Tiri bolsam, qazaqqa qyzmet etpeı qoımaımyn!

Álıhan Bókeıhan

"Soltústik Qazaqstandaǵy 2 iri sý qoımasy 100% toly". Eldegi bógetterdiń jaǵdaıy qandaı?

14 sáýir 2024 384

Sý resýrstary jáne ırrıgasıa mınıstrligi Sý resýrstaryn basqarý júıesin damytý tujyrymdamasyn qaıta qaraıtyny habarlandy. Qujatqa sý tasqynynyń aldyn alý jáne onyń shyǵyndaryn azaıtý jónindegi keshendi is-sharalar qosylatyn bolady, dep habarlaıdy Alash.KZ ulttyq portaly. 

«Qazirgi ýaqytta Aqmola oblysynda eki iri sý qoımasy 100% toly. Munda sý tasqynynyń belsendi kezeńi ótip, salalary turaqtandy. Biraq, Jabaı ózeniniń rettelmeıtin aǵynynyń artýyna baılanysty Atbasarda sý tasqyny jalǵasyp jatyr. Soltústik Qazaqstan oblysynda 2 iri sý qoımasy 100% toly, sý tasqyny jalǵasyp jatyr. Eki sý qoımasy da shtattyq kestege saı jumys istep tur, buzylý qaýpi joq. Sý toraptary kópfaktorly tekserýden ótti, tehnıkalyq jaǵdaıy qanaǵattanarlyq», - dedi QR Sý resýrstary jáne ırrıgasıa mınıstrliginiń resmı ókili Móldir Ábdýalıeva Ortalyq komýnıkasıalar qyzmetinde.

"Qazaqparattyń" habarlaýynsha, Petropavl qalasy shegindegi Esil ózeniniń deńgeıi – 1 243 sm, bir táýlikte ol 103 sm-ge kóterildi. Mamandar sý ótkizý is-sharalaryn atqaryp jatyr.  Aqtóbe oblysynda eki iri sý qoımasynyń ortasha sý jınaý kórsetkishi – 97%. Óńirdegi jaǵdaı turaqty.

Batys Qazaqstan oblysynda tórt iri sý qoımasynyń ortasha sý jınaýy – 74%. Irekli sý qoımasynan jiberilgen sý áli Qazaqstan shekarasyna jetken joq. Buǵan qatysty boljam ózgermedi. Bul sý 16-17 sáýirde keledi dep kútilip otyr.

Qostanaı oblysynda eki iri sý qoımasynyń ortasha sý jınaý kórsetkishi 93%, sý tasqynynyń belsendi kezeńi ótti. Qaratomar sý qoımasy tranzıttik rejımde jumysyn jalǵastyryp jatyr. 

Shyǵys Qazaqstan oblysynda eki iri sý qoımasy boıynsha ortasha sý jınaý kórsetkishi – 80%.

Abaı oblysynda Shúlbi sý qoımasy 89%-ǵa toldy. Óńirde sý tasqyny jalǵasýda. Shúlbi sý qoımasyna aǵyndardyń ulǵaıýyna baılanysty sý jiberý jumysy júrgizilip jatyr. Jalpy, Ertis kaskadynyń sý qoımalary shtattyq kestege saı jumys istep tur.

Qaraǵandy oblysynda 3 iri sý qoımasy 99%-ǵa toly, óńirde sý tasqynynyń qaýipti kezeńi ótti. Jaǵdaı turaqty. 

Bul maqala týraly ne oılaısyz?