Saǵadat Nurmaǵambetovtiń 100 jyldyǵyna oraı Aqkól qalasynda qaharman tulǵasyn ereksheleıtin eskertkish pen alań ashyldy, dep habarlaıdy Alash.KZ ulttyq portaly.
Keńes Odaǵynyń Batyry, Halyq qaharmany, QR birinshi Qorǵanys mınıstri, armıa generaly Saǵadat Nurmaǵambetovtyń ǵasyrlyq mereıtoıyna oraı týǵan jerinde saltanatty jıyn ótti. Oǵan Parlament Senatynyń spıkeri Máýlen Áshimbaev, Qorǵanys mınıstri, general-polkovnık Rýslan Jaqsylyqov, Aqmola oblysynyń ákimi Marat Ahmetjanov, ardagerler, kýrsanttar, jergilikti turǵyndar, sondaı – aq batyrdyń nemeresi men shóberesi-Aıjan Nurmanambetova men Sataı Maqsat qatysty.
Saǵadat Nurmaǵambetov 18 jasynan el qorǵaý qyzmetine aralasty, 1943 jyly Soltústik Kavkaz maıdanynda jas ofıser retinde jaýǵa qarsy kúresti.
Soǵys jyldarynda Saǵadat Nurmaǵambetov Krasnodar ólkesin, Ýkraınany, Moldovany, Batys Belarýs pen Polshany azat etýge qatysty. 1945 jyly 27 aqpanda «Polsha aýmaǵynda jaýdyń myqty bekinisin buzyp ótip, qolbasshylyqtyń jaýyngerlik tapsyrmalaryn úlgili oryndaǵany úshin, sonymen qatar kórsetken batyrlyǵy men erligi úshin» qazaq halqynyń ulyna Keńes Odaǵynyń Batyry ataǵy berildi.
Saǵadat Nurmaǵambetov basqarǵan batalón Gıtlerdiń reıhskeńsesiniń ǵımaratyna shabýyl jasady.
Soǵystan keıingi 1946–1989 jyldary Saǵadat Qojahmetuly Túrkistan áskerı okrýgi shtabynyń jedel basqarý ofıserinen bastap Orta Azıa áskerı okrýgi áskerleri qolbasshysynyń orynbasary laýazymdaryn atqardy.
1992 jyly 7 mamyrda general Nurmaǵambetov táýelsiz Qazaqstannyń Qorǵanys mınıstri bolyp taǵaıyndaldy.
1992 jyldan 1995 jylǵa deıin mınıstrlikti basqarǵan Saǵadat Qojahmetuly armıamyzdyń qalyptasýy jolynda eren eńbek etti. Qazaqstan Respýblıkasy Prezıdentiniń Jarlyǵymen 1994 jylǵy 23 mamyrda oǵan № 1 «Altyn juldyz» tabys etile otyryp, Halyq qaharmany ataǵy berildi.
Qyzmetin aıaqtaǵannan keıin Saǵadat Qojahmetuly Qazaqstan Respýblıkasy Prezıdentiniń keńesshisi bolyp,ómiriniń sońyna deıin el ıgiligine jumys istedi.
