Reseı Qazaqstannan 100 myń tonna benzın berýge daıyn turýdy surady. Sebebi soltústiktegi kórshide Ýkraınanyń ushqyshsyz ushaqtarynyń shabýyldarynan jáne munaı óńdeý zaýyttarynyń toqtap qalý qaýpinen janarmaı tapshylyǵy týyndaýy ǵajap emes. Buny "Reıter" agenttigi osy salamen etene tanys úsh derekkózge súıenip habarlady.
Derekkózderdiń biri Reseı úshin rezervterdi paıdalaný týraly kelisim jasalyp qoıǵanyn aıtqan. Alaıda, QR Energetıka mınıstriniń keńesshisi Shyńǵys İlıasov Reseı tarapynan mundaı suranys túspegenin málimdegen.
Reseı energetıka mınıstrligi bolsa, bul jaǵdaıǵa baılanysty ázirge túsinikteme bermeı otyr.
Al Belarýs qazirdiń ózinde Reseıge benzın jetkizýge kómektesýge kelisti.
Ushqyshsyz ushaqtardyń shabýyldary naýryz aıynyń aıaǵyndaǵy jaǵdaı boıynsha Reseıdiń munaı óńdeý qýattylyǵynyń shamamen 14 paıyzyn isten shyǵarypty. Degenmen, RF bıligi ishki janarmaı naryǵyndaǵy jaǵdaıdyń turaqty jáne qorlardyń jetkilikti ekenin habarlady.
Reseı ádette janarmaıdyń taza eksporttaýshysy jáne halyqaralyq naryqtarǵa iri jetkizýshi sanalady. Biraq onyń munaı óńdeý zaýyttarynyń isten shyǵýy Reseı munaı kompanıalaryn otyndy ımporttaýǵa májbúr etip otyr.
Máskeý 1 naýryzdan bastap janarmaı tapshylyǵynyń aldyn alý úshin alty aıǵa benzın eksportyna tyıym saldy. Degenmen bul tyıym Máskeý jetekshilik etetin Eýrazıalyq ekonomıkalyq odaqqa, sonyń ishinde Qazaqstanǵa, jáne de osy ıntegrasıalyq bloktan tys Mońǵolıa sıaqty elderge qatysty emes.
Degenmen, treıderler Reseıdegi jaǵdaı ýshyǵyp ketse, osynaý tyıymnyń aýqymy keńeıýi múmkin ekenin aıtady.
Ótken aptada Oraldaǵy Orsk munaı óńdeý zaýyty jappaı sý tasqyny saldarynan óndiristi toqtatty.
Álemdegi teńizge shyǵa almaıtyn eń úlken memleket - Qazaqstan da gýmanıtarlyq maqsattardy aıtpaǵanda, jyl sońyna deıin janarmaı eksportyna shekteý qoıyp otyr.
Aqparat kózderiniń málimetinshe, 5 sáýirdegi jaǵdaı boıynsha Qazaqstandaǵy Aı-92 benzıniniń qory 307,7 myń tonnany, Aı-95 markasynyń qory 58 myń tonnany, al dızeldik otyn qory 435 300 tonnany, avıakerosın qory 101 000 tonnany quraǵan.
