Qazaqstannan AQSH-qa tikeleı áýe qatynasy uıymdastyrylý ústinde, dep habarlaıdy Alash.kz.
QR Kólik mınıstrliginiń baspasóz qyzmetiniń málimetinshe, memleket basshysynyń Qazaqstan men AQSH arasynda tikeleı áýe qatynasyn uıymdastyrý jónindegi tapsyrmasyn júzege asyrý sheńberinde Qazaqstannyń avıasıalyq ákimshiligi Kólik mınıstrliginiń Azamattyq avıasıa komıtetimen jáne Qazaqstan Respýblıkasynyń AQSH-taǵy Elshiligimen birlese otyryp ári QR Syrtqy ister mınıstrliginiń qoldaýymen AQSH Federaldy avıasıalyq ákimshiligimen ushý qaýipsizdigi boıynsha aldyn ala halyqaralyq baǵalaýdy (IASA) ótkizý týraly kelisimge qol qoıdy.
Qujatta ózara aqparat almasý, tehnıkalyq kómek jáne áleýetti arttyrý sharalaryn qosa alǵanda, IASA aldyn ala baǵalaý prosesine baǵyttalǵan birlesken tásilder qarastyrylǵan. Atalǵan kelisim Qazaqstanda ushý qaýipsizdigin qamtamasyz etý deńgeıin arttyrý boıynsha Qazaqstannyń avıasıalyq ákimshiligi, Azamattyq avıasıa komıteti jáne Federaldy avıasıalyq ákimshiligi arasyndaǵy yntymaqtastyqty kúsheıtýge múmkindik beredi dep kútilýde.
Aldyn ala baǵalaý sheńberinde IASA Federaldy avıasıalyq Ákimshiligi avıakompanıalary ushýǵa ótinish bergen, AQSH-qa ushatyn nemese amerıkalyq áýe kompanıalarynyń kodsher boıynsha kelisimshartyna qatysatyn elderdiń azamattyq avıasıa organdarynyń IKAO-nyń ushý qaýipsizdigi jónindegi halyqaralyq standarttaryn saqtaýyn baǵalaıdy.
IASA-ny aldyn ala baǵalaý budan ári Federaldy avıasıalyq ákimshiliginiń 1-sanattaǵy mártebesin alýǵa baǵyttalǵan jáne tıisti áýe kemeleri bolǵan kezde Qazaqstan men AQSH arasyndaǵy otandyq áýe kompanıalaryna tikeleı áýe qatynasyn iske qosýǵa múmkindik beredi.
Kelisim QR avıasıa bıliginiń ushý qaýipsizdiginiń eń joǵary standarttaryn saqtaýǵa umtylysyn aıqyndap, Qazaqstan men Amerıka Qurama Shtattary arasyndaǵy baılanystar men ekonomıkalyq múmkindikterdi keńeıtýge yqpal etetin bolady.
