الاش زيالىلارى - ۇلت تاريحىنداعى العاشقى رەفورماتورلار بۋىنى
28 ناۋرىز 2024
457
![](/uploads/thumbnail/20240328213452116_big.jpg)
تاعدىر ونىڭ ماڭدايىنا جاڭا ساپا جانە ىلگەرىشىل مازمۇنداعى قازاق ۇلت-ازاتتىق قوزعالىسىنىڭ جەتەكشىسى بولۋ ءمىندەتىن جازعان ەكەن. وسى رەتتە مىناداي ءبىر جاعدايدى ەسكە الماسقا ءاددىمىز جوق. ءاليحان نۇرمۇحامەد ۇلى بوكەيحان 1866 جىلى بالقاشقا قۇياتىن توقىراۋىن وزەنىنىڭ بويىندا ومىرگە كەلدى. سونىڭ الدىندا عانا، ياعني 1865 جىلدىڭ كوكتەمىندە بالقاشتىڭ وڭتۇستىك شىعىس ىرگەسىندە شوقان شىڭعىس ۇلى ءۋاليحانوۆ دۇنيەدەن وزدى. ونىڭ ەڭ سوڭعى جازعان عىلىمي ەڭبەگى «سوت رەفورماسى تۋرالى جازبالار» دەپ اتالادى. سىني ۇستانىم تۇرعىسىنان جازىلعان بۇل ەڭبەگىندە ول «حريستيان جانە وتىرىقشى ورىس تۇرعىندارى ءۇشىن دايارلانعان وزگەرىستىك شارالار» «مەنىڭ وتانىمدا» سول كۇيىندە ەنگىزىلەتىن بولسا، وندا ودان «ەشقانداي دا جاعىمدى ناتيجە بولماق ەمەس» دەگەن تۇجىرىمعا كەلەدى. بۇل ۇلى عالىمنىڭ يمپەريا قۇرامىنداعى ەلىنىڭ ەندىگى جاعدايىنا اراشا ءتۇسۋى عانا ەمەس، سونىمەن بىرگە سەزىكتەنە قاراۋى دا ەدى.
ومىرگە شوقاننىڭ ءىزىن الا كەلگەن ءاليحان نۇرمۇحامەد ۇلى 1867-1868 جىلدارداعى ورىس اكىمشىلىگى ەنگىزگەن باسقارۋ جۇيەسى جاعدايىندا ەر جەتىپ، ەسەيدى دە، رەسەيلىك رەفورمالىق شارالاردىڭ تۇبىندە قازاق ەلىن ءبىرجولا جويۋمەن اياقتالاتىنىنا كوز جەتكىزىپ، جاڭا ساپا جانە مازمۇنداعى قازاق ۇلت-ازاتتىق قوزعالىسىن باستاۋ ءىسىن قولعا الدى. وقىعان ءبىلىمدى ازاماتتارى ساۋساقپەن سانارلىق سول تۇستاعى قازاق قوعامى جاعدايىندا بۇل وتە اۋىر ءىس بولاتىن. ونىڭ بۇل باستاعان ءىسىن زامانداس سەرىگى احاڭ كەزىندە: قىراعى، قيا جازباس سۇڭقارىم-اي! قاجىماس قاشىق جولعا تۇلپارىم-اي! ۇيىلگەن ولەكسەنى ورگە سۇيرەپ، شىعارماق قىر باسىنا ىڭكارىم-اي! – دەگەن ولەڭ جولدارى ارقىلى باعامداعان ەدى. شوقان شىڭعىس ۇلى سياقتى، ءاليحان نۇرمۇحامەد ۇلى ءۇشىن دە رەسەيلىك بيلىككە قاتىستى نەگىزگى ىرگەلى ماسەلە وكىمەتتىڭ قازاق قوعامىندا جۇرگىزگەن رەفورمالىق شارالارى مەن باسقارۋ جۇيەسىنىڭ ىشكى مازمۇنى ەدى.
