Tiri bolsam, qazaqqa qyzmet etpeı qoımaımyn!

Álıhan Bókeıhan

"Koreıanyń júıesi tizimine engiziledi". Qazaqstandyqtar Koreıada jumys isteı ala ma?

26 qańtar 2024 49


Budan bylaı Qazaqstan azamattary zańdy túrde Ońtústik Koreıaǵa baryp, úsh jyl jumys isteı alady. Bul týraly Qazaqstannyń eńbek jáne halyqty áleýmettik qorǵaý mınıstrligi kóshi-qon komıtetiniń tóraǵasy Asqarbek Ertaev aıtty.



Asqarbek Ertaevtyń aıtýynsha, Qazaqstan azamattarynyń Ońtústik Koreıada jumys isteýge ruqsat berý júıesi engizý boıynsha tıisti sharalar qabyldanyp jatyr. Osy aıdan bastap qazaqstandyqtardy atalǵan elge jiberýge arnalǵan Sapar ortalyǵyn ashý jumystary bastalǵan. Ortalyqtyń negizgi mindeti – Ońtústik Koreıada jumysqa ornalasqysy keletin úmitkerlerge tildik kýrstardy oqytý, koreı tiliniń testileýi, biliktiligin arttyrý. Osy Sapar ortalyǵy arqyly Qazaqstan azamattary úsh jylǵa deıin jumys isteı alady.





Testileý ortalyǵy Almatyda ál-Farabı atyndaǵy Qazaq ulttyq ýnıversıtetiniń bazasynda ashylady. Atalǵan mekemeniń qajetti materıaldyq-tehnıkalyq bazasy, oqý aýdıtorıasy bar. Zamanǵa saı quraldarmen jabdyqtalǵan. Testileý ortalyǵynyń 500-ge tarta kompúter oryny bar. Qazaqstan azamattaryn Qonaev kópbeıindi kolejinde oqytý kózdelip otyr. Iaǵnı, Ońtústik Koreıaǵa barmas buryn olar oqytylady, – deıdi Asqarbek Ertaev.

Qonaevtaǵy kolejde bilim alýshylar turatyn 500 oryndyq jataqhana da qarastyrylǵan. Talaptyń biri – medısına tekserýinen ótý. Ol memlekettik mekemede – Qonaev qalasyndaǵy aýrýhanada júrgiziledi. Shtat jabdyqtalǵan.

Biz Ońtústik Koreıaǵa óz usynystarymyzdy joldadyq. Kelesi aptada olarmen tehnıkalyq kelissóz júrgizemiz. Jalpy algorıtm qandaı: bizdiń usynystardy ol eldegi barlyq múddeli memlekettik organdar qarap, taldaıdy. Qazaqstan osydan keıin eńbek adamdaryn eksporttaıtyn, Koreıanyń júıesi tizimine engiziledi. Qazir ol júıede 16 el bar. Basqa da memleketter ótinim berip jatyr. Bir jyl ishinde másele sheshilýi kerek. Merzimin álbette, Ońtústik Koreıa belgileıdi. Bul baǵytta jumys júrgizilip jatyr, – deıdi ol.

Bul maqala týraly ne oılaısyz?