Qazaqstanda jarıalanǵan táńirshildik senimin din retinde moıyndalýdy talap etetin petısıaǵa qatysty depýtat pikir bildirdi. Májilis kýlýarynda Edil Jańbyrshın táńirshildiki talap etkenderdiń "adasýshylar bolýy múmkin" ekenin aıtyp, Qoja Ahmet Iassaýı, Beket ata, Shákárim, Abaılardyń "adaspaǵanyn" eskertti, dep habarlaıdy Alash.KZ ulttyq portaly.
Depýtat Edil Jańbyrshınniń pikirin Qaz365.kz portaly jarıalady. Depýtat óz pikirinde táńirshildiktiń degen din emes ekenin,ata-baba ıslam dinin ustaǵanyn aıtady:
«Táńirshildik degen din emes. Bizdiń ata-babamyzdyń ustaǵan dini – ıslam. Sondyqtan bular adasýshylar bolýy múmkin. Durystap oqysyn, zerttesin. Qoja Ahmet Iassaýı, Beket ata, Shákárim, Abaılar adaspaǵan shyǵar dep oılaımyn», - deıdi Edil Jańbyrshın.
Sonymen qatar, depýtat óziniń ıslam dinin ustanatynyn aıtyp, óz zertteýleriniń, izdenisiniń, senimderiniń nátıjesinde dindi ózi tańdaıtynyn jetkizdi:
«Árkim óz zertteýleriniń, izdenisiniń, senimderiniń nátıjesinde dindi ózi tańdaıdy. Eń bastysy din terorızm men ekstremızmniń quraly bolmaýǵa tıis. Dindi saıası quralǵa aınaldyrýǵa bolmaıdy. Ol qoǵamda daý týdyrmaýy kerek. Eger mundaı belgiler bolsa, onda bul din emes. Bizde tıisti memlekettik organdar bar. Olar petısıa men usynystarǵa ózderi jaýap berip, qarastyrady», – dedi depýtat.
Esterińizge sala keteıik, keshe Epetition.kz resmı saıtynda Qazaqstanda táńirshildikti din retinde tanýdy suraıtyn petısıa jarıalandy. Biz úndeýdiń Ádilet mınıstri Azamat Esqaraevqa joldanǵanyn jazǵanbyz:
Qazaqstannyń táńirshileri atynan «Dinı qyzmet jáne dinı qyzmet týraly» zańyna sáıkes «Táńir eli» respýblıkalyq táńirlik dinı birlestigin resmı tirkeýge qatysty bizdiń bastamamyzdy qoldaýyńyzdy suraımyz. Sońǵy jyldary Qazaqstanda erte orta ǵasyrlarda birqatar kóne túrik qaǵanaty men ımperıalarynyń kúsheıýi kezinde qalyptasqan táńirlik nanym-senimderdi ustanýshylar sany artyp keledi. Táńirshilmin dep ashyq aıtatyn azamattardyń sany birneshe jyldyń ishinde 1 mıllıonnan asady degen boljam bar, – delingen petısıada.
