Ýkraına prezıdenti Vladımır Zelenskıı Reseı bıligi men azamattarynyń Ýkraına aýmaǵyndaǵy menshikterin kúshpen tárkileý týraly zańǵa qol qoıdy.
"Reseı Federasıasynyń Ýkraına men ýkraın halqyna qarsy agresıasyn" alǵa tartqan Kıev menshikteri tárkilengen azamattarǵa ótemaqy tólenbeıtinin aıtty.
Atalǵan qujatty Joǵarǵy rada 3 naýryzda maquldaǵan.
Zań Reseı úkimeti men solardyń menshigindegi kompanıalardyń aktıvterin tárkileýdi usynady.
Mundaı aktıvterdiń tizimin úkimet qurastyrady, keıin ol ulttyq qaýipsizdik jónindegi keńes pen Ýkraına qorǵanys mınıstrligine beriledi. Aktıvterdi tárkileý prezıdent jarlyǵymen júzege asyrylady.
24 aqpanda Reseı prezıdenti Vladımır Pýtın Ýkraınany "denasıfıkasıa jáne demılıtarızasıalaý" maqsatynda kórshi elge "arnaıy áskerı operasıa" bastaǵanyn habarlaǵan.
Reseı áskeri Ýkraına aýmaǵyna basyp kirgeli beri BUU-nyń Adam quqyqtary jónindegi joǵarǵy komısarynyń málimeti boıynsha, elde 516 beıbit turǵyn qaza bolǵan, 908 adam jaraqat alǵan.
Donesk oblysyndaǵy eń iri qala Marıýpol bir aptadan beri qorshaýda. 9 naýryzda Reseı áskeri qaladaǵy perzenthana ornalasqan balalar aýrýhanasyna áýeden kúshti soqqy berdi. Ýkraına bıliginiń aıtýynsha, atqylaý kezinde 3 adam qaza bolǵan, 17 adam jaraqattanǵan. Qalada bir aptadan beri jaryq, jylý jáne tamaq joq.
27 aqpanda Ýkraına BUU Halyqaralyq sotyna Reseı ústinen shaǵym túsirdi. Kıev Reseıdi jaýapqa tartýdy, atap aıtqanda Ýkraınaǵa soǵys ashýyn aqtap, "genosıd" uǵymyn burmalaǵany úshin sottaýdy suraǵan.
