Ol depýtattyq saýalyn premer-mınıstr Álıhan Smaıylovqa joldady.
«30 jyl táýelsizdigimiz kezinde Uly otan soǵysyna qatysqan qazaqstandyqtardyń taǵdyry týraly senimdi aqparatty alatyn ulttyq sıfrlyq platforma, ıaǵnı tolyq elektrondy derekqor áli kúnge deıin jasaqtalǵan joq. Maıdangerler týraly tarıhı jadyny saqtap qalý máselesi osy kúnge deıin ashyq kúıinde qalyp otyr.
Sarapshylardyń paıymdaýynsha, qazaqstandyqtardyń taǵdyryn izdeýshi urpaqtarynyń sany 2 mıllıon adamnan asady. Qazir Qazaqstan azamattary, tarıhshylary jáne gelogtary maıdangerlerdi izdeý úshin reseılik «Memorıal», «Památ naroda» sıaqty elektrondy derekqorlardy paıdalanady. Biraq bulardyń ishinen naqty qazaqstandyqtar týraly derekterdi tabý óte qıyn»,
- dedi Jańbyrshın.
Depýtat reseılik derekqordaǵy qujattar tek orys tilinde usynylǵanyn da aıtyp ótti.
«Ol jerde Qazaqstan respýblıkasynyń jergilikti qorǵanys departamentterinde saqtalǵan ofıserler men jaýyngerlerdiń bastapqy shaqyrý derekteri joq. Qujattar sıfrlanbaǵan»,
- dedi depýtat.
Onyń sózinshe, qolda bar qujattar da, Reseı muraǵatynda qujattar da tozyp jatyr.
Depýtat qaza bolǵandar týraly málimetterdi jınap, sıfrlandyrý máselesimen úkimettik emes uıymdardyń aınalysyp jatqanynan da toqtaldy. Onyń sózinshe, elimizde «Atamnyń amanaty» qoǵamdyq uıymynyń arqasynda 1 500 qazaqstandyq jaýyngerdiń jerlengen jeri, maıdandaǵy taǵdyry, jaýyngerlik joly anyqtalǵan.
«Umytylǵandarymyzdy jańǵyrtatyn, joǵaltyp alǵandarymyzdy izdeıtin ýaqyt keldi emes pe? Qazirgi jastarymyz ben jaýyngerlerimizdi otansúıgishtikke, tarıhymyzdy qurmetteýge baýlımyz deımiz. Nege úkimet osy mańyzdy máselemen júıeli túrde aınalyspaıdy? Nege jan-jaqty qoldaý kórsetpeıdi?»,
- dedi depýtat.
Májilis depýtaty úkimet basshysy Álıhan Smaıylovqa birneshe usynys aıtty:
- Jergilikti jerlerdegi barlyq memlekettik organdar men muraǵattarda saqtalǵan maıdangerlerdiń qujattaryn sıfrlandyryp, oǵan qajetti qarjy qarastyrý;
- Ǵylymı jumystardy kóp jyldyq tájirıbesi bar, júıeli jumystar atqaryp júrgen qoǵamdyq uıymdarǵa tapsyrý;
- Reseı muraǵattarynda qazaqstandyqtardyń derekterin sıfrlandyryp, Qazaqstanǵa jetkizýdi tez arada qolǵa alý.
«2025 jyly mıllıondaǵan adamdardyń ómirin qıǵan, taǵdyryn talqandaǵan ekinshi dúnıejúzilik soǵystyń aıaqtalǵanyna 80 jyl tolady. Qazaqstan jerinde urystar júrmese de, elimiz bul qasiretti soǵystan tys qalǵan joq. Áskerge 1 jarym mıllıondaı adam shaqyryldy, onyń 600 myńnan astamy urys dalasynda qaldy. Qanshama maıdanger múgedek bolyp oraldy. 271 myń adam iz-tússiz joǵalyp ketti. Maıdangerler men tyl eńbekshileriniń erligin artyndaǵy urpaǵy eshqashan umytpaýǵa tıis. Óıtkeni olar elimizdiń jarqyn bolashaǵy úshin urysta qan tókti, mańdaı terin tógip, eńbektendi»,
- dedi Jańbyrshın májilis otyrysynda.
