Premer-mınıstr Oljas Bektenov ýtılızasıalyq alym baǵasy tómendemeıtinin aıtty, dep habarlaıdy Alash.kz Ulysmedia.kz saıtyna silteme jasap.
Senat depýtattary shetelden ákelingen kólikterdi bastapqy tirkeý jáne kádege jaratý tóleminiń (ýtılızasıalyq alym) mólsherlemesin tómendetý máselesin kótergen edi.
Olardyń aıtýynsha, kádege jaratý tóleminiń mólsherin 150 myń teńgege deıin tómendetip, 5 jyldan aspaıtyn avtomobılder úshin 0,25 aılyq eseptik kórsetkishine deıin eń tómengi bastapqy tirkeý qunyn engizgen durys bolady.
Depýtattarǵa bergen jaýabynda Úkimet basshysy Oljas Bektenov 2022 jyly kádege jaratý alymy 50% tómendetip, ákelingen kólik quraldaryn zańdastyrǵannan keıin eski mashınalar kóbeıip ketkenin habarlaıdy. 2016-2023 jyldar aralyǵynda Qazaqstanda 817 myń jańa jeńil kólik quraly, sondaı-aq paıdalanýda bolǵan 386 myń avtomobıl, onyń 300 myń birligi zańdastyrý sheńberinde (zańdastyrýdy esepke almaǵanda – 86 myń birlik) bastapqy tirkeýden ótken.
Úkimet basshysynyń málimetinshe, kádege jaratý alymynan túsken 180 mlrd teńge aqsha jeńil nesıe berý jáne lızıń arqyly avtomashınalardy, aýyl sharýashylyǵy tehnıkasy men avtobýstardy jańartýǵa bólingen. Budan basqa, Ekologıa jáne tabıǵı resýrstar mınıstrligi kádege jaratý alymy esebinen 2024-2026 jyldary ekologıalyq is-sharalarǵa 200 mlrd teńge baǵyttamaq.
«Avtomobıl jasaý sektory anaǵurlym mańyzdy ósý serpinin kórsetip otyr. Búkil óndiristiń 44,3 % ıe. Byltyr rekordtyq nátıjemen 149 myń avtomobıl shyǵaryldy. Bul avtomobılderdiń qunyna kádege jaratý tólemi kirmeıdi, al bastapqy tirkeý alymy nebári 923 (mln?)teńgeni quraıdy», - delingen jaýapta.
Bektenovtyń pikirinshe, bul shara óndirýshilerdegi tehnologıalyq operasıalardyń tereńdeýine áser etedi, sonymen qatar komponenttik bazanyń damýyn yntalandyrady.
«Joǵaryda atalǵan faktorlardy eskere otyryp, sondaı-aq ınvestısıalyq ahýaldy jaqsartý jáne avtoparkti jańartýdy yntalandyrý maqsatynda kádege jaratý tóleminiń mólsherin azaıtýdy jáne eń tómen bastapqy tirkeý qunyn engizýdi orynsyz dep sanaımyz», - deıdi Bektenov.
