قۇزىرلى ورگاندار ايىپپۇلدى سالماس بۇرىن قوعامدى اقپاراتتاندىرىپ، ەسكەرتۋ جاساۋى كەرەك. ول ايىپپۇلدىڭ كولەمى تىم ۇلكەن دەپ ەسەپتەيدى.
جانىم اشيدى، سەبەبى ويدا جوقتا بىلمەستىكپەن قۇربان بولىپ كەتىپ تۇر. ءبىرىنشى رەت بۇزعانى ءۇشىن ەسكەرتۋ بەرۋ كەرەك پە ەدى؟ مەنىڭشە، ايىپپۇل سالعانعا دەيىنگى اقپاراتتىق جۇمىستار دۇرىس جۇرگىزىلمەي جاتىر. مەن ينتەرنەتتەن قانداي وسىمدىكتى جۇلۋعا بولمايتىنى، جۇلسا، وعان قانداي ايىپپۇل سالىناتىنى تۋرالى ءدال فوتوسىمەن كورسەتىلگەن اقپارات تاپپادىم. پوليسيا دەپارتامەنتىنىڭ وكىلى "الەۋمەتتىك جەلىدەگى پاراقشالارىمىزعا جاريالادىق" دەيدى. ءبىراق قاراپايىم حالىق پوليسيا دەپارتامەنتىنىڭ پاراقشاسىن ىزدەپ، قاراپ جۇرمەيدى عوي. ودان دا ەكولوگيا مينيسترلىگىنىڭ نەمەسە ەڭ بولماعاندا اكىمدىكتەردىڭ سايتىنا ما جاريالاۋ كەرەك شىعار. وندا سۋرەتتەرىمەن، تۇسىنىكتى تۇردە كورسەتىلۋى كەرەك"، – دەيدى ول.
قىزعالداقتىڭ "قىزىل كىتاپقا" ەنگەن 18 ءتۇرى بار. ەكوبەلسەندى سونىڭ ءبارىن ايىپپۇل كولەمىمەن كورسەتىپ قويسا، حالىق ءبىلىپ جۇرەر ەدى دەيدى. دەگەنمەن ادامدار تابيعاتتا ادەپتى تۇردە دەمالۋدى ۇيرەنىپ، سونى نىقتاپ قولعا الۋ كەرەك دەپ ەسەپتەيدى.
