Tiri bolsam, qazaqqa qyzmet etpeı qoımaımyn!

Álıhan Bókeıhan

88 mektep onlaın oqıdy

01 sáýir 2024 385

Oqý-aǵartý mınıstrligi elimizde 88 mektep tórtinshi toqsandy qashyqtan oqý formatynda bastap onlaın oqytady dep málimdedi.

Sý tasqyny qaýpi saqtalǵan aýmaqtardaǵy 56 mektepte jáne evakýasıalyq pýnkter retinde aıqyndalǵan 32 mektep qashyqtan oqıdy.

«Osy dúısenbiden bastap 3 mıllıonnan astam oqýshy úshin 2023-2024 oqý jylynyń tórtinshi toqsany bastalady. Bul rette sý tasyp jatqan óńirlerdegi oqýshylar qashyqtan oqýǵa kóshedi. Jergilikti jerlerde Oqý-aǵartý mınıstrliginiń aýmaqtyq bilim berý salasynda sapany qamtamasyz etý departamentteri men óńirlik bilim basqarmalary jumys istep jatyr. Evakýasıalyq pýnkterdegi balalarǵa qajet kómek berý úshin psıhologıalyq qyzmetter iske qosyldy. Balalar qashyqtan oqý úshin qajet oqý quraldarymen, kıim-keshekpen jáne tehnıkalyq quraldarmen qamtamasyz etildi. Evakýasıalanǵan 1-4-synyp oqýshylaryn tamaqtanýmen qamtý máselesi boıynsha jumys júrip jatyr», – dedi vedomstvonyń resmı ókili – baspasóz hatshysy Mereke Amangeldiqyzy.

Oqý-tárbıe prosesi memlekettik jalpyǵa birdeı bilim berý standarttaryna sáıkes uıymdastyrylady. Sondaı-aq qaýipti azaıtý jáne tótenshe jaǵdaıda bilim berý prosesin jalǵastyrý úshin Aqtóbe oblysyndaǵy kolejder qashyqtan oqytý formatyna aýystyryldy.

Aıta keteıik, «Qazaqstan halqyna» qory sý tasqynynan zardap shekken eldimekenderde úı salýǵa 5 mlrd teńge bóledi.

Qor maqsattarynyń biri – tótenshe jaǵdaı kezinde zardap shekken halyqqa kómektesý. Osyǵan oraı, qor jalpy somasy 5 mlrd teńgege sý tasqynynan zardap shekken úılerdiń qurylysyna qoldaý kórsetedi.

«Qaıyrymdylyq kómek jergilikti atqarýshy organdardyń obektıv tekserýi jáne aýyldyq jerdegi turǵyn úıdi tıisti saraptama uıymdary jaramsyz dep tanyǵan jaǵdaıda kórsetiledi. Rastaıtyn qujattar alynǵannan keıin qordyń ishinde sheshimdi bekitýdiń tıisti rásimderi júrgiziledi», – delingen habarlamada.

Qor 2022 jylǵy sáýir aıynda Batys Qazaqstan oblysynyń Qaratóbe aýdanyna qaıyrymdylyq kómek berý tájirıbesine súıenedi. Sóıtip qor sý tasqynynan zardap shekken aýyldarda sondaı 200 úı salýǵa bolady dep esepteıdi.

Aıta keteıik, Astanada sý tasqynynan zardap shekkenderge gýmanıtarlyq kómek jınaý bastalyp ketti.

Astananyń volonterlyq shtaby Batys Qazaqstan, Qostanaı, Aqmola oblystarynda sý tasqynynan zardap shekkenderge gýmanıtarlyq kómek jınaı bastady. Jumys volonterlyq jáne qaıyrymdylyq uıymdarymen birlesip atqarylady.

Aıta keteıik, Qostanaı oblysynda sý tasqyny qaıtalanýy múmkin.

«Qazgıdromet» málimeti boıynsha, 31 naýryzdan bastap Qostanaı oblysynda aýa temperatýrasy kúndiz +20 gradýsqa deıin kóteriledi. Aptanyń ortasynda túnde oblystyń soltústigi men shyǵysynda jańbyr túrinde jaýyn-shashyn bolady.

«Osyǵan baılanysty Qostanaı oblysynyń Tótenshe jaǵdaılar departamenti oblystyń ońtústik aımaqtarynda sý tasqyny qaıtalanýy múmkin dep boljap otyr. Oǵan qosa oblys ortalyǵy men soltústiginde kúrdeli sý tasqyny bolýy múmkin. Qarasý, Áýlıekól, Naýryzym, Qamysty, Sarykól, Altynsarın, Meńdiqara jáne Uzynkól aýdandaryna qaýip tónip tur», – delingen habarlamada.

Sondaı-aq Reseı Federasıasynan iri ózender boıymen sý kelýi múmkin. Sý aǵyny óte joǵary. Jitiqara, Denısov, Qostanaı, Qarabalyq, Fedorov aýdandary men Beıimbet Maılın aýdanyna qaýip tónip tur.  

Bul maqala týraly ne oılaısyz?