Jýyrda Qazaqstanǵa oralyp, áýejaıdan birden ustalǵan saıası belsendi Ermek Narymbaı Almaty oblysy Zarechnyı kentindegi qaýipsizdigi ortasha rejımdegi túrmege aýystyryldy. Bul jóninde advokaty Janar Balǵabaeva habarlady.
Onyń sózine qaraǵanda, belsendi 17 aqpanda kúndiz atalǵan abaqtyǵa etappen jetkizilgen.
– Shekarany zańsyz kesip ótý boıynsha sotqa deıingi tergeý amaldary bastaldy. (Qazaqstanda bostandyǵy shektelgen belsendi 2016 jyly elden ketip qalǵan – red.) Ol sol kezde óziniń shekarany qalaı kesip ótkenin aıtqan. Sodan soń iz qozǵalǵan. Ol elde bolmaǵandyqtan is toqtap qalǵan edi. Qazir qaıtadan jandandy. UQK-dan tergeýshi keldi. Qazir sol tergeýge ketip bara jatyrmyn. Tergeýshi odan suraq-jaýap alady. Sosyn Qordaıǵa baryp, ol qaı jerden kesip ótkenin kórsetedi, – dedi advokat.
2015 jylǵy qazanda Qazaqstan soty azamattyq belsendiler Ermek Narymbaı men Serikjan Mámbetalındi Murat Telibekovtiń "Veter s ýlısy" kitabynyń úzindisin áleýmettik jelige jarıalaǵany úshin sottaǵan. "Alaýyzdyq týdyrdy" degen aıyp taǵylǵan Narymbaı úsh jylǵa, Mámbetalın eki jylǵa bostandyǵynan aıyrylǵan.
Qazaqstandyq quqyq qorǵaýshylar qamaýdaǵy Narymbaı men Mámbetalındi "saıası tutqyndar" tizimine engizgen. Keıin ekeýi de isine "ókinetini" jaıly hat jarıalady. Narymbaı tergeý abaqtysynda bir aıdan astam ýaqyt ashtyq jarıalap jatty, 2016 jylǵy 22 aqpanda sot ony úı qamaǵyna aýystyrǵan soń belsendi ashtyǵyn toqtatty. Keıin apelásıa soty onyń jazasyn jeńildetip, erkindigin úsh jylǵa shekteýge almastyrǵan. 2016 jylǵy shildede Ermek Narymbaı Qazaqstannan bıliktiń ruqsatynsyz Ýkraınaǵa ketip qaldy.
Ermek Narymbaı 2010 jylǵy 1 mamyrda Almatyda sol kezdegi Qazaqstan prezıdenti Nursultan Nazarbaevtyń otstavkaǵa ketýin talap etken demokratıalyq kúshter jıynynda "Nazarbaev, ket!" dep urandaǵan. Sol kúni keshke ony polısıa ustap áketip, "tártip buzdy" degen aıyppen 15 táýlikke qamaǵan. Keıin qamaýda otyrǵan belsendige "sotqa qurmet kórsetpedi" jáne "polıseılerge qarsylasyp, kúsh kórsetti" degen aıyptar taǵyldy. Almatynyń Bostandyq aýdandyq soty osy eki aıyp boıynsha 2010 jylǵy 26 maýsymda Ermek Narymbaıdy tórt jylǵa bostandyǵynan aıyrdy. 2012 jylǵy 25 aqpanda bılik raqymshylyq jasap ony qamaýdan bosatqan.