تۇپتەپ كەلگەندە، ۇلتتىڭ تاعدىرىن شەشەتىن وسى ەكى فاكتور-تىن. سوندىقتان، ءاليحان ءبوكەيحاننىڭ كوزقاراستىق ۇستانىمى مەن ارەكەتى وزىنەن بۇرىنعى قازاق ويشىلدارى مەن ساياسي قايراتكەرلەرى (ك.قاسىم ۇلى، ي.تايمان ۇلى ج.ب.) قىزمەتىنىڭ جاڭا تاريحي جاعدايداعى جالعاسى بولاتىن. وسى رەتتە ءا.بوكەيحان مەن ونىڭ سەرىكتەرىنىڭ كوزقاراس ۇستانىمىنداعى مىناداي ەرەكشەلىكتەردى ءبولىپ اتاعان ءجون. شوقاننىڭ ءومىرى مەن قىزمەتى ورىس بيلىگىنىڭ قازاق قوعامىنا تەرەڭ بويلاپ ەنىپ كەلە جاتقان مەزگىلىنە تۇس كەلسە، ءاليحان نۇرمۇحامەد ۇلىنىڭ كەمەلىنە كەلگەن شاعى پاتشالىق باسقارۋ جۇيەسىنىڭ داعدارىستىق كەزەڭىنە ەنۋىمەن سيپاتتالادى.
ەگەر شوقاننىڭ عۇمىرى ەرتە قيىلماعاندا قازاق قوعامىنىڭ جاعدايىنا بايلانىستى ءا.بوكەيحان جاساعان تۇجىرىمعا، ءسوزسىز، ول داعى كەلەتىن ەدى. شوقاننىڭ زامانداس جاقىن دوسى گ.ءپوتانيننىڭ الاش قوزعالىسىنىڭ باسشىلارىمەن پىكىرلەس قانا ەمەس، ۇلت ماسەلەسىندە ولارمەن ءبىر ۇستانىمدا بولۋى وسى پىكىرگە نەگىز بولا الادى. سونىمەن، ءاليحان نۇرمۇحامەد ۇلى، ول باستاعان بۋىن ۇستانىمىنداعى بۇگىنگى قازاق قوعامى ءۇشىن ەڭ باستى قۇندىلىق دەپ نەنى ايتامىز؟ باسقاشا ايتقاندا، ءبۇگىنگى قازاق الاش دەپ ەزىلە ەسكە العاندا ونىڭ ساناسىندا نە تۇرادى؟ ول، ارينە، الاشتىق زيالىلاردىڭ قازاق قوعامىنا بايلانىستى رەفورماتورلىق ۇستانىمى، قازاق قوعامىندا زامان سۇرانىسىنا لايىق تۇبەگەيلى وزگەرىستەر جۇرگىزۋ ارەكەتى ەدى.
ياعني، حح عاسىردىڭ باسىنداعى الاشتىق، ۇلتتىق زيالىلار بۋىنى ۇلت تاريحىنداعى العاشقى رەفورماتورلار بۋىنى بولاتىن. ءحىح جانە حح عاسىرلاردا قازاق قوعامىن رەفورمالاۋعا (مودەرنيزاسيا) بايلانىستى ءوزارا قارسى كەلگەن ەكى ۇستانىمدى كورەءمىز. ءبىرى قازاق قوعامىنا بايلانىستى رەسەي بيلەۋشىلەرىنىڭ كوزقاراسىن ءبىلدىرۋشى م.م. سپەرانسكيي مەن پ.ا. ستولىپين ۇستانىمىنداعى رەفورمالار. بۇل باعىتتاعى كوزدەگەن ماقسات قازاق ەلى مەن جەرىنىڭ بارلىق مۇمكىندىكتەرى مەن رەسۋرستارىن ءوز مۇددەسىنە جاراتۋ، وسى جولدا قازاق حالقىن ورىستاندىرۋ ارقىلى وزىنە ءسىڭىرىپ الۋ بولدى.
