Memlekettik tildiń keńinen qoldanylýyn talap etip júrgen til janashyry Rýza Beısenbaıtegi bostandyqqa shyqty.
Qazaq tilin qorǵaǵan Rýzany el de qorǵap qaldy!
Aıdyń-kúnniń amanynda aımańdaı Rýza apaıymyzdy joǵaltyp alyp, tótenshe jaǵdaıda ótken kúnderimiz de artta qaldy. Qazaq tiliniń qorǵany Rýza apaıymyz ortamyzǵa oraldy.
Keshegi bir kúnimiz ben túnimiz bıliktegi jaýapty tulǵalarmen sóılesýge ketti. Kereký óńiri basshylarymen de sózimiz az bolǵan joq...
Aqyry, ádilettilik ornady. Qazaqtyń qaısar qyzy, Qazaq tiliniń jankeshti kúreskeri Rýza Beısenbaıtegi apaıymyz búgin bostandyqqa shyqty!
Qazaq tili bostandyqqa shyqty desek te bolady!Rýza apaımen sóılestik, kóńil-kúıi durys. Qazir úıinde. Elge rahmet aıtýda. Qasynda Kerekýlik ultshyl azamattar Serik Elikbaı men Medet bar.
Tal túste tóbemizden jaı túskendeı bolǵan jaısyz oqıǵanyń jaqsylyqpen aıaqtalýyna óz úlesterin qosqan qalyń eldiń qaıratyna rızamyn. Qıyndyqtan shyǵý úshin bir judyryq bolyp jumyla bilgen jurtqa alǵysymyz sheksiz!
Qazaq tilin qorǵaǵan Rýza apaıdy el de qorǵap qaldy! Óıtkeni tarazyda tek adam taǵdyry ǵana emes, Til taǵdyry - El taǵdyry turdy! – dep jazdy depýtat Qazybek Isa.
Osy oraıda ol alǵashqy kúnnen birden qoldaǵan bir top depýtat áriptesterine rızashylyǵyn bildirdi.
Sonymen qatar bıliktegi jańasha oılaı bastaǵan kókiregi oıaý, kózi ashyq azamattarǵa kóp rahmet! Bılikte de jańa turpatty jaýapty tulǵalar bar ekenine kóz jetkizdik.
Eger adam buryn-sońdy mı júıkesi aýyrýymen aýyryp, arnaıy esepke alynbaǵan bolsa, ony sot sheshiminsiz birden psıhonevrologıalyq dıspanserge, ıaǵnı jyndyhanaǵa májbúrlep qamap tastaýǵa eshkimniń quqy joq, bul zańdy buzý!
Endi osy zańsyzdyqqa barǵandar jaýapqa tartylýy tıis!
Iá, bul keshegi oılaryna kelgenin istegen otyz jyldyq bıliktiń, ózin qor, ózgeni zor tutqan quldyq sanaly saıasattan qalǵan jarylystardyń jaraly izderi. Endigi mindet - zardap ákeler jarylystardyń barlyǵyn zalalsyzdandyrý bolmaq. Ol árıne árbir Táýelsizdik alǵan memleketter ótýi tıis - otarsyzdaný saıasaty men Ulttyq ıdeologıa.
Ulttyq ıdeologıa bolmasa, árbir aıaq basqan jerden osylaı qaýip-qaterdiń tútini shyǵa beretini belgili.
Al Ulttyq ıdeologıanyń negizi - Memlekettik til týraly zań qabyldaý! Memlekettik tildi mindetteý - Memlekettiń mindeti! Rýza men Qazybekterdiń mindeti emes… paryzy bolsa da…
Sondyqtan zań arqyly sheshilýi tıis barlyǵy.
Rýza apaıymyzǵa zor densaýlyq, qajyr-qaırat tileımiz! – dedi depýtat.
24 qańtar kúni saǵat 16:20 shamasynda 103 nómirine Pavlodar qalasynda áıel adam kóshedegi azamattarǵa agresıa tanytyp jatqany týraly habarlama kelip tústi.
Oqıǵa ornyna kelgen medısınalyq brıgada psıhıkalyq aýytqýlary belgilerimen R.B. esimdi 66 jastaǵy áıel adamdy Pavlodar oblystyq Psıhıkalyq densaýlyq saqtaý ortalyǵyna jetkizdi.
Ortalyq dárigerleri tarapynan naýqasqa eki kún boıy em qabyldaý sharalary jasaldy. Medısına qyzmetkerleriniń qaraýynan keıin densaýlyq jaǵdaıynyń jaqsarýyna oraı, konsılıým sheshimimen naýqas dıspanserlik baqylaý usynysymen úıine qaıtaryldy.
Densaýlyq saqtaý salasyndaǵy zańnamaǵa sáıkes, aldaǵy ýaqytta naýqastyń psıhıkalyq aýytqýlary nasharlap, aınalasyndaǵy adamdarǵa zıan keltirý yqtımaldyǵy qaıta baıqalǵan jaǵdaıda, ol emdeýge jiberiletin bolady, – dep habarlady Pavlodar oblysy DSB.
