ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

التىنبەكتانۋ باعىتى اشىلدى

06 قازان 2022 79
6 قازاندا الماتىدا ساياساتكەر، وپپوزيسيا قايراتكەرى التىنبەك سارسەنباي ۇلىنىڭ تۋعانىنا 60 جىل تولۋىنا ارنالعان عىلىمي كونفەرەنسيا ءوتتى. عالىمدار "وپپوزيسيا بەلسەندىسىنىڭ ساياسي مۇراسىن زەرتتەۋ ارقىلى التىنبەكتانۋدىڭ عىلىمي تۇعىرىن جاساپ، سول ارقىلى قوعامدىق-الەۋمەتتىك ماسەلەلەردى شەشۋ ماڭىزدىلىعىن" اتاپ ءوتتى.



– تاريح، فيلولوگيا، الەۋمەتتانۋ، قوعامتانۋ، ساياساتتانۋ، جۋرناليستيكا عىلىمىندا التىنبەكتانۋ دەگەن باعىتقا تۇرەن سالىندى. ەندى عىلىمي نەگىزدە ساراپتاپ، التىنبەكتەي تۇلعانىڭ قالىپتاسۋىنىڭ نەگىزى نەدە؟ التىنبەكتىڭ رۋحى كەيىنگى ۇرپاقتارعا جۇعىستى بولۋ ءۇشىن قايتپەك كەرەك؟ قالاي زەرتتەۋ كەرەك؟ قاي باعىتتا، قاي قىرىنان الىپ، سارالاۋ كەرەك دەگەن ماسەلەلەر قوزعالدى، – دەيدى كونفەرەنسيا ۇيىمداستىرۋشىلارىنىڭ ءبىرى ساعاتبەك مەدەۋبەك ۇلى.

جيىندا سوۆەت داۋىرىندە تاربيەلەنىپ، ماسكەۋدە ءبىلىم السا دا، "ۇلتسىزدانباعان" ساياساتكەردىڭ "بيلىك باسىندا ءجۇرىپ تە، جۇيەنىڭ قاتەلىكتەرىن كورىپ، سونى دۇرىستاۋ ءۇشىن كۇش سالعانى" ايتىلدى. ساياساتكەردىڭ ءومىرى مەن ساياسي جولىن زەرتتەۋ ماڭىزدىلىعى ءسوز بولدى.

"تاۋەلسىز ەلدىڭ تاۋەلسىز ازاماتتارى وزدەرى ءۇشىن جانە بولاشاق ۇرپاعى ءۇشىن بەيبىت ساياسي كۇرەستى بۇگىن باستايمىن دەسە، التىنبەك سارسەنباي ۇلىنىڭ ساياسي مۇراسى تەمىرقازىق بولۋعا دايىن" دەدى بايانداماسىن وقىعان ساياساتتانۋشى شالقار نۇرسەيىت.

كونفەرەنسيا بارىسىندا التىنبەك سارسەنباي ۇلىنىڭ جازبالارى مەن ول تۋرالى جازىلعان ماقالالار توپتاستىرىلعان ەكى كىتاپ تانىستىرىلدى. ۇيىمداستىرۋشىلار ءۇشىنشى تومعا وسى كونفەرەنسيا بارىسىندا وقىلعان باياندامالار ەنگىزىلەتىنىن جەتكىزدى.

  • التىنبەك سارسەنباي ۇلى 1993-2001 جىلدار ارالىعىندا قوعامدىق كەلىسىم جانە اقپارات مينيسترلىگىن باسقارعان. كەيىن قاۋىپسىزدىك كەڭەسىنىڭ حاتشىسى، قازاقستاننىڭ رەسەيدەگى ەلشىسى بولدى. 2003 جىلى وپپوزيسياعا ءوتىپ، بيلىكتى سىنادى.

  • 2006 جىلدىڭ 11 اقپانىندا التىنبەك سارسەنباي ۇلى مەن ەكى كومەكشىسىن ۇلتتىق قاۋىپسىزدىك كوميتەتىنىڭ "ارىستان" ارنايى جاساعىنىڭ وفيسەرلەرى ۇرلاپ اكەتىپ، ەكى كۇننەن كەيىن ۇشەۋىنىڭ ءمايىتى تالعار اۋدانىنداعى كوكتوبە اۋىلىنىڭ ماڭىنداعى سايدان تابىلدى. قاستاندىققا تاپسىرىس بەرۋشى رەتىندە اۋەلى سەنات اپپاراتىن باسقارعان ەرجان وتەمبايەۆ ايىپتى دەپ تانىلدى. كەيىن بۇل قىلمىس ەكس-پرەزيدەنت نۇرسۇلتان نازاربايەۆتىڭ بۇرىنعى كۇيەۋبالاسى، مارقۇم راحات الييەۆ پەن ۇقك-نىڭ ەكس-توراعاسى ءالنۇر مۇسايەۆقا تاڭىلدى.

  • وسىعان دەيىن الماتى وبلىسىندا ساياساتكەر وقىعان مەكتەپكە التىنبەك سارسەنباي ۇلىنىڭ ەسىمى بەرىلگەن.

بۇل ماقالا تۋرالى نە ويلايسىز؟