Men tereń depressıaǵa tústim. Qazaqstan degen - úlken jyndyhana. Men sonyń jalǵyz pasıenti sıaqtymyn.
Árbir qaraly aqparat meni ezip-janyshtap jatty.
Qaraly qańtar kezinde ár úıden shyqqan ólik meniń úıimnen shyǵyp jatqandaı, árbir qara jamylǵan oqıǵa meniń shańyraǵymda bolyp jatqan sıaqty sezim keshtim.
4-jasar ólgen qyz — meniń qyzym sıaqty. 15 jasar basynyń jartysyn oq julyp ketken jasóspirim qyz — meniń sińilim sıaqty. Esgýmasıaǵa qarsy eńkildep beıit basynda jylaǵan qarıa — meniń ákem sıaqty.
Tańerteń turyp áleýmettik jelini ashyp oqyǵannan tún aýa ony ázer jabasyń. Kúnine botadaı bozdap birneshe ret jylaısyń.
Búkil júıke júıeń shıryǵyp, atylatyndaı dárejege jetti. Júregim aýyryp, ázer demalatyn boldym. Álim quryp, kúsh-qýatym joǵaldy.
Eshnárse qýanta almaıdy. Qaıdaǵy qýaný? Bir kúndi jylamaı ótkizýdiń ózi muń boldy.
Barlyq adamnyń ishinde «Eskendirdiń múıizi bar!» degen syrtqa shyǵa almaǵan jan aıqaıy jatty!
Bul oqıǵa bizge neni túsindirdi?
Biz – eshkim emes ekenbiz! Biz – Qazaqstan deıtin eldi mekende tiri arýaqpyz. Elespiz. Halyq degen uǵym joq. Quldyń da qaqysy bar. Al qazaqtyń sol qul sekildi de qaqysy joq eken.
Sábıdi snaıper atqan. Iaǵnı maqsatty túrde óltirgen. Oǵan tıgen oq - urys dalasyndaǵy qańǵyǵan oq emes. Dáldep atylǵan oq! Mıǵa syımaıdy. Elestetýdiń ózi qorqynyshty!
Iaǵnı bul soǵys jazyǵy joq 4-jasar perishtege jarıalandy. Ol perishte – qazaqtyń bolashaǵy bolatyn.
Biz senderdi besikterińde óltiremiz degeni.
Bala emizip otyrǵan áıeldi de snaıper atqan! Bir oq basyn tesip ótken. Bul soǵystyń, ıaǵnı, jappaı eskertýsiz atýdyń artynda – alańǵa shyqqan árbiriń osy kepti kıesińder! 4-jasar sábıdi de, bala emizgen áıeldi de aıamaımyz!-degeni.
Qazaqstannyń Nıkaragýa men Aýǵanystannan aıyrmashylyǵy joq eken.
Mýsor shyǵaryp, ne nanǵa bara jatqan jerińnen seni ata salady. Suraýyń joq. Sot joq. Eshkim bul ólimge áli kúnge jaýap bermedi, jazalanbady.
Feısbýkte sýretteri aldymnan shyqqan barlyq bılik ókilderin jáne oǵan loıaldy jýrnalıs áriptesterdi, únsiz qalǵan barlyq aqyn-jazýshylardy ıttiń etinen jek kórip kettim.
Yza men kekke toly keýdem úıge syımady. Túrmelerde adamdar azaptalyp jatqanda ishken tamaǵyń iriń, jegeniń jelim bolady eken.
Astana kóshelerindegi alańsyz kúlip bara jatqan adamdarǵa qarap ishteı qan jylaısyń.
Bir aı boıy bas kótertpegen depressıa óz nátıjıesin berdi.
Qyzýym kóterilip aýyryp qaldym.
Adamzatqa qarsy, onyń ishinde qazaqqa qarsy úlken qylmys jasalyp jatqanda árbir únsiz qalǵan adam - qylmysker.
30-jyl boıy osy dárejege jetkizgen – ol sizdiń únsizdigińiz! Ol sizdiń «jany tátti ekijúzdiligińiz»!
30 jyl boıy qorqynysh túrmesin jeńe almaǵanymyz - búgin arqamyzǵa ystyq útik bop basylýda!
Búgin kóbi aýyzben bolsa da qarsylyq bildirýde! Biraq bári emes. Búkil qazaq bir judyryq bolyp jumylǵanda ǵana bul fashıs rejım kúıreıdi.
Kámeletke tolmaǵan jasóspirimderdiń tisin plaskogýbsymen tirideı sýyryp jatqanda qyzmet úshin, jan úshin únsiz qalǵan árbirińdi jek kóretinimidi málimdeımin!
Meniń jek kórý, jek kórmeýim eshqandaı problemany sheshpeıdi ǵoı. Ol tek ózimdi ǵana kúıretetinin bilemin.
Biraq bir kúni mýsor shyǵarýǵa bara jatqanda sol jylmıǵan únsizdigiń maǵdaıyńa oq bolyp qadalmasyn. Ol kezde tochno únsiz til tarpaı ketesiń!
Tanakóz Tolqynqyzy, aqyn
