Tiri bolsam, qazaqqa qyzmet etpeı qoımaımyn!

Álıhan Bókeıhan

1 013 bas mal ólgen. Sý tasqynynan qyrylǵan malǵa ótemaqy qalaı tólenedi?

08 sáýir 2024 309

Elimizdiń sý basqan aımaqtarynda 1 013 bas mal, sonyń ishinde 133 iri qara jáne 809 bas usaq mal ólekseleri órtelip, joıyldy. Bul týraly Aýyl sharýashylyǵy mınıstrliginiń resmı ókili Oljas Tlebaldın málim etti.

"Sý basqan óńirlerde 60 myńnan astam mal qaýipsiz jerge kóshirildi. Atap aıtqanda, Aqmola oblysynda 18,8 myń bas, Qostanaı oblysy 12,9 myń bas, Aqtóbe jáne Atyraý oblysynda 10 myń bastan joǵary, BQO-da 4,5 myń bas jáne Qaraǵandy oblysynda 1,5 myń bas mal men úı janýarlary qutqaryldy. Jedel aqparatqa sáıkes, sý tasqyny saldarynan respýblıkanyń 7 óńirinde 5 711 bas mal óldi, onyń ishinde 1 137 iri qara jáne 4 051 usaq mal bar", – dedi ol.

Búginde shyǵyn bolǵan mal (úı janýarlary) ólikselerin jınaý jáne joıý jumystary jalǵasyp jatyr.

"Ol úshin 90 birlik tehnıka men qyzmetkerler shtaty jáne ólekselerdi joıý sharalary úshin qajetti dızenfeksıalyq zattar qarastyrylǵan. Búgingi tańda 1 013 bas mal, sonyń ishinde 133 iri qara jáne 809 bas usaq mal óleksesi órtelip, joıyldy", – deıdi resmı ókil.

Aıta keteıik, Aýyl sharýashylyǵy mınıstri, vıse-mınıstrler jáne veterınarıalyq baqylaý jáne qadaǵalaý komıtetiniń basshysy sý basqan aımaqtardy aralap júr.

"Mal ıelerine ótemaqy tóleýge qatysty sáıkes algorıtm ázirlendi, halyqqa jáne zalal anyqtaý jónindegi komısıanyń nazaryna jetkiziledi. Jalpy, sý tasqynynyń aldyn alý jáne joıý máseleleri, sondaı-aq óńirlerdegi epızootıalyq jaǵdaı mınıstrliktiń turaqty baqylaýynda", – dedi Oljas Tlebaldın.

Bul maqala týraly ne oılaısyz?