رەسەي رەفورماتورلارى قازاق مەملەكەتتىلىگىن تۇپ-تامىرىمەن جويۋدى، مەملەكەتشىلدىك يدەياسىن قازاق ساناسىنان ءبىرجولا ىسىرىپ تاستاۋدى، قازاق جەرىن ءبىرجولا ورىس بيلىگىندە قالدىرۋدى كوزدەدى. ي.ستالين وكىمەتى تۇسىندا بۇل ساياسات ءوزىنىڭ شارىقتاۋ شەگىنە جەتتى. ءاليحان بوكەيحان باستاعان العاشقى ۇلتتىق زيالىلار بۋىنى رەسەيلىك وتارلاۋ ساياساتىنا شەكتەۋ قويۋ، قازاق جەرىنىڭ ءبۇتىندىگىن، قازاق ۇلتىنىڭ بىرەگەيلىگىن ساقتاۋ، وسى ماقساتتا ۇلتتىق مەملەكەتتىلىكتى جاڭعىرتۋ جولىن ۇسىنىپ ءبىلىم مەن عىلىمعا سۇيەنىپ اتالعان مۇددەلەرگە قول جەتكىزۋ ءۇشىن بەل بايلاپ، بىلەك ءتۇرىنىپ كۇرەسكە شىقتى.
ءاليحان بوكەيحانعا اللا تاعالام ەكى بىردەي قاسيەتتى، ياعني ءبىلىم مەن مىنەزدى مولىنان بەرگەن تۇلعا ەدى. پاتشالىق بيلىك تۇسىندا-اق ول بۇكىل قازاق جۇرتى مويىنداعان ساياسي قايراتكەر دارەجەسىنە كوتەرىلدى. ونىڭ حالىق اراسىنداعى بەدەلىن بايقاعان زامانداس اعاسى باقىتجان قاراتايەۆ ورالدان جازعان حاتىندا (30.ءىح.1910 ج): «سۇيىكتى ءاليحان! ...قازاقتا اۋىزبىرلىك جوق، بەت-بەتىمەن كەتكەن، وقىعاندارى بولسا ءوز جۇرتىن ءقادىر تۇتقانىمەن، باس قوسىپ پايدالى ءىس بىتىرۋگە قۇلىقسىز، ءبىر-بىرىنىڭ قىزمەتىنە قىزعانىشپەن قارايدى، ياعني ولار دا ءوزارا الاۋىز. قازاق اراسى ءدۇيىم ەلدىڭ ىقىلاسى مەن سەنىمىنە يە وقىعان ازاماتقا تاپشى. تەك سەن عانا، حالىقتىڭ ىقىلاسىنا بولەنگەن. تەك سەنىڭ عانا ەل ءۇشىن قىزمەت جاسادىم دەپ ايتۋعا حاقىڭ بار»، – دەپ جازدى.
سونىمەن، قوعام ءومىرىن رەفورمالاۋعا بايلانىستى ءاليحان نۇرمۇحامەد ۇلى جاساعان تۇجىرىمدارعا قىسقاشا توقتالىپ وتەيىك.
1-دەن، ءا.بوكەيحاننىڭ دالەلدى اتاپ كورسەتكەنىندەي «جەردىڭ كوپ-ازدىعىنا قاراماي، جەردىڭ ھاۋاسىنا قاراي ادام بالاسى مال باققان، يا ەگىن سالعان... قازاق جەرى مال كىندىگى، مۇندا بۇرىن قانداي جۇرت جۇرسە مال باققان. جەرىنىڭ ەرەكشەلىگىنە قاراي بەيىمدەلىپ، مال ءوسىرۋدى نەگىزگى كاسىبىنە اينالدىرعان جۇرت جالعىز قازاق ەمەس. اۆسترالياداعى اعىلشىن جۇرتى، شۆەيساريا ەلى دە وسى ءتيىمءدى مال شارۋاشىلىعىمەن اينالىسىپ وتىر». الەكەڭنىڭ پىكىرىنشە، مال باسىن اسىلداندىرىپ، ءتيىمدى مال شارۋاشىلىعىنا كوشۋ قازاققا دا جات ەمەس.
