Májilis depýtaty Dáýlet Turlyhanovtyń ulyna qatysty is boıynsha úkim ózgerdi, - dep habarlaıdy alash.kz.
Nurasyl Bolatqa qatysty qylmystyq is Joǵarǵy sotta qaraldy. 2023 jyldyń qazan aıynda Almaty garnızony Áskerı sotynyń úkimimen Nurasyl Bolat erli-zaıypty O.Chernov pen A.Chernovanyń densaýlyǵyna qasaqana aýyrlyǵy ortasha zıan keltirgeni úshin Qylmystyq kodekstiń 107-baby 2-bóligi 1), 5) tarmaqtary boıynsha sottalǵan bolatyn.
Sot úkimimen 500 AEK (1 725 000 teńge) kóleminde aıyppul túrinde jaza taǵaıyndaldy. Sondaı-aq, jábirlenýshilerdiń paıdasyna 500 myń teńge moraldyq shyǵyn jáne ókildiń qyzmetine ótemaqy tóleýge ketken 1 600 000 teńge óndirildi.
Apelásıalyq saty sot úkimin ózgertip, Nurasyn Bolattan jábirlenýshilerdiń paıdasyna apelásıalyq satydaǵy sotqa qatysý úshin ókildiń qyzmetine 400 000 teńge kóleminde shyǵyn óndirildi dep jazdy "DalaNevs".
Kasasıalyq sot otyrysy jábirlenýshilerdiń ótinishhaty boıynsha ótti, olar sot aktilerin ózgertip, oǵan bas bostandyǵynan aıyrý jazasyn taǵaıyndaýdy surady.
"Qylmystyq isti qaraý nátıjeleri boıynsha Joǵarǵy sottyń qylmystyq ister jónindegi sot alqasy sot aktilerin ózgertip, N.Bolatqa 2 jylǵa bas bostandyǵyn shekteý jazasy taǵaıyndaldy, sondaı-aq, árqaısysyna 1 mıllıon teńgege deıin moraldyq zalaldyń ótemaqy mólsheri ósti", - dep jazylǵan málimette.
Buǵan deıin zańger Anna Chernova áleýmettik jelide depýtat Dáýlet Turlyhanovtyń ulyna qatysty úkim qaıta qaralatynyn málimdedi. Ol Májilis depýtaty ári tanymal qazaq balýany Dáýlet Turlyhanovtyń ulynan soqqy jegen bolatyn.
"Joǵarǵy sotta Májilis depýtaty Dáýlet Turlyhanovtyń ulyna qatysty bizdiń is boıynsha áskerı sot úkimi qaıta qaralady. Áskerı sottyń úkimimen ol buzaqylyq nıetpen eki adamnyń densaýlyǵyna qasaqana ortasha zıan keltirgeni úshin 107-baptyń 2-bóligi 1),5) tarmaǵy boıynsha 500 AEK kóleminde jaza aldy. Úkim óte jeńil túrde taǵaıyndaldy. Áskerı bólimdi tastap ketkeni, berilgen antty buzǵany, qylmys jasalǵan sátte ishimdikke mas bolǵany úshin qaıtalap jazalaý túrindegi jazany aýyrlatatyn mán-jaılar esepke alynbaǵan.
...Bizdiń oqıǵamyzda ádildik ornaıtynyna úmittenemin! Bári áleýmettik jaǵdaıy men mártebesine qaramastan zań men sot aldynda teń!" - dedi ol.
Aıta keteıik, Almatyda áskerı qyzmetker belgili advokatty soqqyǵa jyqqan bolatyn. Bul oqıǵa byltyr 11 aqpanǵa qaraǵan túni Almatynyń saýda ortalyqtarynyń biriniń mańyndaǵy parkıngte boldy. İs halyq tarapynan qoǵamdyq daý týdyrdy. Bul oqıǵa týraly advokat Oleg Chernovtyń áıeli Anna Dımıtrıevıch Facebook paraqshasynda jazdy.
Almaty Polısıa departamenti sol kezde bul derek QR Qylmystyq kodeksiniń 293-baby "Buzaqylyq" boıynsha sotaldy tergeýdiń biryńǵaı tizilimine tirkelgenin habarlady.
Al keıin advokatty soqqyǵa jyqqan áskerı qyzmetker grek-rım kúresinen qazaqstandyq jáne burynǵy Keńes Odaǵynyń palýany Dáýlet Turlyhanovtyń uly bolyp shyqty. Bul aqparatty depýtat Turlyhanovtyń ózi rastaǵan bolatyn. Ol ulyna qatysty daýǵa kózqarasyn bildirip, keshirim surady.
