Tótenshe jaǵdaı mınıstrligi 18 aqpan keshke Nur-Sultandaǵy qurylys alańdarynyń birinde bolǵan qaıǵyly oqıǵaǵa baılanysty komısıa qurylǵanyn habarlady. Polısıa "Qurylys jumystaryn júrgizý kezinde qaýipsizdik qaǵıdalaryn buzý" baby boıynsha qylmystyq is qozǵaǵan.
Juma kúni keshki saǵat bester shamasynda astanada qurylys alańdarynyń birinde munaraly kran qulap, munara ústinde bolǵan kranshy opat bolǵan. Oqıǵa ornyna 30 shaqty qurylysshy jınalyp, qaıǵyly jaıtty jan-jaqty tergeýdi talap etken.
Tótenshe jaǵdaı mınıstrligi 19 aqpanda taratqan habarlamasynda Turan dańǵyly boıynda salynyp jatqan nysan aýmaǵynda "2013 jyly shyǵarylǵan QTZ 100 munara kranynyń seksıasy syndy" dep jazǵan.
"Bul krannyń qulaýyna ákep soqty. Nátıjesinde 1970 jyly týǵan kranshy alǵan jaraqattarynan qaıtys boldy. Tótenshe jaǵdaı mınıstrligi ónerkásiptik qaýipsizdik komıteti departamenti ınspektorlary kýágerler arasynda saýalnama júrgizdi, baqylaý kameralarynan beınejazbalar alyndy jáne avarıany tekserý jónindegi komısıa quryldy" delingen habarlamada.
Komısıa quramyna mınıstrlik pen ákimdik ókilderi jáne ózge de "múddeli tulǵalar" engen.
Vedomstvo tergep-tekserý jumystary aıaqtalǵannan keıin krannyń qulaý sebepteri men mán-jaılary anyqtalady dep ol boıynsha da aqparat berýge ýáde berdi. Al astana polısıasy oqıǵaǵa baılanysty "Qurylys jumystaryn júrgizý kezinde qaýipsizdik qaǵıdalaryn buzý" baby (277-bap) boıynsha qylmystyq is qozǵaǵanyn habarlady. Saraptama taǵaıyndalǵan.
Juma kúni túnde oqıǵa ornyna jıylǵan jumysshylar tehnıkalardyń eskiligin alǵa tartyp, máseleni buǵan deıin basshylyqqa talaı jetkizgenmen jaǵdaı ózgermegenin aıtqan.
Qurylys dýalyndaǵy nysannyń pasportyna sensek, qurylysqa tapsyrys berýshi – KING DEVELOPMENT jaýapkershiligi shekteýli seriktestigi, bas merdiger – WINBUILD JSHS. Azattyq tilshisi habar taratqan kezde oqıǵa ornynda qurylys kompanıasynyń ókili bolǵan joq.
Narazylarǵa Tótenshe jaǵdaı mınıstrligi ónerkásiptik qaýipsizdik komıteti departamenti mamandary kelip, oqıǵany muqıat tekseretinin aıtqan.
Qazaqstanda jumysshylar qurylys alańynda qaýipsizdik erejeleri saqtalmaıtynyn aıtyp, jıi shaǵymdanady. Ondaǵy qaıǵyly oqıǵalar týraly aqparattar jıi shyǵady. 23 qańtarda Almatydaǵy qurylys alańynda munaraly kran qulap, kranshy jigit mert bolǵan. Polısıa "Qurylys jumystaryn júrgizý kezinde qaýipsizdik qaǵıdalaryn buzý" baby boıynsha sotqa deıingi tergep-tekserý bastalǵanyn habarlaǵan.
Astanadaǵy kranshylar osyǵan deıin qaýipsizdik talaptarynyń saqtalmaıtynyn aıtyp birneshe ret narazylyqqa shyqqan. Olar jumys aýyr, jalaqy az, al qaýipsizdik talaptary jıi buzylady degen.