2-دەن، ءا.بوكەيحان الدىمەن پاتشالىق بيلىكتىڭ، كەيىنىرەك كەڭەستىك بيلىكتىڭ قازاق ەلىن ەشقانداي دا دايارلىقسىز تەز ارادا وتىرىقشى تۇرمىسقا اۋدارۋ جوباسىنا ۇزىلدى-كەسىلدى قارسى شىقتى. ەڭ الدىمەن، دەپ جازدى ول، قازاق «ءوز جەرىن قۇنتتاپ ۇستاپ» ونىڭ ءاستى-ۇستى بايلىعىن ءوز كادەسىنە جاراتا ءبىلۋدى ۇيرەنۋگە ءتيىس. ولاي بولماعان كۇندە ول جەردىڭ بەرەكەسى قولىنان ءىس كەلەتىن شەبەردىڭ قانجىعاسىندا كەتەدى. «ءوز جەرىنە ءوزى قىزمەت قىلماي، ىسكە جاراتپاي، جەر زاكون ارقىلى مەنىكى» دەگەندىك «اتادان قالعان كوپ قازىنانى باسقان جامان بالا سيپاتىندا ەمەس پە؟ بۇل اقىماق سورلى قايدا باراتىنى كارى-جاسقا ماعلۇم ەمەس پە؟». ءاليحان بوكەيحان سول مەزگىلدە-اق قازاق جەرىنىڭ كەڭ جانە باي ەكەنىن، بۇل جاعدايلاردىڭ ەلدىڭ يگىلىگىنە جاعىمدى اسەر ەتەتىنىن جاقسى تۇسىنگەن.
سونىمەن بىرگە، ول بولاشاقتا ءاربىر ۇلتتىڭ بايلىعى جەرىنىڭ كەڭدىگى جانە قازبا بەرەكەسىنىڭ مولدىعىمەن ولشەنبەيتىنىن، ەرتەڭ-اق ءبىلىم مەن وزىق تەحنولوگياعا يە جۇرتتىڭ العا شىعاتىنىن انىق بايقاعان. ول «جۇيرىكتىك – اقىلدا، ۇستالىق – جاھيدشىلىكتە» دەيدى. «مال باعىپ، مالىنىڭ ارتىنان ەرىپ كوشكەن قازاق سياقتى حالىق بايلىق، قازىنا مال كىندىگىندە دەپ بىلەدى. قازىناعا قۋات بەرەتىن ادام اقىلى، ادام قولى، ادام جاھيتى ەكەنىن بىلمەيدى». الەكەڭنىڭ تۇسىنىگىندە تەك زامان سۇرانىسىنا لايىق وزگەرۋ جولىندا تۇرعان حالىق قانا ەرتەڭىنە سەنىمدى.
وكىنىشكە قاراي، قايراتكەردىڭ بۇل ءپىكىرىنە ەكى بيلىك تە كوڭىل اۋدارعان جوق. كەز كەلگەن تەوريالىق ۇستانىمداردىڭ دۇرىس نەمەسە قاتە ەكەندىگىنىڭ جالعىز ءولشەمى – پراكتيكا. ءاليحان بوكەيحان مەن ونىڭ سەرىكتەرىنىڭ ساياسي كۇرەسىنىڭ قازاق مۇددەسىنەن الشاق ەمەسىن كوپ ۇزاماي-اق سوۆەتتىك شىندىقتىڭ ءوزى-اق كورسەتىپ بەردى. ي.ستالين ورناتقان ديكتاتۋرالىق رەجىمءنىڭ جۇرگىزگەن رەفورمالىق شارالارىنىڭ ناتيجەسىندە قازاق حالقى بۇرىن-سوڭدى بولماعان اشارشىلىقتى باسىنان كەشىردى، ءوزىنىڭ جارتىسىنا جۋىق بولىگىنەن ايىرىلدى. ستاليندىك بيلىك قازاقتىڭ ۇلتتىق ينتەلليگەنسياسى مەن ساياسي باسقارۋشى توبىنا، سونداي-اق ءدىن قىزمەتكەرلەرىنە قارسى پەرمانەنتتى جازالاۋ شارالارىن جۇرگىزىپ، العاشقى جانە كەلەسى بۋىن ساياسي ەليتانى، ىقپالدى ءدىن ادامدارىن الەۋمەتتىك جانە ساياسي كۇش رەتىندە جويدى.
