Aqtóbe qalasynda 22 sáýir, tańǵy ýaqytta, pyshaq jaraqatynan kóz jumǵan áıeldiń ólimine qatysty tyń derek aıtyldy. Kórshileri qandy oqıǵaǵa qatysty kórgen-bilgenin baıandady, dep habarlaıdy Alash.KZ ulttyq portaly KAZ.NUR.KZ-ke silteme kórsete otyryp.
Aqtóbe qalalyq polısıa departamentiniń ókilderi 22 sáýir kúni 34 jastaǵy áıeldiń tanysy qolynan kóz jumǵanyn málim etti.
Qandy oqıǵa týraly polısıaǵa marqumnyń kórshileri habarlaǵan. Oqıǵa bolǵan úıdiń turǵyny jatyn kıimimen júrgen qyzdy dálizde shashynan súıregen er adamdy kórgenin aıtty:
"Polısıaǵa men habarlastym. Ol kezde saǵat tańǵy 5:02 ýaqytty kórsetip turdy. Qyzdyń jan daýysy shyǵyp jatty. Qarsy esikten de kórshimiz shyqty. Polısıa 15 mınýttan keıin, TJD qyzmetkerleri 40 mınýt shamasynda keldi. Úıdiń esigi bir saǵat aınalasynda ashyldy. Tiri dep oıladym. Kómektesý úshin júgirip bardym. Biraq qyzdyń keýde tusy qan eken. Juqa jatyn kıimimen jatty. Bári kóz aldymda bolǵandyqtan ózim de qınalyp júrmin. Kómek ýaqytynda bolsa, qyz aman qalar ma edi. Osyǵan deıin de ol qyzdyń túnde dálizde jylap otyrǵanyn kórgenmin. Biraq ol kezde úıine kirip ketti. Qasyndaǵy kórshilerine "bireý gúl ákelip berse almańdar, polısıaǵa aryz bersem de qoımaıdy, qorqamyn" degen. Barlyq jaǵdaıdy tergeýshige baıandadym, sotta da aıtyp beremin", - deıdi marqumnyń kórshisi.
Qaıtys bolǵan áıeldiń jáne bir kórshisi áıeldiń qorǵansyz qalǵanyn aıtyp, janushyra aıǵaılaǵanyn estigenin jetkizdi:
"Balkonnan kirgen dep estidik. Qyz dálizge shyǵyp qashqan. Qyz qatty aıqaılaǵan. Mundaı jaǵdaı buryn bolmady. Qorqynyshty. Ol qyzdy qatty tanymaımyz. Biraq aýladan kórgenbiz", - deıdi marqumnyń kórshisi Mahabbat Jamantaıqyzy.
Eske sala keteıik, 22 sáýirde Aqtóbede turǵyn úılerdiń birinen áıel adamnyń denesi tabyldy. Marqumnyń denesinde kóptegen pyshaq jaraqaty men zorlyq-zombylyqpen óltirý belgileri bolǵan. Kúdikti polısıa qyzmetkerin jaraqattap, oqıǵa ornynan qashyp ketkeni,keıinnen ustalǵany habarlandy.
Qaza tapqan Móldir Tomarova qaladaǵy medısına ortalyqtarynyń birinde dáriger bolyp qyzmet etken.
