Prezıdent Qasym-Jomart Toqaev halyqtyń jartysynyń tabysy 50 myń teńgeden aspaıtynyn, jaǵdaıdy shuǵyl ózgertý kerek ekenin málimdedi, Alash.press agenttigi.
Toqaev ulttyq tabys boıynsha 2020 jyly bıznes eń joǵary úleske ıe ekenin aıtty.
"Biraq biz kútken nátıje tolyqqandy shyqqan joq. Qazir qolymyzda ne bar? 2020 jyly ulttyq tabystyń basym bóligi - 61,5% bızneske tıesili. Salyqtyń kólemi bar bolǵany 7,3%, al qazaqstandyqtardyń jalaqysyna 31% jumsalady. Bul – óte tómen kórsetkish. Mysaly, Reseıde osyndaı ekonomıka bolǵanyna qaramastan, jalaqy 46,7 paıyz bolady, ıaǵnı bizden 1,5 ese kóp. Ulttyq tabysty bólýdiń aıqyn teńgerimsizdigi baıqalady ári ádildik jaǵynan másele bar”, – dedi Toqaev.
Prezıdenttiń aıtýynsha, elimizde belgili bir elıtalyq toptar ǵana ekonomıkalyq ósimniń paıdasyn kórip otyr.
"Bizdiń elimizde belgili bir elıtalyq toptar ǵana ekonomıkalyq ósimniń paıdasyn kórip otyr. Al halyqtyń basym bóliginiń tabysy tómendep keledi nemese esh ózgerissiz qaldy. Bul memleketimizdiń qaýipsizdigine tóngen úlken qater. Bunyń bári qoǵamnyń ekonomıkalyq-áleýmettik, artynan saıası jaǵynan qaq bólinýine ákelip soqtyrýy múmkin. Osyndaı daǵdarystyń alǵashqy belgileri kórine bastady.
Halyqaralyq sarapshylar, atap aıtqanda, KPMG Qazaqstan baılyǵynyń teń jartysyna bar-joǵy 162 adam ıelik etedi dep málimdedi. Sonymen qatar halyqtyń jartysynyń aılyq tabysy 50 myń teńgeden aspaıdy nemese jylyna 1300 dollardan sál ǵana asady. Mundaı aqshaǵa ómir súrý múmkin emes. Tez arada jaǵdaıdy ózgertý kerek jáne kóp nárse sizderge baılanysty, qurmetti kásipkerler", – dep málimdedi ol.
Memleket basshysynyń aıtýynsha, táýelsizdik alǵaly beri bıznes úshin barynsha qolaıly jaǵdaılar jasaldy. Memleket kásipkerlik ortany damytýǵa kúsh saldy. Salyqtyq jeńildikter men qarjylaı kómek te kórsetildi. Osylaısha, ekonomıkalyq model boıynsha bıznes damysa, jumys oryndary ashylady, adamdardyń tabysy artady degen senim bolǵan.
