Almatydaǵy tergeý túrmesiniń syıymdylyǵy 1360 adamǵa arnalǵan. Alaıda ol jerde qazirgi tańda 1416 tutqyn jatyr. Qańtardaǵy jappaı tártipsizdikke qatysqan tutqyndar sany kóbeıgendikten adam quqyǵyn qorǵaý jónindegi qoǵamdyq uıym ókilderiniń de kelýi jıilegen. Sebebi, el kóleminde tutqyndardy azaptaý qoǵamnyń narazylyǵyn týdyrǵan edi. Qamaýdaǵy azamattardyń ahýalymen tanysý úshin LA-155/18 mekemesin Parlament Májilisiniń depýtattary da aralaýǵa kiristi. Oqıǵadan soń bir aı ýaqyt ótkende tergeý ızolátoryna kelgen depýtattar 11 tutqyndy qabyldap, olardyń aryz-shaǵymdaryn tyńdady.
«QR Parlament Májilisiniń jáne Almaty qalasy máslıhatynyń depýtattary, advokattar men ardagerler kelip, ustalǵandardyń jaǵdaıymen tanysty. Tergeý ızolátoryna kelgen depýtattar men advokattarǵa Almaty qalasy prokýrorynyń orynbasary N. Aýǵanbaev pen Almaty qalasy boıynsha Qylmystyq-atqarý júıesi departamentiniń bastyǵy ádilet polkovnıgi D. Qanatbekov LA-155/18 mekemeniń qyzmetin uıymdastyrý jáne qańtar oqıǵasy kezinde qamalǵandardy tergep-tekserý tártibi jaıly aqparat berdi. Májilis depýtattary tergeý ızolátoryndaǵy tekserýden keıin qańtar oqıǵasyna qatysty ustalǵan 11 kúdiktini jeke qabyldap, ótinishterin tyńdady. Ustalǵandardy jeke qabyldaý kezinde mekemedegi ustaý jaǵdaılaryna, onyń ishinde azaptaýlarǵa qatysty shaǵymdar bolǵan joq», – dedi LA-155/18 mekemesiniń bastyǵy, ádilet podpolkovnıgi Á. Jumadıev.
Jumadıevtiń sózinshe, tergeý ızolátoryna keletin tergeýshiler de, adam quqyǵyn saqtaıtyn túrli uıymdardyń ókilderi de kóbeıgen. LA-155/18 mekemesindegi kúdiktilerdiń jaǵdaıy Qoǵamdyq baqylaý komısıasy ókilderiniń de nazarynda. Ol jerdegi qyzmetkerlerdiń mindeti, kelýshiler men kúdiktilerdiń qaýipsizdigin qamtamasyzý etý. Adam quqyqtary jónindegi Ýákil, «Adam quqyǵyna arnalǵan hartıa» qoǵamdyq qorynyń dırektory da ustalǵandardyń oıyn tyńdaǵan. Tergeý ızolátoryna jetkizilgenderdiń arasynda kámelettik jasqa tolmaǵan jasóspirim de bar. Odan bólek tergeý ızolátorynyń medısına-sanıtarlyq bóliminde qańtar qaqtyǵysy kezinde jaralanǵan kúdiktilerde em alyp jatyr.
«Barlyǵy 1416 adam qamaýda, toltyrý lımıti – 1360, qańtar oqıǵasyna baılanysty barlyǵy – 375 adam, sot sanksıalarynyń aýystyrylýyna baılanysty 88 adam bosatyldy. Tártipsizdikterge qatysqany úshin mekemede 287 adam qamaýda jatyr. Olardyń ishinde: erler – 280, áıelder – 6, kámeletke tolmaǵandar – 1.
Shetel azamattary: QHR – 1, RF – 2, Ózbekstan – 8, Tájikstan – 1. Medısınalyq bólimshede – 13 adam, al qaıtys bolǵandar joq», – dedi Almaty qalasy jáne Almaty oblysy boıynsha Qoǵamdyq baqylaý komısıasynyń tóraıymy Ardaq Janábilova.
«Amanat» qorynyń ókilderi men quramynda belgili quqyq qorǵaýshylar, qylmystyq is júrgizý quqyǵy boıynsha mamandanǵan zańgerlerden quralǵan táýelsiz komısıa músheleri qańtardaǵy qaqtyǵys kezinde qamaýǵa alynǵan kúdiktilerge jan-jaqty quqyqtyq kómek kórsetip jatyr. Bas prokýratýranyń málimetinshe, qolǵa túskenderdiń arasynda tyıym salynǵan ekstremıstik aǵymdardyń 35 múshesi de bar.
«Qazir qamaýǵa alynǵandar arasynda tyıym salynǵan ekstremıstik aǵymdardyń 35 múshesi bar. Almatyda destrýktıvti dinı aǵymnyń qylmystyq baǵyttaǵy bir top múshesi ustaldy. Ustaý kezinde qoldanýǵa daıyn atys qarýy tabyldy. Olar óz áreketterin jaqsylap josparlaǵan. Bir bóligi qalanyń tómengi bóligindegi barıkadalarda, al ekinshisi alańda bolǵan», – dedi Arnaıy prokýrorlar qyzmetiniń basshysy Rızabek Ojarov.
