Lýkashenko: Ýkraına basyp kirse, Belarýs Reseı sıaqty áreket etedi

Belarýstiń avtorıtar basshysy Aleksandr Lýkashenko (saılaý nátıjesin burmalady dep aıyptaǵan AQSH pen Eýropa odaǵy ony prezıdent qyzmetinde zańsyz otyr dep biledi), eger Ýkraına áskeri Donbastaǵy separatısterge shabýyl jasaıtyn bolsa, onda Belarýs áskeri "dál Reseı áskeri sıaqty áreket etedi" dep málimdedi. Bul týraly Azattyq jazdy.

Reseılik telejúrgizýshi Vladımır Solovóvtiń "ıaǵnı bul (áreket) birlesip jasala ma?" degen suraǵyna Lýkashenoko "árıne" dep jaýap berdi. Ol, Belarýs Ýkraınaǵa qarsy Reseımen birge soǵysady dep naqty aıtqan joq, degenmen, sózinen sondaı emeýrin ańǵarýǵa bolady.

Reseı áskeriniń Belarýste Ýkraınamen shekara mańyna ornalasýy beker emesin meńzegen Lýkashenko "Biz ne, ońtústik shekarada erikkennen júr deısizder me?"dedi.

Resmı Mınsk pen Máskeý, áskerıler aqpannyń ony men jıyrmasy aralyǵynda ótetin birlesken áskerı jattyǵýǵa qatysý úshin jınalyp jatqanyn habarlaǵan.

Kıev 2020 jyly Mınskidegi azamattardyń beıbit narazylyq aksıasyn kúshpen basqan Lýkashenko rejımin synaǵannan keıin Belarýs pen Ýkraına qarym-qatynas nasharlaǵan.

AQSH byltyr kúzden beri Ýkraınamen shekarada áskerin kóbeıtken Reseı kórshi elge basyp kirýi múmkin dep qaýiptenedi. Máskeý bolsa shabýyl jospary joǵyn aıtady. Batys elderi Reseı Ýkraınaǵa basyp kirse, sanksıa salatynyn qatań eskertken.

Vladımır Solovóvke bergen suhbatynda Lýkashenko, 15 jyldan keıin Ýkraına da, Qazaqstan da Reseı men Belarýs sekildi bir odaqtyń quramyna kire alatyny jaıly da aıtqan.