Qazaqstan Prezıdenti Qasym-Jomart Toqaev halyqqa úndeý joldady, dep habarlaıdy Alash.KZ ulttyq portaly.
Qazaqstan Prezıdenti óz sózinde tasqynnyń zardaptaryn joıý jumystaryna toqtaldy. Beıǵamdyq pen der ýaqytynda qajetti sharalardy qolǵa almaýdyń saldary ekenin aıtty:
Búgin men elimizdiń azamattaryna arnaıy úndeýimdi joldap otyrmyn. Barshańyzǵa belgili, qazir elimizde kúrdeli jaǵdaı qalyptasyp otyr. Qardyń kúrt erýine baılanysty aımaqtarda sý tasqyny bolyp jatyr. Bul – tabıǵı apat. Mundaı ahýal uzaq jyldan beri bolmaǵan. Bul kólemi jaǵynan sońǵy 80 jyldan bergi eń iri tabıǵı apat deýge bolady.
Sý tasqynyna baılanysty elimizdiń on aımaǵynda tótenshe jaǵdaı jarıalandy, ıaǵnı Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan jáne Ulytaý oblystarynda, - dedi el basshysy.
Sonymen qatar sý tasqynynan zardap shekken turǵyndarǵa ótemaqy tólenetindigin habarlady:
Meniń buıryǵymmen apatqa qarsy kúreske Qorǵanys mınıstrligi qosymsha áskerı kúshterin joldaıdy. Halyqqa kómektesý úshin Úkimetke memlekettik materıaldyq rezervti paıdalanýdy tapsyramyn. Sondaı-aq Úkimet shyǵyndardy óteýdiń tıimdi joldaryn shuǵyl qarastyrýǵa tıis. Ony zardap shekken azamattarǵa jan-jaqty túsindirý kerek. Beriletin ótemaqy shyǵyndy tolyq jabýy qajet.
Jaǵdaıy neǵurlym kúrdeli aımaqtardaǵy jumysty úılestirý úshin Úkimet basshysynyń orynbasarlaryna aımaqtarǵa shyǵýdy tapsyramyn. Olar ahýal túzelgenshe sol jerde bolady. Aqparattyq shtab azamattardy memleket qabyldap jatqan barlyq sharalar jóninde úzdiksiz jáne jan-jaqty habardar etip otyrýǵa tıis, - dedi prezıdent.
