Búgin qasıetti Ramazan aıynyń sońǵy orazasy. Oraza biz úshin jeńil ótkenimen, elimiz úshin jeńil bolmady. Sebebi samarqannyń kók tasy alqynyp, tabıǵattyń tosyn minezi kúıbeń tirshilik keship jatqan azamattardyń sol kúngi kúnin tas-talqan etti. Erigen qar sýy elimizdiń on eldi-mekeninde tótenshe jaǵdaı jarıalaýǵa alyp keldi.
Bul qasiret árbirimizge aýyr tıetini sózsiz. Bul qazaq ne kórmedi. Beıbit kúnniń ózinde osyndaı tabıǵı apattardy bastan keshirip jatyrmyz. Jaratqannyń isine shara bar ma?! Biraq qandaı qıyndyq bolsa da moıymaıtyn bizdiń halyq bir jaǵadan bas, bir jeńnen qol shyǵaratyny aıdan anyq.
Qazirdiń ózinde tótenshe jaǵdaılar qyzmeti men kúshtik qurylymdardan bólek elimizdiń ár óńirinen jınalǵan volonterler sý tasqyna qarsy sharalarǵa at salysýda. Úısiz-kúısiz qalǵan aǵaıynǵa jylý jınap, bir jaǵyna shyǵysýda. Biraq olaı aıtýǵa da kelmeıdi, sebebi memleket tarapynan jan-jaqty qoldaý men kómekter barynsha kórsetilýde. Tipti zardap shekken otbasylardyń ózderi alǵashqy ótemaqylaryn ala bastady.
Myqty kásiporyndar men bankterdiń ózderi arnaıy ashylǵan shotqa qomaqty qarjylaryn aýdaryp, eldiń birjaǵyna shyǵysýda.
Oqý-aǵartý mınıstrligide sabaq prosesin uıymdastyrý, zardap shekken otbasylardyń balalaryn saýyqtyrý lagerlerine jiberý boıynsha naqty sharalar qabyldaýda.
Sý basqan óńirlerde nannyń baǵasy men qarapaıym tutynatyn zattyń baǵasyn aspandatyp júrgendi de kórdik. Qazir ony saýda mınıstrligi óziniń qatań baqylaýyna aldy. Azyq-túlik baǵasyna turaqty baqylaý júrgizilýde.
Sondaı-aq, aqparattyq shtab 24/7 jedel túrde jumys atqarýda. Sońǵy aqparattar ýaqtyly tez berilýde. Egerde osylaı ýaqtyly berilse ǵana el arasynda qańqý sóz ben jalǵan aqparat bolmaıdy. Áıtpese osyndaı jaǵdaılardy óz maqsatyna paıdalanyp ketetinderdi de kórdik.
Bastysy adam shyǵyny joq. Eldiń amandyǵy kerek. Qalǵanynyń bárin qaıtadan jasaýǵa, qalpyna keltirýge bolady. Bul da bir elimizge berilgen synaq shyǵar. Amandyqta bolaıyq. Qasıetti Ramazan aıynyń sońǵy kúninde eldiń amandyǵyn, jurttyń tynyshtyǵyn tiledim. Ustaǵan orazalaryńyz ben nıetterińiz qabyl bolsyn!
jýrnalıs
