Tiri bolsam, qazaqqa qyzmet etpeı qoımaımyn!

Álıhan Bókeıhan

Jas dilmarlar baq synady

12 qazan 2022 56
Jyl boıy armandap, aı boıy alashapqyn bolyp, kúni boıy erekshe sıpatta ótken stýdentter arasyndaǵy İ respýblıkalyq "Dilmar" sheshendik óner baıqaýy Abaı atyndaǵy QazUPÝ-dyń qoldaýymen sátti, tabysty ótip, tarıh qoınaýyna ketti.



Elimizdiń 4 óńirindegi 8 ýnıversıtet pen 1 kolejden 16 stýdent qatysyp, 2 bólim 4 kezeń boıynsha sóz dodasyna tústi. Juptar arasynda ótken jekpe-jek túrindegi sheshendik saıys qatysýshylardyń kórkemdik deńgeıi men bilimin, oı ushqyrlyǵy men sózdik qoryn, til tazalyǵy men suraq qoıý qabiletin synnan ótkizdi. Qalǵan eki bólimde sheshendik sózder men tolǵaýlardy jatqa bilý, jumbaqtap, astarlap aıtylǵan oıdyń túıinin sheship, mánin túsiný deńgeıi anyqtaldy. Qazylar men qatysýshylar bal boıynsha jeńimpazdar belgili bolǵan soń ǵana habarlandy. Osylaısha hakim Abaıdyń: "kisige qarap sóz alma, sózine qarap kisini al" qaǵıdasyna saı barynsha ádil baǵa berildi. Baıqaý qorytyndysy mynadaı boldy:



Bas júldeni(150 000tg) Almaty memlekettik servıs jáne tehnologıa kolejiniń stýdenti Ramazan Nurlanuly jeńip aldy. Júldeli 1-orynǵa(100 000tg) ál-Farabı atyndaǵy QazUÝ-dyń 1-kýrs stýdenti Dáýletbek Dýman laıyq bolsa, 2-oryndardy İ.Jansúgirov atyndaǵy Jetisý ýnıversıtetiniń stýdenti Talshyn Talǵatqyzy(70 000tg) men M.Qozybaev atyndaǵy Soltústik Qazaqstan ýnıversıtetiniń stýdenti Qalıhanova Gúlaı qanjyǵalady.

3-oryn(50 000tg) ıegerleri Qazaq ulttyq Qyzdar pedagogıkalyq ýnıversıtetiniń 1-kýrs stýdentteri Ábdibek Nuraı, Nurlyjan Qaraqat jáne ál-Farabı atyndaǵy QazUÝ-dyń stýdenti Bolatbekov Baǵjan. 3 qatysýshyǵa arnaıy júlde(30 000) buıyrdy. Joba avtory - jýrnalıs, Abaı atyndaǵy RMMI-dyń muǵalimi Jarqyn Sálenuly.

"Dilmar" sheshendik óner úıirmesiniń bastamasymen júıeli jolǵa túsken respýblıkalyq baıqaý kórermennniń aıyzyn qandyrdy. Oǵan qajet 1 mıllıon teńgeni "Atamura" korporasıasy demeýshilikpen usyndy. Qonaqtar men qatysýshylarǵa belgili ánshi Nurjan Janpeıis án shyrqasa, aıtysker aqyn Altynbek Ibragım jyrdan shashý shashty. Stýdentter de óz ónerin kórsetti. "Dilmar" músheleri demeýshi bolǵan ult janashyry Raqymǵalı Abrarulyna syılyq jasady. Ýnıversıtet rektory atynan alǵys hat tabystaldy. Osylaısha ulttyq rýhanı muramyzdyń mereıi ústem bolyp, joǵarǵy oqý oryndarynan sheshendik óner úıirmeleri qurylyp, saıystar ótetin boldy. Saıysty kórýge respýblıkalyq Abaı mektebiniń muǵalimderi men oqýshylary da arnaıy keldi. Abaı ýnıversıteti men Abaı mektebiniń baılany odan saıyn arta túspek.

"Dilmar - aqparat".
Bul maqala týraly ne oılaısyz?