Harkov ákimshiliginiń basshysy Oleg Sınegýbov Reseıdiń Ýkraınaǵa shabýylynyń tórtinshi kúni jeńil áskerı tehnıka qalaǵa basyp kirgenin málimdedi.
Bul aqparatty Ýkraına ishki ister mınıstriniń orynbasary Anton Gerashenko da rastap, birneshe jeńil urys tehnıkasy Harkov kóshesinde ketip bara jatqanyn Telegram arnasynda kórsetti.
Oleg Sınegýbov qala turǵyndary úıde otyrýǵa shaqyrdy.
"Harkovke jaýdyń jeńil tehnıkasy kirdi. Qala ortalyǵynda da júr. Nazar aýdaryńyzdar! Syrtqa shyqpańyzdar! Ýkraına qarýly kúshteri jaýdy joıady",– dep jazdy ol.
Ýkraına astanasynyń turǵyndary 27 qańtar kúni tańerteń jarylys bolyp jatqanyn habarlady. Jarylys Kıevtiń ońtústik-shyǵys bóliginde bolǵan – Reseı Kıevtiń ońtústigindegi Vasılkov qalasyndaǵy munaı bazasyna soqqy bergen.
"Jaý bárin joıǵysy keledi",- dedi Vasılkov qalasynyń basshysy Natalá Balasınovıch.
Harkov túbinde qaqtyǵys bolyp jatqan kezde Ýkraına prezıdentiniń ofısi Reseı áskeri qaladaǵy gaz qubyryn jarǵanyn málimdedi. Úkimet tútinnen qorǵaný úshin terezege ylǵal mata nemese dáke tutý qajettigin eskertti.
Zelenskıı ofısi Jýlány áýejaıynda taǵy da jarylys bolǵanyn habarlady. Ýkraına áskeri Kıev qorǵanysyn ustap turǵanyn, Reseıdiń qalaǵa kirip ketken "dıversıalyq toptaryn" joıǵanyn habarlady.
"Elimizdi azat etkenshe soǵysamyz",- Zelenskıı vıdeo málimdemesinde.
Eýropa odaǵy, Fransıa, Germanıa, Italıa, Ulybrıtanıa, Kanada jáne AQSH jetekshileri Reseıdiń keı bankterin SWIFT júıesinen ajyratýǵa jáne Reseı Ortalyq bankin shekteýge ýaǵdalasqan.
26 aqpanda Ýkraına densaýlyq saqtaý mınıstri Vıktor Láshko Reseı shabýylynyń saldarynan 198 adam ólip, myńnan astam adam jaralanǵanan habarlaǵan. Reseı soǵys qurbandaryn jarıalaǵan joq.
26 aqpanda BUU bosqyndar isi boıynsha agenttigi Ýkraınanyń 120 myńnan astam azamaty shetelge ketkenin habarlady. Negizinen áıelder men balalardan turatyn bosqyndar Polsha, Rýmynıa, Moldova jáne Vengrıaǵa ketken. Áskerge jaramdy er adamdardy Ýkraınadan shyǵarmaıdy.
