Qýandyq Bıshimbaevtyń advokattary istiń aq-qarasyn anyqtaýda reseılik mamandarǵa júginýdi jón sanady. Bıshimbaevtyń jaqtastary sottan N.I. Pırogov atyndaǵy Reseı ulttyq zertteý medısınalyq ýnıversıtetiniń reseılik mamandarynyń qorytyndysyn qaraýdy surady, dep habarlaıdy Alash.KZ ulttyq portaly.
Advokattar sot barysynda Reseıden Zoom nemese WhatsApp arqyly sarapshylardyń málimetterin alýdy surady.
"Mamandardyń qorytyndysy Bıshimbaevtyń kinásizdigin rastaıtyn jáne usynylǵan kúdikti joqqa shyǵaratyn dálel bolyp tabylady", - dedi advokat Nazken Qusaıynova.
Sýdıa Aıjan Kólbaeva bul ótinishti qanaǵattandyrdy. Advokattyń aıtýynsha, qorytyndy 119 bette jazylǵan.
Eske salaıyq, 9 qarashada BAQ pen Telegram-arnalar burynǵy ulttyq ekonomıka mınıstri Qýandyq Bıshimbaev Astanada áıelin uryp óltirdi degen kúdikke ilinip, ustalǵanyn habarlady.
Astana qalasy polısıa departamenti 9 qarashada elordadaǵy meıramhana qonaqtarynyń arasynda janjal shyǵyp, saldarynan bir áıeldiń qaza tapqanyn rastady.
Elordalyq PD kúdikti qamaýǵa alynyp, tergeý amaldary júrgizilip jatqanyn málimdedi. Qýandyq Bıshimbaevtiń ustalǵanyn 10 qarashada İshki ister mınıstriniń orynbasary Serik Sársenov rastady. 12 qarashada Qýandyq Bıshimbaev eki aıǵa qamaýǵa alyndy.
Budan bólek Bıshimbaevtyń áıeli qaıtys bolǵan "Gastro-ortalyǵynyń" dırektory da qamaýǵa alyndy. Astana qalalyq PD Bıshimbaevtiń isi İshki ister mınıstrligi basshylyǵynyń baqylaýynda ekenin málimdedi. Prezıdent Qasym-Jomart Toqaev İshki ister mınıstrligine rezonans týdyrǵan bul oqıǵany erekshe baqylaýǵa alýdy tapsyrdy.
10 sáýirde ótken sotta sýdıa Aıjan Kólbaeva BAQ pen áleýmettik jelige 9 sáýirde alqa bılerdiń sýreti tarap ketkenin málimdedi. Ol bulaı bolmaıtyny BAQ ókilderine eskertilgenin, sol úshin tıisti tekserý jumystary júrgiziletinin habarlady. Tekserý jumysynyń qorytyndysy shyqqansha sot zalyna jýrnalıserdi kirgizbeý jóninde sheshim qabyldady.
Aldyn ala tyńdaýdan keıingi sottarǵa jýrnalıser kirýge múmkindik aldy. Sot barysy Qazaqstan Respýblıkasynyń Joǵarǵy sotynyń resmı saıtynan tikeleı efırden kórsetiledi.
