Nazarlaryńyzǵa Ahmet Baıtursynulynyń Álıhan Bókeıhanǵa arnaǵan óleń joldaryn usynamyz.
DOSYMA HAT
Qyraǵy, qıa jazbas suńqarym-aı!
Qajymas qashyq jolǵa tulparym-aı!
Úıilgen ólekseni órge súırep,
Shyǵarmaq qyr basyna ińkárim-aı!
Jarqyrap jaqsylyqtyń tańy atpaı tur,
Túnergen tóbemizden bult arylmaı.
Kók etti, kón terili, kónip qalǵan,
Syqsa da shydaı berý, jurt jarylmaı.
Kim bilip, Er eńbegin sezip jatyr,
Kim shydap, joldastyqqa tózip jatyr?
Sasyq mı, salqyn júrek sanasyzdar
Alańsyz aq maltasyn ezip jatyr.
Synaıtyn jaqsy menen jamandy ólshep,
Quldyqtyń qoldarynda kezi jatyr.
Keshegi keńshilikte kerek qylǵan,
Bostandyq bolmaǵan soń, bezip jatyr.
Aıtqanmen taýsyla ma ony-muny,
Talaıdyń tańdamaly túpki syry:
Janasqan shyn kóńilmen jaqyndyq az
Kóbiniń ishi salqyn, syrty-aq jyly.
Aqshaǵa abyroıyn, aryn satyp,
Azǵan jurt, adamshylyq qalmaı syny.
Jany ashyp, jaqyn úshin qaıǵyrar ma
Jany mal, jaqyny mal, maldyń quly?!
Ahmet Baıtursynuly