قورىتا ايتقاندا، رەسەي يمپەرياسى كولەمىندە بولشيەۆيكتەر پارتياسى ورناتقان ديكتاتۋرالىق بيلىك جۇيەسى سىرتتان تاڭىلعان سوسياليستىك يدەيانىڭ رەسەيلىك نۇسقاسى قازاق حالقى ءۇشىن قيساپسىز مول ازاپ اكەلدى. ءبىزدى بۇگىن ءاليحان نۇرمۇحامەد ۇلى باستاعان زيالىلار بۋىنىنىڭ كوزدەگەن ماقساتىنا نەگە جەتە المادى دەگەن ساۋال مازالايدى. بۇل ساۋالعا جاۋاپتى مىناداي ەكى جاعدايدان ىزدەگەن ءجون. بىرىنشىدەن، اششى بولسا دا تاريحي شىندىقتى مويىنداۋعا تۋرا كەلەدى، الاشتىق بۋىن كۇرەس الاڭىنا شىققاندا سوڭىنداعى ەلى ونى قولداۋعا دارمەنسىز ەدى. ۇيىمدىق تۇرعىدان دا، ماتەريالدىق تۇرعىدان دا قازاق حالقى ءوزىءنىڭ باستاۋشى توبىنا كومەك كورسەتۋگە دايار بولماي شىقتى.
ەكىنشىدەن، شامامەن 2008 جىلدىڭ باسىندا بىرىككەن ۇلتتار ۇيىمى اقش-تىڭ قارسىلىعىنا قاراماستان جەرگىلىكتى حالىقتاردىڭ قۇقى تۋرالى دەكلاراسيا قابىلدادى. قۇرامىندا رەكوردتىق سانداعى جەرگىلىكتى حالىقتارى بار رەسەي بۇل دەكلاراسياعا داۋىس بەرۋدەن باس تارتتى. الاش نەگە جەڭىلىس تاپتى دەگەن ساۋالعا، مىنە، وسى رەسەي ۇكىمەتىنىڭ ۇستانىمىنان جاۋاپ الۋعا بولادى. ۇشىنشىدەن، بارلىق ەلدە ۇلت زيالىلارى – ۇلتتىڭ بەلگىلى ءبىر تاريحي كەزەڭىندەگى ماقسات-مۇددەسىن انىقتاۋشى الەۋمەتتىك كۇش. وسى تۇرعىدان العاندا، ءبىز الاشتىق قايراتكەرلەردىڭ تاجىريبەسىنە تەرەڭىرەك ءۇڭىلىپ، ونى تالداۋدان وتكىزۋگە ءتيىستىمىز. ونىڭ كۇشتى جاقتارىمەن بىرگە، ءالسىز قىرلارىن دا وي ەلەگىنەن وتكىزۋ قاجەتتىلىك بولىپ تابىلادى.
سوۆەتتىك تاريحنامادا ءا. بوكەيحان باستاعان الاشتىق زيالىلار قازاق قوعامىنداعى تاپتىق جىكتەلۋدى مويىندامادى، ال شىن مانىندە قازاق بايلارى مەن بۋرجۋازياسىنىڭ مۇددەسىن جاقتادى دەگەن پىكىر قالىپتاسقان. مۇنداي تۇجىرىم، ارينە، شىندىقتان ءمۇلدەم الىس-تىن. الاش زيالىلارى، ولاردىڭ، اسىرەسە، باستاۋشى توبى بايلار تابىنان شىققاندارعا جاتپايدى، سونداي-اق بايلار ۇستانىمىنان الىس تۇرعان تۇلعالار بولاتىن. ۇلت زيالىلارىنىڭ ماقساتتى قىزمەتىن قازاق بايلارى نەمەسە قازاق بۋرجۋازياسى قارجىلاندىردى دەپ تۇجىرىم جاساۋعا ەشقانداي دا فاكتىلىك نەگىز جوق. «قازاق» گازەتى باسىم تۇردە ونى جازىپ الۋشىلاردىڭ قارجىسى ارقىلى جارىق كوردى.
