Tiri bolsam, qazaqqa qyzmet etpeı qoımaımyn!

Álıhan Bókeıhan

Sardarǵa eskertkish taqta ornatyldy

25 jeltoqsan 2023 74
2023 jyldyń 23 jeltoqsanynda saıası ǵylymdarynyń doktory, profesor, general-maıor Elýbaev Baýyrjan Ysqaqulyna ashylǵan eskertkishtiń saltanatty rásimine sardardyń týǵan-týystary men kóz kórgen áriptesteri jáne Shekara akademıasynyń basshylyq quramy qatysty.



Tórtinshi oqý korpýsynyń aldyndaǵy granıt tastan ornatylǵan memorıaldyq eskertkishtiń ashylýyna sebepker bolǵan, kezinde osy oqý ordasyn 2005-2009 jyldary basqarǵan general-maıor B.Elýbaevtyń ul-qyzdary demeýshilik jasap, ákeleriniń atyn asqaqtatty.

Shara barysynda alǵash bolyp sóz alǵan polkovnık P.Polıvanov ǵalymnyń qyzmettik-jaýyngerlik júrip ótken jolyna toqtalyp, onyń oqý ordasyna ólsheýsiz úles qosqan eńbek jolyn áńgimeledi. Sodan keıin sóz kezegin Baýyrjan Ysqaqulymen birge qyzmet atqarǵan áriptesteri aldy. Zapastaǵy general-maıor Atshabarov Naǵashybaı Qorǵanbekuly:

«Baýkeńmen 1985-1986 jyldary Almatyda tanystym. Aýǵanstannan elge oralǵanmyn. Shenim – kapıtan edi. Ol kezde Ulttyq qaýipsizdik komıteti KGB (Memleket qaýipsizdik komıteti) bolatyn. Komıtet Tóraǵasy Máskeýden kelgen general-maıor Mıroshnık Vıktor Mıhaılovıch atty óte qatal kisi edi. Baýkeń tóraǵanyń kómekshisi qyzmetinde eken. Ol kezde Tóraǵanyń kómekshisi degen statýs qazirgiden múlde basqa edi. Qazir kómekshi degenińiz baryp kel-shaýyp keldiń adamdary ǵoı. Ol kezde kómekshi degenińiz basshynyń kem degende jarty jumysyn atqaratyn. Aqparattardy taldaý, saralaý, sol arqyly qorytyndy shyǵaryp, nátıjesin kórsetip otyrý syndy jumystardyń barlyǵyn kómekshi atqaratyn. Baýkeń sol jumysyn minsiz atqara aldy. Óziniń ishki mádenıeti men myqtylyǵynyń arqasynda qataldyǵymen aty shyqqan Vıktor Mıroshnık ózgelerge kórsetetin minezin Baýkeńe kórsetpeıtin, ózgelerge aıtqan sózin Baýkeńe aıtpaıtyn.



Sol kezden beri ol kisiniń ósý joldary kóz aldymda ótti. Ol da óziniń qyzmeti arqyly meni baqylap otyrdy. Sol jyldary Baýkeń meni Ulttyq qaýipsizdik komıteti Ortalyq apparaty departamentteriniń birine basshylyq qyzmetke usynyp, atqarǵan sharýalarymdy, jasaǵan jumystarymdy kórsetkende qatty tań qaldym», - deıdi ol ótken shaqqa oralyp.

Materıaldy daıyndaý barysynda Baýyrjan Ysqaquly týraly estelikter jazylǵan «Keńdik.» Bıiktik. Tereńdik. atty kitapty paraqtap otyryp ol kisiniń Ulttyq qaýipsizdik komıtetinde Memlekettik tildi damytý basqarmasyna da jetekshilik jasaǵanyn oqydym. Ana tiliniń naǵyz janashyry retinde onyń UQK organdarynda keń qoldanylýyna, is-qaǵaz aınalymyna tez enýine kóp eńbek sińirgen. Bul turǵyda sardardyń kózin kórgen áriptesterimniń aıtýynsha, ol kisi Shekara akademıasynda qyzmet atqarǵan jyldary qazirgi til saıasaty bólimi, bildeı bir basqarmaǵa aınalǵan eken. Budan aǵamyzdyń naǵyz til janashyry bolǵanyn baıqaýǵa bolady.

Qyzmet barysynda da, jeke ómirinde de ónegeli ǵumyr keshken Baýyrjan Ysqaqulynyń kemel qasıetteri, qaldyrǵan izi týraly kóp aıtýǵa bolady.

Ulttyq qaýipsizdik salasynda, ásirese, Shekara akademıasynda basshylyq etken jyldary akademıa ómiriniń gúldenýin áskerı qyzmetshiler aýzynan tastamaı aıtyp júr.

Shara sońynda B.Elýbaevtyń balalary Akademıadaǵy kelýshiler bólmesine dastarhan jaıyp, jınalǵan qonaqtarǵa dám aýyz tıgizdi.

Olaı bolsa, Baýyrjan aǵamyzdyń salǵan izi, jasaǵan isi, kórsetken ónegesi máńgi jasaıtynyna senimdimiz.

Janat Jabyrbekov,

QR UQK Shekara akademıasynyń baspasóz hatshysy

 

 

 

 

 

 

 
Bul maqala týraly ne oılaısyz?