Aqtóbe qalasynyń ákimi Azamat Beket sý tasqynyna baılanysty turǵyndarǵa eskertý jasap, ún qatty, - dep habarlaıdy alash.kz.
Azamat Bekettiń sózinshe, Hromtaý aýmaǵynda ornalasqan Maǵajan sý qoımasynyń jarylyp ketý qaýpi bar. Osyǵan baılanysty Aqtóbe sý qoımasyna úlken kólemde sý quıylady degen boljam bar.
"Aqtóbe sý qoımasynyń tolýyna baılanysty shlúzdi ashýǵa májbúrmiz. Bul sýdyń jaǵasynan asyp ketýine ákelýi múmkin ekenin eskertemiz. Kirpishti kópiri aýdanyndaǵy Elek ózeni men Qarǵaly ózeniniń mańynda ornalasqan baý-baqsha ujymdarynyń turǵyndaryn evakýasıalaýǵa kelisim berip, úılerińizden shyǵýdy suraımyn.
Biz úshin sizderdiń ómirlerińiz óte mańyzdy. Ózderińiz bilesizder naýryzdyń 26-sy kúni qala aýmaǵynda kúnniń kúrt jylynýyna baılanysty dala sýlary kóterildi. Birneshe turǵyn alaptar men baý-baqsha ujymdaryna qaýip tóndi. Búgingi kúni 73 úıge sý kirdi. 155 adam evakýasıalandy. Sý tasqyny saldarynan zardap shekken turǵyndarǵa kómek beriledi", – dedi ákim.
Artynsha qala ákimi evakýasıalyq pýnktterge baryp, túnde sý basý qaýpine baılanysty úılerin tastap shyqqan turǵyndarmen kezdesip qaıtqan.
"Ózderińiz biletindeı, Aqtóbe qalasynda tótenshe jaǵdaı jarıalandy. Biz keshe túnde sý tasqyny bolýy múmkin aımaqtarda turatyn azamattardy evakýasıaladyq. Úılerin sý basqan turǵyndar kómeksiz qalmaıdy, jarıalanǵan tótenshe jaǵdaı aıasynda kómek beriledi. Osy sý tasqynyna qarsy sharalar aıaqtalyp, biryńǵaılanǵannan keıin komısıa ár úıdiń jaǵdaıyn qaraýmen aınalysatyn bolady. Zardap shekkenderdiń eshqaısysy nazardan tys qalmaıdy.
Evakýasıalyq jáne sý tasqynyna qarsy is-sharalarǵa 835 adam, 340 tehnıka jumyldyryldy. Qazirgi ýaqytqa 2125 adam, onyń ishinde 870 bala qalanyń 53 mektebinde ornalasty. Ystyq tamaq uıymdastyrylǵan", - deıdi ákim.
Azamat Bekettiń sózinshe, komısıa barlyq úıge keltirilgen shyǵyndy túgendegennen keıin zardap shekkender tolyq kólemde kómek alady. Qalada tótenshe jaǵdaı rejımi kómek tólenip bolǵanǵa deıin sheshilmeıdi.
"Keltirilgen shyǵyndardy baǵalaý jónindegi komısıa quryldy. Komısıa erteń, dúısenbiden bastap sý shaıǵan eldi mekender men baý-baqsha úılerin túgendeý, tekserý júrgizýdi bastaıdy. Birde bir úı nazardan tys qalmaıdy.
Komısıa úılerge táýelsiz baǵalaýshy kompanıa ókilderimen birge barady, qansha úıdiń ishine sý kirgeni, múlikterdiń búlingeni anyqtalady. Úıleri sýǵa ketken aýmaqta qalǵan turǵyndarǵa komısıa baratyny týraly Astana jáne Almaty aýdandary arqyly habarlanyp otyrady", - deıdi qala basshysy.