ۇلت-ازاتتىق قوزعالىستى قارجىلاندىرۋ ءىسىن قولعا العان قازاق بۋرجۋازياسى بولعان ەمەس. ونداي تاپتىڭ قالىپتاسۋىنا نەگىز بولاتىنداي قازاق قوعامىندا ەكونوميكالىق العىشارتتار دا قالىپتاسا قويعان جوق-تىن. وسى ارادا مىناداي جاعدايعا دا كوڭىل اۋدارعان ءجون. ازاتتىق قوزعالىس باسشىلارىنىڭ قىزمەتى قازاق قوعامى تاراپىنان، ونىڭ اۋقاتتى بولىگى تاراپىنان تولىق تۇسىنىستىك تاپتى دەگەن تۇجىرىمعا كەلسەك، تىم اسىرا ايتقاندىق بولار ەدى. حح عاسىردىڭ العاشقى شيرەگىندەگى قازاق قوعامى ءبىر اۋىزدان ورتاق مۇددە توڭىرەگىنە ۇيىسىپ، شەشۋشى ساتتە جۇدىرىقتاي جۇمىلىپ قايرات-جىگەر كورسەتە الاتىنداي دەڭگەيدە ەمەس-تىن. از عانا ۇلت زيالىلارىنىڭ قىزمەتىن دە كورە الماي، كۇندەگەندەر دە جەتىپ ارتىلاتىن.
سول سياقتى، سوۆەتتىك تاريحنامانىڭ ازامات سوعىسى جىلدارى الاشتىق زيالىلار، الاشوردا رەسەيلىك كادەتتەر پارتياسىمەن، نەمەسە اق گۆاردياشىلارمەن، نەمەسە اتتى كازاكتارىمەن وداقتاسىپ كەتتى، سول ارقىلى ءوزىنىڭ بيلەۋشى تاپتار ۇستانىمىنا جاقىندىعىن كورسەتتى دەگەن تۇجىرىمى دا ەشقانداي نەگىزى جوق بايلام بولاتىن. الاش زيالىلارىنىڭ كوزدەگەنى كىممەن بولسا دا وداققا كەلىپ، تۇپكى ماقساتى – ۇلتتىڭ ەركىن دامۋ مۇمكىندىگىنە قول جەتكىزۋ بولدى. 20-30-شى جىلدارداعى سوت پروسەستەرىنىڭ بارىسىندا الاشوردالىقتار وسى قازاق قوعامىنداعى تاپتىق جىكتەلۋگە بايلانىستى دا ءوز پىكىرلەرىن اشىق بىلدىرگەن.
ماسەلەن، ە.وماروۆ 1927 جىلى 20 قازاندا تەرگەۋ كەزىندە بەرگەن جاۋابىندا «الاشوردا، ونىڭ قاتارىندا مەن دە بارمىن، قازاق حالقىنىڭ تاپتىق جىكتەلۋىنە قارسى بولدى. قازاق حالقىنىڭ باسىم بولىگى بايلاردىڭ تولىق ىقپالىندا، سوعان بايلانىستى ونىڭ بايلارمەن كۇرەسكە شىعۋى مۇمكىن ەمەس دەپ سانادى. كەدەي بايدىڭ ىقپالىندا، بايدىڭ قاناۋىندا دەپ دالەلدەۋ مۇمكىن ەمەس. كەدەي ءوز بايىن جارىلقاۋشىسى سانادى.
الاشورداعا قازاق حالقىن كەدەي جانە باي دەپ ءبولۋ ءتيىمدى دە ەمەس-تىن، ويتكەنى كەدەيلەر قوعامنىڭ باسىم بولىگى بولعاندىقتان ولاردى وزىنە قارسى قويىپ الۋى مۇمكىن ەدى. الاشوردا بولسا الدىنا جالپى قازاق ۇلتىن ازات ەتۋ مىندەتىن قويدى». قورىتا ايتقاندا، سوۆەت وكىمەتى مەن الاشوردا اراسىنداعى بىتىسپەس قايشىلىق وسى تاپتىق جىكتەلۋ ماسەلەسىندە اشىق تا انىق كورىنىس تاپتى، سوۆەت ۇكىمەتىنە اسىرەسە، باستاپقى كەزەڭدە قازاق سياقتى حالىقتى تاپتىق نەگىزدە جىكتەۋ، ءبولىپ-جارۋ يمپەريانىڭ تۇتاستىعىن ساقتاۋدىڭ باستى قۇرالدارىنىڭ بىرىنە اينالدى.
