مەملەكەت قارجىسىنا تۇسىرىلگەن فيلمدەر حالىق سۇرانىسىنا يە ەمەس. بۇل تۋرالى ءماجىلىس دەپۋتاتى داۋلەت مۇقايەۆ مادەنيەت جانە اقپارات ءمينيسترى ايدا بالايەۆاعا وتاندىق كينويندۋستريا ماسەلەسى بويىنشا جولداعان دەپۋتاتتىق ساۋالىندا ايتتى، دەپ حابارلايدى alash.kz.

ونىڭ ايتۋىنشا، كينو تۇسىرگىسى كەلگەندەر كوبەيگەنىمەن، ولاردىڭ دەنى ءوز قاراجاتىنا ءتۇسىرىپ جاتىر.

«مەملەكەت تاراپىنان بولىنگەن قارجىنىڭ كوبى ءوز ارالارىندا قالىپ جاتقانداي كورىنەدى. ويتكەنى ۇلتتىق كينونى قولداۋ ورتالىعىنىڭ فيلمدەرى نە سۇرانىسقا، نە حالىق تاراپىنان قولداۋعا يە ەمەس. ءتىپتى حالىق قازىناسىنداعى قارجىنى ميللياردتاپ قۇمعا قۇيىپ جاتقاندايمىز»، – دەدى ول.

دەپۋتات ءوزىن-وزى اقتاماعان ءبىرقاتار فيلمدەردى ءتىزدى. ول مەملەكەت تاراپىنان بولىنگەن قاراجاتقا تۇسىرىلگەن فيلمدەردى دە حالىقتىڭ كورىپ، قۋانىپ جاتقانى شامالى ەكەنىن اتاپ ءوتتى.

«مىسالى، 2019-2023 جىلدار ارالىعىندا وتاندىق ءجۇز فيلمگە شامامەن 23 ميلليارد تەڭگە بولىنگەن. ەڭ قىزىعى، ونىڭ بارلىعى 100% يگەرىلگەن، ەسەبى تاپسىرىلىپ، كينو تۇسىرىلگەن. Atlas Entertainment كومپانياسى تۇسىرگەن «ۆرەميا پاتريوتوۆ» فيلمىنە 1 ميلليارد قارجى جۇمسالسا، ونىڭ كاسسالىق جيناعى نەبارى 10 ميلليون تەڭگە بۇل جۇمسالعان سوممانىڭ 1%-ى عانا. سونداي-اق Sataifilm تۇسىرگەن «بوكسشى» فيلمىنە 900 ميلليون تەڭگە جۇمسالسا، كاسسالىق جيناعى نەبارى 25 ميلليون تەڭگە. كينو وتە ساپاسىز ءارى كورەرمەندەرگە اسەر سىيلاي المادى. سونداي-اق Medetfilm تۇسىرگەن «لەتو 41-گو» وتاندىق كينوسىنا 700 ميلليون تەڭگە بولىنسە، ونىڭ 2 ميلليونى عانا قايتارىلعان. بۇل كەتكەن سوممادان 350 ەسە از. ال «جيزن» فيلمىنە 500 ميلليون تەڭگە كەتسە، ءنابارى 650 مىڭ تەڭگەسى قايتقان. مىسالى، ورتا ەسەپپەن كينوتەاترداعى كينولاردىڭ باعاسى 2 مىڭ تەڭگەنى قۇراسا، وندا بۇل ءفيلمدى 325 ادام كورىپتى-مىس»، – دەدى ول.

سونداي-اق ول كينو وندىرۋشىلەرگە قاتىستى پروبلەمالاردى اشىپ ايتتى.

«وتاندىق كينو ءوندىرۋشى ۇيىمداردىڭ كينوتەاترلاردا فيلمدەردى كورسەتۋىندە دە وزىندىك پروبلەمالارى بار. ول جارنامانىڭ السىزدىگى، وعان ارنايى قاراجاتتىڭ قاراستىرىلماۋى. قانشاما مەملەكەت قاراجاتىنا تۇسىرىلگەن فيلمدەر شاڭ باسقان ارحيۆتەردە جاتىر»، – دەدى داۋلەت مۇقايەۆ.

ونىڭ ايتۋىنشا، تاۋەلسىزدىكتەن بەرى مەملەكەت قاراجىسىنا 600 فيلم تۇسىرىلسە، سونىڭ ىشىندە ءوزىن-وزى اقتاعانى بىرەۋ عانا، ول «دوس-مۇقاسان» ءفيلمى. دەپۋتات مادەنيەت جانە اقپارات ءمينيسترى ايدا بالايەۆاعا ساۋالىندا مەملەكتتىك كينونى قولداۋ مەحانيزمىن جان-جاقتى جەتىلدىرۋدى ۇسىندى.

ەسكە سالايىق، بۇعان دەيىن بەلگىلى پروديۋسەر، شوۋمەن نۇرلان قويانبايەۆ كەيبىر رەجيسسەردىڭ كينو تۇسىرۋىنە ۇكىمەتتەن قاراجات بولىنۋىنە قارسى ەكەنىن ايتقان ەدى. ونىڭ ايتۋىنشا، كەيبىر رەجيسسەر ۇكىمەتتەن قوماقتى قاراجات الىپ، «بيزنەس» جاساپ جاتىر.