Bıshımbaev sot otyrysynda Saltanat Núkenovanyń dárethanaǵa qamalyp alyp, barlyq baǵaly áshekeılerin sýǵa aǵyzǵanyn aıtty. Birneshe márte jerge qulap, oqystan, "jazym bolyp qaza tapqanyn" málimdedi, dep habarlaıdy Alash.KZ ulttyq portaly.
Bıshımbaev Saltanat Núkenovanyń birneshe márte qulap, basyn soǵyp, sonyń saldarynan qaza tapqanyn habarlady.
"Ol butyn sheshkisi keldi, Men ony qapsyra qushaqtap aldym. Aýyrlyǵynan yrqyma kónbedi. Julqynyp, meni ıterip jiberdi. Ózi qabyrǵaǵa soǵylyp, dárethanada basyn jardy. On sekýnd dárethana edeninde jatty. Biraq onyń kózi ashyq boldy, sodan keıin baıaý ornynan tura bastady. Men oǵan kómektespedim. Men dárethanada saǵattar men neke saqınasynyń sýǵa aǵyzylǵanyn kórdim. Men oǵan olardy al dep aıttym. Ol denesin kóterip, qaıtadan sulq ete túti.Tepe-teńdigin joǵaltyp, betimen plıtkaly edenge soǵyldy. Sodan keıin men oǵan kómektestim, ol qabyrǵaǵa súıenip, sodan soń otyrdy. Qansyraǵan túrin kórdim, - dedi Bıshimbaev.
Eske salaıyq, 9 qarashada BAQ pen Telegram-arnalar burynǵy ulttyq ekonomıka mınıstri Qýandyq Bıshimbaev Astanada áıelin uryp óltirdi degen kúdikpen ustalǵanyn habarlady.
Astana qalasy polısıa departamenti 9 qarashada elordadaǵy meıramhana qonaqtarynyń arasynda janjal shyǵyp, saldarynan bir áıeldiń qaza tapqanyn rastady.
Elordalyq PD kúdikti qamaýǵa alynyp, tergeý amaldary júrgizilip jatqanyn málimdedi. Qýandyq Bıshimbaevtiń ustalǵanyn 10 qarashada İshki ister mınıstriniń orynbasary Serik Sársenov rastady.
12 qarashada Qýandyq Bıshimbaev eki aıǵa qamaýǵa alyndy. Budan bólek Bıshimbaevtyń áıeli qaıtys bolǵan "Gastro-ortalyǵynyń" dırektory da qamaýǵa alyndy.
Astana qalalyq PD Bıshimbaevtiń isi İshki ister basshylyǵynyń baqylaýynda ekenin málimdedi.
Budan bólek prezıdent Qasym-Jomart Toqaev İshki ister mınıstrligine rezonans týdyrǵan bul oqıǵany erekshe baqylaýǵa alýdy tapsyrdy.