ءوز رەتىندە الاشوردا ۇلتتىق جانە مەملەكەتتىك ەركىندىككە ۇلتتىڭ ساياسي تۇتاستىعى مەن بىرلىگى ارقىلى عانا جەتۋگە بولادى، ال ازاتتىق ءۇشىن كۇرەس كەزەڭىندە ۇلتقا تاپتىق نەگىزدە جىكتەلۋ ءوزىن-وزى جەڭىلىس جولىنا شىعارۋمەن تەڭ دەگەن ۇستانىمدا بولدى. سوۆەتتىك تاريحنامانىڭ الدىندا ءبىر-اق مىندەت تۇردى. ول سوۆەتتىك بيلىكتىڭ عانا زاڭدى، ءارى جەرگىلىكتى حالىق ءۇشىن ءتيىمدى بيلىك جۇيەسى ەكەندىگىن جان-جاقتى نەگىزدەۋ بولدى. ال سوۆەتتىك جانە باسقا وزدەرىن بۇكىلرەسەيلىك بيلىك ورىندارى رەتىندە جاريا ەتكەن قۇرىلىمداردىڭ قازاق قوعامىنا بايلانىستى قۇقىقتىق نەگىزىنىڭ السىزدىگىنە نازار اۋدارىلمادى.
شىن مانىندە بۇل قۇرىلىمدار قالىپتاسۋ ادىستەرى مەن ساياسي-قۇقىقتىق نەگىزى تۇرعىسىنان سىرتتان، يمپەريالىق وكتەمدىك ارقىلى بەلگىلەگەن باسقارۋ ورگاندارى بولاتىن. ولاردىڭ قۇقىقتىق وكىلدىگىن انىقتاۋ جانە بەلگىلەۋ ىسىنە جەرگىلىكتى حالىقتىڭ ەشقانداي قاتىسى بولعان ەمەس. ريەۆوليۋسيالىق وزگەرىستەر جاعدايىندا قازاق قوعامى ءۇشىن ۋاقىتشا وكىمەت پەن سوۆەت وكىمەتىنەن باسقا جاقىن تۇرعان جانە تۇسىنىكتى بيلىك ورنى، ارينە، الاشوردا ۇكىمەتى بولاتىن. سونداي-اق، الاشوردا ۇكىمەتى قالاي بولعاندا دا ۇلت تاريحىنىڭ كۇردەلى كەزەڭىندە قازاق جەرىنىڭ بارلىق ءوڭىءرىنەن 80-نەن استام ارنايى شاقىرىلعان ۇلت وكىلدەرى تاراپىنان جابىق سايلاۋ ارقىلى سايلانعان، ياعني قازاق قوعامى ءۇشىن لەگيتيمدى بيلىك ەدى. كەزىندە كەڭەستىك تاريحناما 1917 جىلى 5-13 جەلتوقسان كۇندەرى ورىنبور قالاسىندا بولىپ وتكەن جالپىقازاق سەزىن «قوعامنىڭ جوعارعى باي فەودالدارىنىڭ جانە حالىق مۇددەسىنە قارسى «الاش» پارتياسىنىڭ وكىلدەرى» جيىنى رەتىندە اتاپ، ال سەزدىڭ الاش اۆتونومياسى مەن الاشوردا ۇكىمەتىن قۇرۋ تۋرالى شەشىمىن ەشقانداي نەگىزسىز، كونترريەۆوليۋسيالىق ارەكەت ەسەبىندە باعالادى. مۇنداي تۇجىرىم، ارينە، تاريحي اقيقاتتى بۇرمالاۋشىلىقتاردىڭ ءبىرى-تىن. وسى رەتتە جەلتوقسانداعى جالپىقازاق سەزىنە قاتىناسقان وكىلدەرگە بايلانىستى مىناداي جاعدايعا كوڭىل اۋدارعان پارىز دەپ بىلەمىز.
