Tiri bolsam, qazaqqa qyzmet etpeı qoımaımyn!

Álıhan Bókeıhan

Qazaqstanda 2030 jylǵa deıingi qaýipsiz eńbek tujyrymdamasy qabyldandy

27 jeltoqsan 2023 46
QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda Qazaqstan Respýblıkasyndaǵy 2030 jylǵa deıingi qaýipsiz eńbek tujyrymdamasy qaraldy.

Eńbek jáne halyqty áleýmettik qorǵaý mınıstri Svetlana Jaqypova atap ótkendeı, Tujyrymdama Memleket basshysynyń «Ádil Qazaqstannyń ekonomıkalyq baǵdary» atty halyqqa Joldaýynda kórsetilgen tapsyrmasyn oryndaý úshin ázirlengen.

Ol 4 negizgi baǵytty qarastyrady. Olar – táýekelge baǵdarlanǵan tásil negizinde eńbekti qorǵaýdyń ulttyq júıesin jańǵyrtý, jumys oryndarynda táýekeldi tómendetý jónindegi sharalardy ekonomıkalyq yntalandyrý, kásibı quzyretter men ǵylymı áleýetti damytý, sondaı-aq eńbekti qorǵaý salasyndaǵy baqylaý men monıtorıńtiń tıimdiligin arttyrý.

Qaýipsiz eńbektiń negizgi ındıkatorlary – óndiristik jaraqat pen kásiptik aýrýlar kórsetkishteri. Olar, óz kezeginde, zıandy jaǵdaılarda jumys isteýdiń saldary. Osyny eskere otyryp, Tujyrymdama aıasynda tıisti sharalar kesheni iske asyrylatyn bolady.

Premer-Mınıstrdiń aıtýynsha, Qazaqstanda 500 myńǵa jýyq adam zıandy eńbek jaǵdaılarynda jumys isteıdi. EYDU elderinde bul kórsetkish óndiristik prosesterdi avtomattandyrý jáne qaýipsizdik tehnıkasy deńgeıin arttyrý esebinen jyl saıyn azaıyp keledi.
«Al bizde óndiristik jaraqat alý kórsetkishi birshama joǵary ekenin atap ótýge týra keledi. Elimizde jyl saıyn 2 myńǵa jýyq adam jumys barysynda jaraqat alady. Onyń ishinde 200-den astam adam mert bolady», — dedi Álıhan Smaıylov.

Úkimet basshysynyń sózinshe, óndiriste qazir qoldanylyp júrgen jazataıym oqıǵalardan saqtandyrý júıesi jumys berýshilerdi eńbek jaǵdaılaryn jaqsartýǵa yntalandyrmaıdy. Búginde kásiporyndardyń tek 32%-y ǵana óz qyzmetkerlerin saqtandyryp otyr.
«Kóptegen elde ómirdi saqtandyrý kompanıalary saqtandyrý syılyqaqysynyń belgili bir bóligin preventıvti is-sharalarǵa baǵyttaıdy. Iaǵnı, olarda qyzmetkerlerdi eńbek qaýipsizdigine oqytýǵa,  ujymdyq jáne jeke qorǵaý quraldaryn satyp alýǵa basymdyq beriledi. Biz de osyndaı júıege kóshýimiz kerek», — dedi Úkimet basshysy.

Álıhan Smaıylovtyń aıtýynsha, osy salada qalyptasqan problemalardy kezek kúttirmeı sheshý úshin Qazaqstanda alǵash ret 2030 jylǵa deıingi Qaýipsiz eńbek tujyrymdamasy ázirlendi.
«Bul qujat eń aldymen, kásiptik qaýip-qaterler men óndiristik jaraqattaný deńgeıin jáne kásiptik aýrý túrlerin tómendetýge baǵyttalǵan. Barlyq táýekel aldyn ala eskeriletin bolady. Óndiristegi qaýipsizdik salasyn sıfrlandyrý osy máselelerdi sheshýge yqpal etýi tıis», — dedi Premer-Mınıstr.

Onyń aıtýynsha, Tujyrymdama eńbekti qorǵaý salasyndaǵy baqylaý men monıtorıńtiń tıimdiligin arttyrýy kerek.

Usynylǵan qujat boıynsha daýys berý rásiminen keıin Úkimet basshysy Tujyrymdamanyń is-sharalarynyń barlyǵyn oryndaý boıynsha jumysty júıeli túrde uıymdastyrýdy tapsyrdy.

Oǵan qosa qaýipti ónerkásiptik obektilerdegi avarıalar sanyn tómendetýdi baqylaýda ustaý, Kásiptik aýrýlar ınstıtýtyn qurý máselesin tezdetý, sondaı-aq emdeý men profılaktıkanyń sapasyn arttyrý qajet.

Sonymen qatar Premer-Mınıstr óńirlerde eńbekti qorǵaý talaptarynyń saqtalýy boıynsha preventıvti memlekettik baqylaýdy qamtamasyz etý jáne osy baǵyttaǵy aýqymdy aqparattyq-túsindirý jumysyn kúsheıtý kerektigin aıtty.
Bul maqala týraly ne oılaısyz?