Dúısenbide BUU-nyń Adam quqyqtary jónindegi joǵarǵy komısary Mıshel Bachelet Reseı Ýkraınaǵa basyp kirgen bes kún ishinde kemi 102 beıbit adam qaza bolǵanyn, onyń jeteýi bala ekenin málimdedi jáne ólgen adamdar sany munan da kóp bolýy múmkin ekenin eskertti.
"Beıbit adamdardyń kóbi aýyr artılerıa men reaktıvti atys qarýlary oǵynyń úlken jarylysynan jáne áýeden atylǵan snarád jarylysynan ólgen" dedi ol.
Bachelet Ýkraınanyń mıllıondaǵan adamy qaýip-qaterden qashyp, metro men jertólede bas saýǵalaýǵa májbúr bolyp otyrǵanyn aıtty.
Onyń sózinshe, BUU Bosqyndar isi jónindegi agenttigi Ýkraınadan 368 myń adamnyń bosqyn retinde shyǵyp ketkenin, Ýkraına ishinde bosyp júrgender de kóp ekenin eseptep otyr.
Bachalettiń sózi BUU Adam quqyǵy jónindegi keńesiniń jyl saıynǵy negizgi sesıasy bastalar qarsańda aıtyldy. Sesıa Ýkraınadaǵy urys qımyldary boıynsha jedel pikir almasý jóninde daýys berýden bastaldy.
Pikir almasýdy talap etken Ýkraına osy sesıada Máskeýdiń Ýkraınaǵa qarsy áreketin tergeýge shaqyratyn rezolúsıa usynýy múmkin. Reseı Ýkraınanyń pikir almasý jónindegi ótinishin daýysqa salýǵa qarsy shyqty, biraq keńestiń 47 múshesiniń kópshilik daýysymen Kıevtiń ótinishi qoldaý tapty.
BUU-nyń Jenevadaǵy bóliminiń ókili Evgenıa Fılıpenko Reseıdiń áreketin halyqaralyq qaýymdastyqqa shabýyl dep baǵalady. "Bul tek Ýkraınaǵa jasalǵan shaýyl emes, bul – BUU-nyń árbir múshesine, osy uıym qorǵaıtyn ustanymdarǵa shabýyl" dedi ol.
Onyń sózinshe, shabýyl bastalǵaly bes kún ishinde 350-den astam adam óltirilgen. Onyń 16-sy balalar.
26 aqpanda Ýkraınanyń densaýlyq saqtaý mınıstri Vıktor Láshko Reseı shabýylynan 198 adam ólip, myńnan asam adam jaralandy dep málimdegen. Reseı soǵys qurbandaryn aıtpaı otyr. Reseıdiń qorǵanys mınıstrligi áskerıler arasynda ólgender bar ekenin moıyndady.