بۇكىل رەسەي يمپەرياسىن شارلاعان بەرەكەسىزدىك جاعدايىندا ءا.بوكەيحان باستاعان توپتىڭ بۇل سەزدى ۇيىمداستىرۋ ارەكەتى زور جاۋاپكەرشىلىكتى ءوز مويىندارىنا العان ناعىز وتانشىلدىق ۇستانىمنىڭ ۇلگىسى ەدى. اعا ۇرپاقتىڭ بۇل قىزمەتىن كەيىنگى بۋىندار وسى تۇرعىدان قابىلداعانى ءجون. قۇرامىندا ءا.بوكەيحان، ا.بايتۇرسىن ۇلى، م.دۋلات ۇلى، ساعىندىق دوسجان ۇلى جانە ەلدەس ومار ۇلى بار توپ «قازاق» گازەتى ارقىلى قازاق جانە قىرعىز حالىقتارىنا ارنايى ۇندەۋ جولداپ، ەلدە قالىپتاسقان ساياسي جاعدايدى تالقىلاۋ ماقساتىندا وتكىزىلمەك جالپىقازاق سەزىنە ەل ىشىندەگى وسى ماسەلەگە ىقىلاستى تۇلعالارعا شاقىرۋ جولدادى. ارنايى شاقىرۋ ەل ىشىندەگى بەدەلدى جانە بەلگىلى دەگەن ادامدارعا جىبەرىلدى، سونداي-اق وعان قاتىناسۋعا ىنتالى كىسىلەرگە دە ەشقانداي شەكتەۋ قويىلعان جوق.
مەنىڭ تۇسىنىگىمدە، بۇگىن ءاليحان نۇرمۇحامەدۇلى ماقتاۋعا، ماداقتاۋعا مۇقتاج ەمەس. الەكەڭ كوزىنىڭ تىرىسىندە-اق ەلىنەن ماقتاۋ، ماداق ەستىگەن. ۇلتتىڭ ساناۋلى جاقسىلارى مەن ۇلكەندەرى ونىڭ سوزىنە قۇلاق اسقان، جاستارى سەنىپ، سوڭىنا ەرگەن. ولار، ارينە، كوپ ەمەس-تىن، دەگەنمەن بار-تىن. بارلىق ۇلىلاردىڭ رۋحىنداي، الەكەڭنىڭ رۋحى ءبىز ءۇشىن وياۋ، ونىڭ ويىن ءبىر-اق نارسە مازالايدى، ول – قازاق اتالاتىن ەلىنىڭ بۇگىنى مەن ەرتەڭى، بولاشاعى. الەكەڭنىڭ ومىرلىك دوسى، ءارى سەنىمدى ءىنىسى احاڭ، احمەت بايتۇرسىن ۇلىنىڭ ءسوزى بار: «جول ۇزاق، عۇمىر قىسقا، وسى از عۇمىردا ەلگە قىزمەت جاسايىق» – دەگەن. بۇل ويدى الەكەڭ دە، ونىڭ ۇستانىمىن قابىلداپ سوڭىنا ەرگەن ۇلت ازاماتتارى مەن جاستارى دا ءوز ۇرانىنا اينالدىردى. مەملەكەتتىك تاۋەلسىزدىك ەلىمىزگە جاڭا مۇمكىندىكتەر الا كەلدى. قوعام وزگەرۋ جانە دامۋ جولىنا ءتۇستى. الاش قايراتكەرلەرىنىڭ مۇراسىمەن ەمىن-ەركىن تانىسۋ مۇمكىندىگىنە يە بولعان حالىقتىڭ وندا قازاق ومىرىنەن تۋىنداعان جانە ونىڭ تۇپكىلىكتى سۇرانىستارىنا جاۋاپ بەرە الاتىن يدەيا جانە ۇستانىمدار بار ەكەندىگىنە كوزى جەتتى. قورىتا ايتقاندا، ءبىزدىڭ قوعام بۇگىن الەكەڭ باستاعان الاش يدەياسىنىڭ قايتا جاڭعىرۋ كەزەڭىن باسىنان كەشىرۋدە. ال ونىڭ جەمىستى بولاتىنىنا نەگىز جەتكىلىكتى.
مامبەت قويگەلدى، تاريحشى-عالىم
دەرەككوز: egemen.kz
كوبىرەك وقۋ
سوڭعى جاڭالىقتار