Toqaev jańa zańǵa qol qoıdy: qazaq tili men tarıhyn bilmeıtinder Qazaqstan azamattyǵyn ala almaıdy

Memleket basshysy “Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly” Qazaqstan Respýblıkasynyń Zańyna qol qoıdy.
⠀
 Zańda:
⠀
• qylmystyq-atqarý júıesi mekemelerindegi, tergeý ızolátorlaryndaǵy jáne ýaqytsha ustaý ızolátorlaryndaǵy beınebaqylaý júıelerin búldirgeni úshin qylmystyq jaýapkershilik belgilengen;
• Úkimet aıqyndaǵan óńirlerge qonys aýdaratyn adamdar úshin sharýa nemese fermer qojalyǵyna jer ýchaskelerin berý kózdelgen;
• qonys aýdarýshylarǵa jáne olardyń otbasy múshelerine memlekettik qoldaý retinde kóshýge sýbsıdıa, turǵyn úı jaldaý, komýnaldyq qyzmet tólemderiniń shyǵyndaryna ótemaqy, sondaı-aq ekonomıkalyq mobıldilik sertıfıkattary sekildi materıaldyq kómek kórsetý kózdelgen;
• Qazaqstan azamattyǵyn berýden jáne qalpyna keltirýden bas tartý úshin kámeletke tolmaǵandardyń jynystyq tıispeýshiligine qarsy qylmystar jasaý, qarapaıym deńgeıde memlekettik tildi bilmeý, Qazaqstan Konstıtýsıasynyń negizderinen, ǵylym jáne joǵary bilim salasyndaǵy ýákiletti organ aıqyndaıtyn deńgeıde tól tarıhymyzdan habardar bolmaý sekildi qosymsha negizder qarastyrylǵan;
• Qazaqstanda turaqty turýǵa ruqsat alý quqyǵyn beretin ınvestorlarǵa arnalǵan kóprettik vıza jáne suranysqa ıe kásip ıeleri úshin vıza engizilgen;
• ekstremıstik nemese terorıstik uıymǵa qatysy bar, qaıtadan qylmys jasaǵan, uıymdasqan toptyń (qylmystyq uıymnyń) “serkesi” sanalatyn, kámeletke tolmaǵandardyń jynystyq tıispeýshiligine qarsy qylmystar jasaǵan, sondaı-aq Qazaqstanda aýyr nemese asa aýyr qylmys jasaǵan jáne halyqaralyq sharttar negizinde óz azamattyǵy bar elge berilgen adamdardyń elimizge kirýine tyıym salynǵan.
• Sonymen qatar Zańda halyqtyń kóshi-qonyna qatysty zańnamany odan ári jetildirýge baǵyttalǵan basqa da túzetýler kózdelgen.